Tesla كومپانياسى الداعى ۋاقىتتا كليەنتتەرمەن كريپتوۆاليۋتا ارقىلى ەسەپتەسۋدى جوسپارلاپ وتىرعانىن حابارلادى. وسى جاڭالىقتىڭ جارق ەتۋى مۇڭ ەكەن, بيتكوين باعاسى شارىقتاپ شىعا كەلدى.
بيتكوين وتكەن اپتانى 48 مىڭ دوللارمەن تۇيىندەگەن ەدى. بۇعان Mastercard پەن BNY Mellon كومپانيالارىنىڭ حابارلامالارى تۇرتكى بولدى. Mastercard 2021 جىلى كريپتوۆاليۋتامەن تولەم قابىلداۋدى باستاۋعا نيەتتى ەكەنىن حابارلادى. اقش-تىڭ ەڭ كونە بانكى – BNY Mellon تسيفرلى ۆاليۋتالاردى ساقتاۋعا جانە ونىمەن وپەراتسيالار جۇرگىزۋگە ارنالعان پلاتفورمانى ازىرلەيتىنىن مالىمدەدى.
2021 جىلى بيتكوين شامامەن 70 پايىزعا ءوستى. Bloomberg مالىمەتتەرى بويىنشا, بىرنەشە كۇن بۇرىن بيتكوينعا باسەكەلەس Ether كريپتوۆاليۋتاسى دا ءوز رەكوردىن جاڭارتتى. ونىڭ قۇنى جىل باسىنان بەرى 150 پايىزعا قىمباتتادى.
جالپى, كريپتوۆاليۋتالاردىڭ ەكىنشى «عۇمىرى» كوروناۆيرۋسپەن بىرگە باستالدى. بىراق نەگىزگى ءوسىم جىلدىڭ ەكىنشى جارتىسىندا تىركەلدى. بىرنەشە ايدىڭ ىشىندە بيتكوين باعاسى ءتورت ەسە, ياعني 10 مىڭ دوللاردان 40 مىڭ دوللارعا دەيىن ءوستى.
بۇعان دەيىن ەڭ جوعارعى باعا 2017 جىلدىڭ سوڭىندا تىركەلگەن بولاتىن – 20 مىڭ دوللار. كەيىن بيتكوين بۇل بيىگىنەن قۇلدىراي باستادى. ال جاڭا جىل باستالعالى بەرى ونىڭ باعامى 30 مىڭ دوللاردان كەم تۇسكەن ەمەس.
ساراپشىلاردىڭ بولجامىنشا, بيتكوين باعاسى ودان ءارى وسە بەرمەك. بۇعان قاجەتتى العىشارتتار جەتكىلىكتى.
