وبلىس باسشىسىنىڭ ايتۋىنشا, ءبىر اي ىشىندە بارلىق دەڭگەيدەگى اكىمدەر تۇرعىندارمەن 423 كەزدەسۋ وتكىزىپتى. وعان 44 مىڭعا جۋىق ادام قاتىسقان.
اتقارۋشى بيلىكتىڭ الدىندا تۇرعان ماڭىزدى مىندەتتىڭ ءبىرى – تۇرعىنداردى جۇمىسپەن قامتۋ. وسى ورايدا ءوڭىر باسشىسى بىلتىر مەملەكەتتىك باعدارلامالار ارقىلى وبلىستا 35 مىڭ جاڭا جۇمىس ورنى اشىلعانىن ءمالىم ەتتى. بۇل جۇمىسسىزدىق دەڭگەيىن 4,6% كورسەتكىش مۇعدارىندا ۇستاپ تۇرۋعا مۇمكىندىك بەرگەن.
ونلاين-ەسەپتىك كەزدەسۋدە جەڭىس قاسىمبەك دەنساۋلىق ساقتاۋ سالاسىن دامىتۋ ماسەلەسىنە كەڭىنەن توقتالدى.
– وتكەن جىلى قارقارالى اۋدانىنىڭ قاراعايلى كەنتىندە جانە نۇرا اۋدانىنىڭ شاحتەر اۋىلىندا جاڭا اۋىلدىق دارىگەرلىك امبۋلاتوريالار سالىندى. اباي جانە شەت اۋداندارىندا ورتالىق اۋداندىق اۋرۋحانالار جوندەلدى. وسى جىلى اقتوعاي مەن نۇراداعى ورتالىق اۋداندىق اۋرۋحانالار دا وسىنداي وزگەرىستەردى كۇتىپ وتىر. اقادىر كەنتىنە جۇمىس ساپارىمەن بارعانىمدا اقساقالدار اۋرۋحانا عيماراتىن جوندەۋ تۋرالى ءوتىنىش ايتتى. بيىل مىندەتتى تۇردە ول جۇمىستى باستايمىز, – دەدى ول.
ءوڭىر باسشىسى ونكولوگيالىق ديسپانسەردىڭ جەزقازعانداعى فيليالىن ۇيىمداستىرۋ ماسەلەسىن شەشۋگە ۋادە بەردى. سونداي-اق قاراعاندىدا ەرەسەكتەرگە ارنالعان وبلىستىق كوپ بەيىندى اۋرۋحانانىڭ, وبلىستىق ونكولوگيالىق ديسپانسەردىڭ وپەراتسيالىق-رەانيماتسيالىق كورپۋسىنىڭ قۇرىلىسى باستالعانىن اتاپ ءوتتى. ساۋلەلىك دياگنوستيكا جانە تەراپيا ورتالىعى ءۇشىن عيمارات سالۋ جوسپاردا بار. ۇزاق ۋاقىت كىدىرىستەن كەيىن وبلىستىق بالالار اۋرۋحاناسىنىڭ قۇرىلىسىن اياقتاۋ دا كەزەك كۇتتىرمەيتىن مىندەتتىڭ ءبىرى ەكەنىن تىلگە تيەك ەتتى.
– جيھازبەن جانە قاجەتتى تۇرمىستىق تەحنيكامەن جابدىقتالعان قىزمەتتىك پاتەرلەردى بەرۋ ەسەبىنەن دارىگەرلەر مەن جاس مامانداردى تارتۋ ماسەلەسىن شەشەمىز. ەكى جىل ىشىندە 227 دارىگەر باسپانامەن قامتىلدى. الداعى ەكى جىلدا ءبىزدىڭ وبلىسقا جۇمىس ىستەۋگە كەلگەن كەم دەگەندە 300 مامان پاتەر الادى, – دەدى ول.
جەڭىس قاسىمبەك قاراعاندى وڭىرىندە جاڭا وقۋ جىلىنان باستاپ مەكتەپتەردە تەگىن تاماقتاناتىن بالالار سانى ارتاتىنىن مالىمدەدى.
– وتكەن جىلعى ەسەپتىك كەزدەسۋدە ۋادە ەتكەندەي, بيىلدان باستاپ بارلىق 1-2-سىنىپ وقۋشىلارىن تەگىن ىستىق تاماقپەن قامتاماسىز ەتتىك. ەندى قىركۇيەك ايىنان باستاپ 3-ءشى جانە 4-سىنىپتاردى دا قامتيتىن بولامىز, – دەدى وبلىس اكىمى.
بىلتىر وبلىستا جاڭا جابدىقتارمەن جاراقتاندىرىلعان 26 قوسىمشا ءبىلىم بەرۋ ورتالىعى اشىلدى. جاڭا مەكتەپتەر جەزقازعاندا, قاراعاندىدا جانە ۇلىتاۋ اۋدانىندا سالىندى. بيىل شەت اۋدانىنىڭ كيىكتى اۋىلىندا, جەزقازعان قالاسىنىڭ تەرەكتى ستانساسىندا, جاڭاارقا اۋدانىنىڭ جاڭاارقا كەنتىندە جانە قاراعاندىدا قۇرىلىسى ءجۇرىپ جاتقان ءتورت مەكتەپتى تاپسىرۋ جوسپاردا تۇر.
وبلىس باسشىسى ءۇش جاسقا دەيىنگى جانە ەرەكشە قاجەتتىلىكتەرى بار بالالاردى بالاباقشالارمەن قامتاماسىز ەتۋدىڭ باستى مىندەت ەكەنىن ايتتى. وسى جىل ارالىعىندا 1500 ورىندىق 15 جەكەمەنشىك مەكتەپكە دەيىنگى ۇيىم اشىلىپتى. بۇل ءۇش جاسقا دەيىنگى بالالاردى قامتۋدى 61%-عا دەيىن ارتتىرۋعا مۇمكىندىك بەرگەن.
ج.قاسىمبەك قاراعاندى وبلىسىندا تۋريستەر ءۇشىن جاڭا دەمالىس ورىندارىنىڭ پايدا بولاتىنىن ءمالىم ەتتى. مىسالى, بالقاش كۋرورتتىق ايماعىن دامىتۋعا شامامەن 30 ملرد تەڭگە جۇمسالاتىنىن ايتتى.
– بىزدە ءۇش تۋريستىك كلاستەر بار. ولاردىڭ قاتارىنا 50 وڭىرلىك جوبا ءتىزىمىنىڭ وندىعىنا كىرەتىن بالقاش, قارقارالى جانە ۇلىتاۋ بار. جەكە ينۆەستيتسيالار ەسەبىنەن توعىز جاڭا دەمالىس ايماعىنىڭ قۇرىلىسى باستالادى. رەزەرۆتە جاعالاۋ ايماعىنداعى تۋريستىك ينفراقۇرىلىم ءۇشىن تاعى 60 گا بوس جەر بار, – دەدى وبلىس اكىمى.
تۋريستىك سالانىڭ اياسى بالقاشتا عانا ەمەس, قارقارالىدا دا كەڭەيۋدە. مۇنداعى بەس جەكە دەمالىس ايماعىن اشۋعا 1 ملرد تەڭگەدەن اساتىن ينۆەستيتسيا سالىنباقشى. ۇلىتاۋدا تۋريستەرگە ارنالعان ۆيزيت-ورتالىقتىڭ قۇرىلىسى اياقتالدى. اۋداندا قاسيەتتى ورىندار مەن كورىكتى جەرلەردىڭ جولدارى جوندەلۋدە. بيىل جوشى حاننىڭ تاريحي-مادەني كەشەنىنىڭ قۇرىلىسى اياقتالۋعا ءتيىس.
ەسەپتىك كەزدەسۋدە وبلىس اكىمى وڭىردە اۋقىمدى قۇرىلىس جۇمىستارىنىڭ جالعاساتىنىن مالىمدەدى. بيىل كەزەكتە تۇرعان 3 مىڭنان استام ادام الەۋمەتتىك تۇرعىن ۇيمەن قامتاماسىز ەتىلمەكشى. بۇدان بولەك الەۋمەتتىك قورعالاتىن ساناتتاعى كەزەكتە تۇرعان 2 500 ادام دا باسپانالى بولعان. جەڭىس قاسىمبەك الەۋمەتتىك جالعا بەرىلەتىن جانە نەسيەلىك تۇرعىن ءۇي بەرۋ قارقىنى ءبىر جىلدا 40%-عا وسكەنىن اتاپ ءوتتى.
وبلىس اكىمى قاراعاندى وبلىسىندا 2021 جىلى 14 جاڭا ءوندىرىستى ىسكە قوسىپ, 2 600 جۇمىس ورنىن اشۋ جوسپاردا بار ەكەنىن ايتتى. ال ينۆەستيتسيا كولەمى 700 ملرد تەڭگەدەن اسادى دەگەن بولجام بار.
جاقىن ارادا جايرەمدەگى بايىتۋ فابريكاسى, فەرروقورىتپا زاۋىتى جانە Qaz Carbon اگلومەراتسيالىق فابريكاسى سياقتى جوبالاردى جۇزەگە اسىرۋ جوسپاردا بار ەكەن. ساران قالاسىندا قىتايلىق Yutong كومپانياسىنىڭ قاتىسۋىمەن اۆتوبۋستار مەن ارنايى تەحنيكا شىعاراتىن كاسىپورىن ىسكە قوسىلدى جانە جاقىن ارادا شاعىن توراپتى قۇراستىرۋ ىسكە قوسىلاتىن بولادى. سونداي-اق بيىل رەسەيلىك «تاتنەفت» كومپانياسىنىڭ قاتىسۋىمەن شينا شىعاراتىن زاۋىتتىڭ قۇرىلىسى باستالاتىنىنان حاباردار ەتتى وبلىس اكىمى.
قاراعاندى وبلىسىندا بيىل كاسىپكەرلىكتى قولداۋدى قارجىلاندىرۋ 2,5 ەسە وسكەن ەكەن.
– 2020 جىلى «بيزنەستىڭ جول كارتاسى» بويىنشا جەڭىلدىكتى شارتتارمەن وبلىستىڭ 420 كاسىپورنى ءوڭىر ەكونوميكاسىنا 48 ملرد تەڭگە سالىپ, ءوز جوبالارىن ىسكە اسىرا الدى. بۇل 2019 جىلمەن سالىستىرعاندا ەكى ەسە كوپ. بيىل كاسىپكەرلىكتى قولداۋعا بيۋدجەتتەن 7 ملرد تەڭگە قاراستىرىلعان. ول وتكەن جىلعىدان 2,5 ەسە ارتىق, – دەدى وبلىس اكىمى.
شاعىن جانە ورتا بيزنەستى مەملەكەتتىك قولداۋ 2 400 تۇراقتى جۇمىس ورنىن قۇرۋعا مۇمكىندىك بەرگەن. ءبىر جىل ىشىندە ءوز ءىسىن اشۋعا 1900 وتەۋسىز گرانت بەرىلىپتى. وبلىس اكىمىنىڭ ءجۇز گرانتىن جاس كاسىپكەرلەر الدى. سونداي-اق ءتۇرلى مەملەكەتتىك باعدارلامالار بويىنشا قارجىلىق قولداۋدى 3700 كاسىپكەر پايدالانعان. بيزنەسكە تەگىن وقىتۋ كۋرستارىنان 2 800 ادام ءوتتى.
ەسەپ بەرۋ كەزدەسۋىندە سپورت سالاسىنا ايرىقشا كوڭىل ءبولىنىپ وتىرعانى اتالىپ ءوتتى. اسىرەسە اۋىلداعى سپورت ينفراقۇرىلىمىن دامىتۋدىڭ ءجىتى نازاردا ەكەندىگى ايتىلدى. مىسالى, بۇگىندە وڭىردە التى بىردەي دەنە شىنىقتىرۋ-ساۋىقتىرۋ كەشەنىنىڭ (دشسك) قۇرىلىسى ءجۇرىپ جاتىر.
– 2020 جىلى سپورت نىساندارىن سالۋعا جانە جوندەۋگە 11 ملرد تەڭگەدەن استام قاراجات ءبولىندى. قارقارالى مەن تەمىرتاۋدا جاڭا دەنە شىنىقتىرۋ-ساۋىقتىرۋ كەشەندەرى اشىلدى. بيىل تاعى التاۋىن قالالاردا عانا ەمەس, شالعاي اۋىلداردا دا سالىپ جاتىرمىز, – دەدى وبلىس اكىمى.
بۇگىندە قارقارالى اۋدانىنداعى ەگىندىبۇلاق كەنتىندە «اۋىل – ەل بەسىگى» ارنايى جوباسى اياسىندا 100 ورىندىق دسك قۇرىلىسى باستالىپ, كەلەسى جىلى اياقتالادى. بۇل ماسەلەنى كەنت تۇرعىندارى كوپتەن بەرى كوتەرىپ كەلگەن ەدى.
سونداي-اق ۇلىتاۋ اۋدانىنداعى قارساقباي كەنتىندە جۇرگىزىلىپ جاتقان دسك قۇرىلىسى دا اياقتالۋعا جاقىن. بۇل نىساننىڭ قۇرىلىسى «جۇمىسپەن قامتۋدىڭ جول كارتاسى» باعدارلاماسى بويىنشا قارجىلاندىرىلدى. ءساتىن سالسا, قۇرىلىسى بىلتىر باستالعان كەشەن بيىل اشىلادى دەپ جوسپارلانعان.
سونىمەن قاتار وبلىس باسشىسى ەسەپتىك كەزدەسۋدە الداعى ەكى جىلدا جاڭا سپورت نىساندارى اشىلاتىنىن ءمالىم ەتتى. اتاپ ايتقاندا, شاحتينسك قالاسىندا, ۇلىتاۋ اۋدانىنىڭ جەزدى اۋىلىندا, بۇقار جىراۋ اۋدانىنىڭ بوتاقارا كەنتىندە دەنە شىنىقتىرۋ-ساۋىقتىرۋ كەشەندەرىنىڭ قۇرىلىسى بيىل اياقتالادى. ال جەزقازعانداعى دشسك قۇرىلىسىن ءبىتىرۋ كەلەسى جىلدىڭ ەنشىسىندە.
ەسەپتىك كەزدەسۋدە وبلىس اكىمى بۇقارالىق سپورتتى دامىتۋدىڭ نەگىزگى ينديكاتورىنىڭ ءبىرى حالىقتى قولجەتىمدى سپورتتىق ينفراقۇرىلىممەن قامتاماسىز ەتۋ ەكەندىگىن اتاپ ءوتتى. بۇگىندە وبلىستا جاساندى جابىندىسى بار 333 سپورت الاڭى, 262 كوپ سالالى حوككەي كورتى جانە 34 ستريت-ۆوركاۋت الاڭى بار ەكەندىگى ايتىلدى. سونداي-اق بيىل نۇرا مەن جاڭاارقادا 2 ءجۇزۋ باسسەينىن تاپسىرۋ جوسپاردا بار.
سونىمەن بىرگە ءوڭىر باسشىسى وبلىستاعى سپورت نىساندارىن سالۋعا قاراجات بيۋدجەتتەن عانا ەمەس, دەمەۋشىلەر ەسەبىنەن دە قاراستىرىلعانىن اتاپ ءوتتى.
وبلىس اكىمىنىڭ ونلاين-ەسەپ بەرۋى كەزىندە تۇرعىنداردان مىڭعا جۋىق سۇراق كەلىپ تۇسكەن. ج.قاسىمبەك بۇل سۇراقتاردىڭ ءبىر دە بىرەۋى نازاردان تىس قالمايتىنىنا, ءتيىستى جاۋابى بولاتىنىنا ۋادە بەردى.
قاراعاندى
