بوگدانوۆيچ مۇزدىعى ۇلكەن تالعار اسۋىنان وڭتۇستىك-باتىسقا قاراي ىلە الاتاۋىنىڭ كىشى الماتى سىلەمىندە ورنالاسقان.تەڭىز دەڭگەيىنەن 3160-3360 م بيىكتىكتە ورنالاسقان بوگدانوۆيچ مۇزدىعىنىڭ اۋماعىندا قالادان جاقسى كورىنەتىن كوپتەگەن ادەمى شىڭدار بار. اۋداننىڭ باستى شىڭى مەن ەڭ بيىك نۇكتەسى - نۇرسۇلتان شىڭى, بيىكتىگى 4376 م. بۇل شىڭ - ىلە الاتاۋىنىڭ ەڭ ادەمى شىڭى جانە الماتىنىڭ ۆيزيت كارتوچكاسى بولىپ تابىلادى. بوگدانوۆيچ مۇزدىعى تسيركىنىڭ باسقا دا بەلگىلى شىڭدارى: اباي شىڭى, شكولنيك شىڭى, چكالوۆ شىڭى, فيزكۋلتۋرنيك شىڭى, امانگەلدى شىڭى, پيونەر شىڭى, قارلىتاۋ شىڭى بولىپ تابىلادى.
الماتى قالاسى تۋريزم باسقارماسى باسشىسىنىڭ ورىنباسارى مارات اينابەكوۆ تاۋلى اۋماقتا قار كوشكىنى مەن سەل ءجۇرۋ ىقتيمالدىعى ارتاتىندىعىن ايتىپ, الدىن الا جاۋىن-شاشىننىڭ ىقتيمالدىعىن ءاردايىم تەكسەرىپ, ساپار ۋاقىتىن ەسەپتەۋ قاجەتىگىنە كوڭىل ءبولۋدى ەسكەرتتى. باعىت تالعار اسۋىنا فۋنيكۋلەرمەن كوتەرىلۋدەن باستالادى. مۇزدىققا قاراي جانە ارتقا جاياۋ ءجۇرۋ باعىتى 5-6 ساعاتتى قۇرايدى. جاياۋ جۇرگىنشىلەر بولىگىنىڭ ۇزىندىعى - 8 كم.
سونىمەن قاتار, الماتى اكىمدىگى تاۋ قاۋىپسىزدىگى تاقىرىبى بويىنشا 2021 جىلى قوسىمشا 120 كم تاۋ جولدارىن اباتتاندىرۋدى جوسپارلاپ وتىر. تاۋداعى تۋريستەردىڭ قاۋىپسىزدىگىن قامتاماسىز ەتۋ ءۇشىن اعىمداعى جىلى قۇرىلىس جۇمىستارى جوسپارلانعان:
كىشى جانە ۇلكەن الماتى شاتقالىنداعى 2 باقىلاۋ-قۇتقارۋ پۋنكتى; تاۋ مارشرۋتتارىنىڭ شالعاي توراپتىق ۋچاسكەلەرىندە قاۋىپسىزدىكتىڭ 14 تىرەك نۇكتەسى; «تۇيىق-سۋ» شاتقالىنان تىكۇشاق الاڭى;10 راديورەلەلىك دىڭگەكتەردى ورناتۋ (قۇتقارۋ وتريادتارىنا دابىل بەرۋ باتىرمالارىمەن); «Tau Go» سمارت-ناۆيگاتور قوسىمشاسىن ازىرلەۋ.
بيىلعى جىلى تاۋلى جەرلەردە ارنايى باقىلاۋ-قۇتقارۋ پۋنكتى قۇرىلىپ, وندا قۇتقارۋشىلاردىڭ تاۋلىك بويى كەزەكشىلىگى قامتاماسىز ەتىلەدى. تاۋ قۇتقارۋشىلارىنىڭ قۇرامى 16 شتاتتان جاساقتالعان.
