مادەنيەت جانە سپورت مينيسترلىگى, "ازىرەت سۇلتان" مەملەكەتتىك تاريحي-مادەني قورىق-مۋزەيىنىڭ ۇيىمداستىرۋىمەن وتكەن كونفەرەنتسياعا تاريح عىلىمدارىنىڭ دوكتورلارى مەن پروفەسسورلار – جامبىل ارتىقباەۆ, بەرەكەت كارىباەۆ, حازىرەتالى تۇرسىن, فيلولوگيا عىلىمدارىنىڭ دوكتورى, پروفەسسور سەيدۋللا سادىقوۆ, فيلوسوفيا جانە تەولوگيا عىلىمدارىنىڭ دوكتورى, پروفەسسور دوساي كەنجەتاي, تاريح عالىمدارىنىڭ كانديداتى, دوتسەنت زىكىريا جانداربەك پەن ءتورالى قىدىر, تاعى باسقا تاريحشىلار مەن مۋزەي قىزمەتكەرلەرى, ستۋدەنتتەر قاتىستى.
"كونفەرەنتسيا ەلباسى نۇرسۇلتان نازارباەۆتىڭ "بولاشاققا باعدار: رۋحاني جاڭعىرۋ", " ۇلى دالانىڭ جەتى قىرى" باعدارلامالىق ماقالالارى اياسىندا جانە تاۋەلسىزدىگىمىزدىڭ 30 جىلدىعىنا وراي وتكىزىلىپ وتىر. ەگەمەندىككە قول جەتكىزگەن جىلداردان باستاپ ەلىمىزدەگى تاريحي-مادەني ورىندار قايتا تۇلەپ, قالپىنا يە بولا باستادى. سونىڭ ءبىرى – تۇركىستان قالاسى. كونفەرەنتسياعا قاتىسىپ وتىرعان تاريحشى اعالارىمىزدىڭ ەڭبەكتەرى قورىق-مۋزەيدىڭ عىلىمي جۇمىستارىنىڭ جاندانۋىنا دا ولشەۋسىز ۇلەس قوسىپ كەلدى. وسى باعىتتا تاريحي ورىندار مەن تۇلعالارعا ارنالعان كىتاپتار شىعارىلۋدا. سونىمەن قاتار, تاعى دا ءبىر قۋانىشتى جاڭالىق قوجا احمەت ياساۋي كەسەنەسىندە جەرلەنگەن تۇلعالار ءتىزىمى جاڭارىپ, تاعى دا ون ەكى تۇلعانىڭ جەرلەنگەنى تۋرالى تاريحي دەرەكتەر ماقۇلداندى", دەدى "ازىرەت سۇلتان" مەملەكەتتىك تاريحي-مادەني قورىق-مۋزەيىنىڭ ديرەكتورى نۇربولات احمەتجانوۆ.
باسقوسۋ بارىسىندا كونە جانە جاڭا تۇركىستاننىڭ تاريحي دامۋ ساباقتاستىعى, وتىز جىل ىشىندە اتقارىلعان جۇمىستار, ەلباسى نۇرسۇلتان نازارباەۆتىڭ تۇركىستان قالاسىن دامىتۋ مەن تاريحي ورىنداردى قايتا جاڭعىرتۋ جولىنداعى سەرپىندى ىستەرى, ۇلتتىق سانا, ۇلى دالا ەلى ۇعىمىنىڭ مازمۇنى, ورتاعاسىرلىق قالالاردىڭ زەرتتەلۋى مەن تاريحى, قوجا احمەت ياساۋي دۇنيەتانىمىنىڭ ءمانى, ارحەولوگيالىق قازبا جۇمىستارى بارىسىنداعى عىلىمي جەتىستىكتەر, تۇلعالار تابانىنىڭ ءىزى قالعان قاسيەتتى جەردى تانىتۋ باعىتىندا ەسكەرىلۋى ءتيىس تاريحي دەرەكتەر سىندى كوپتەگەن ماسەلەلەر ورتاعا سالىنىپ, باياندامالار وقىلدى.
