تەحنولوگيا • 22 اقپان، 2021

9-سىنىپ وقۋشىسى جاڭا ۇستەل ويىنىن قۇراستىردى

18 رەت كورسەتىلدى

ورال قالاسىنداعى فيزيكا-ماتەماتيكا باعىتىنداعى نازارباەۆ زياتكەرلىك مەكتەبىنىڭ 9-سىنىپ وقۋشىسى اينامكوز رافيحوۆا ۇلتتىق مازمۇنداعى «زەرەك» اتتى ۇستەل ويىنىن قۇراستىرىپ شىعاردى، دەپ حابارلايدى Egemen.kz

اينامكوز رافيحوۆا ويىن بارىسىندا قاتىسۋشىلاردىڭ قازاق حالقىنىڭ ماقال-ماتەلدەرى، ەرتەگىلەر، جاڭىلتپاشتار، ىرىم-تىيىمدار مەن تۇراقتى تىركەستەر بويىنشا ءبىلىمى تەكسەرىلەتىنىن ايتتى.

الدىمەن ارنايى زاڭدىلىقتارعا ساي ويىننىڭ قوزعالىس ءتارتىبى، ۋاقىتى، ەرەجەلەرى، ويىنشىلار سانى جانە ءتۇرلى بونۋستار جۇيەسى ويلاستىرىلدى. ويىن الاڭىندا بارلىعى 57 ۇياشىق، ولاردىڭ اراسىندا تۇزاق (وت جانە سۋ)، بونۋس جانە اقىلى ۇياشىقتار بار. ويىن باستالىسىمەن ءبىرىنشى ويىنشى سۇيەكتى لاقتىرىپ، ءوز قادامىن جاسايدى.

ول 100 سۇراق كارتاسىنىڭ ءبىرىن تاڭداپ، وعان جاۋاپ بەرۋى قاجەت. تۇزاق ۇياشىقتارىنا ءتۇسىپ قالسا، وت ۇياشىعىنان كولتاۋىسار، ال سۋ ۇياشىعىنان جەلاياق قۇتقارا الادى. ەگەر وعان قاجەت كەيىپكەر تۇسپەسە، ويىنشى سول ۇياشىقتا قالا بەرەدى. كەرىسىنشە، وزگە ويىنشىنىڭ كەزەگى كەلگەندە 2500 (بونۋس تۇرىندەگى قاعاز بانكنوتتار) ايىپپۇل تولەپ، ءوز جولىن جالعاستىرا الادى.

مارەگە كىم ءبىرىنشى جەتسە، سول جەڭىمپاز اتانادى. «زەرەك» مازمۇنىنا «سۋرەتتەگى ماقال-ماتەلدى جالعاستىر/تاپ»، «فرازەولوگيزم، ىرىم-تىيىم ماعىناسىن اشۋ، «جاڭىلتپاشتى قايتالاۋ»، ەرتەگىلەر مەن اڭىزدار بويىنشا ەرۋديتسيانى تەكسەرۋ، جۇمباقتاردى شەشۋ سياقتى سۇراقتار كىرەدى. اۆتوردىڭ سوزىنە قاراعاندا، نارىقتا «قولتىراۋىن»، «مونوپوليا» سياقتى ورىس تىلىندەگى ۇستەل ويىندارى كوپ، بىراق، وكىنىشكە وراي، انا تىلىندە ۇلتتىق مازمۇنداعى ويىندار جوقتىڭ قاسى.

– سوڭعى ۋاقىتتا «قازاق حاندىعى» اتتى ۇستەل ويىنى پايدا بولدى. بۇل ويىن تاريحىمىزدى، قازاق ەلىندەگى باسقارۋ جۇيەسىن ويىن ارقىلى تانىستىرۋدى كوزدەگەن. كىتاپ، فيلم سەكىلدى ۇلتتىق يدەولوگيانى ناسيحاتتاۋ قۇرالى رەتىندە ۇستەل ويىنىنا دا ورىن بار دەپ ويلايمىن، – دەيدى ا.رافيحوۆا.

ۇستەل ويىندارى ادامنىڭ اقىل-وي، پسيحولوگيالىق دامۋىنا ۇلەس قوسىپ، كىشكەنتاي ويىنشىلاردىڭ ساۋساق موتوريكاسىن نىعايتادى ەكەن. ويىننىڭ تاعى ءبىر قىزمەتى اقپاراتتى قابىلداۋ، ويلاۋ نەگىزدەرىن، پروبلەمالاردى وڭاي شەشۋ، ءبۇتىن مەن بولشەكتەردى اجىراتۋ سىندى كوگنيتيۆتى داعدىلاردى دامىتادى. اينامكوز ويىندى سىنىپتاستارىمەن سىناپ كوردى.

سونداي-اق جوبانىڭ قاعاز نۇسقاسى ورال قالاسىنداعى بالالار اۋىلى تاربيەلەنۋشىلەرىنە تانىستىرىلىپ، سىيلىق ەسەبىندە ۇسىنىلدى. سونىمەن قاتار «زەرەكتىڭ» ەلەكتروندى نۇسقاسى دايىندالدى (https://my.flipbookpdf.net/7k2rP).

– ۇلتتىق مازمۇنداعى ۇستەل ويىنىنىڭ جاھاندانۋ كەزەڭىندەگى ماڭىزى ەرەكشە، الداعى ۋاقىتتا ويىن شارتتارى تۋرالى قوسىمشا قۇرال دايىنداۋ جوسپاردا بار. سونىمەن بىرگە «كوكپار»، «قىز قۋ» ۇلتتىق ويىندارىنىڭ شارتتارىنا نەگىزدەلگەن ۇلتتىق مازمۇنداعى ۇستەل ويىنىن قۇراستىرماقپىن، – دەيدى اۆتور.

اينامكوز جوبا بارىسىندا باعىت-باعدار بەرگەن جەتەكشىلەرى – قازاق ءتىلى مەن ادەبيەتى ءپانىنىڭ مۇعالىمى جانساۋلە ماقسوتوۆا مەن ونەر ءپانىنىڭ مۇعالىمى جاننا قۇلبەكوۆاعا العىسىن جەتكىزدى.

سوڭعى جاڭالىقتار

75،7 ملن ادام ايتۆ جۇقتىردى

مەديتسينا • كەشە

2021 جىلعى ورازا كەستەسى

رۋحانيات • كەشە

ۇقساس جاڭالىقتار