الەم • 18 اقپان، 2021

تۇركياداعى قوناقۇيلەر جاپپاي ساتىلىپ جاتىر

71 رەت كورسەتىلدى

الەمدى جايلاعان پاندەميانىڭ سالدارىنان تۋىنداعان قارجىلاي قيىندىقتارعا بايلانىستى تۇركيادا كوپتەگەن قوناقۇي يەسى ءوز كاسىبىن ساتۋعا بەل بۋعان، دەپ حابارلايدى Egemen.kz

تۇركياداعى تانىمال ساتۋ سايتىنىڭ (Sahibinden.co) مالىمەتىنشە، سوڭعى ايدا انتاليادا 234 قوناقۇي ساتىلىمعا شىعارىلعان: مۇراتپاشادا – 56، الانيادا – 42، كەمەردە – 39، ماناۆگاتتا – 33. سونداي-اق كاشتا – 21، كونياالتىدا – 16، سەريكتە – 13، كۋملۋدجەدە – سەگىز، كەپەزدە – ءۇش جانە فينيكەتە، گازيپاشەدە جانە دەمرەدە ءبىر تۋريستىك ايماقتان ساتىلىمعا شىعارىلعان. 

ساتۋعا قويىلعان ەڭ قىمبات نىساننىڭ قۇنى 585 ميلليون تۇرىك ليراسىنا (شامامەن 35 ميلليارد تەڭگە) باعالانعان. كوناكلى اۋدانىندا ورنالاسقان بەس جۇلدىزدى قوناق ۇيدە 330 بولمە بار، ءبىر ۋاقىتتا مىڭعا جۋىق قوناق تۇرا الادى.

ەڭ ارزان نىسان 5 ميلليون 200 مىڭ تۇرىك ليراسى (شامامەن 319 ميلليون تەڭگە) سوماسىنا باعالاندى.

الانيا تۋريستىك وپەراتورلار قاۋىمداستىعىنىڭ (ALTID) جانە الانيانى دامىتۋ جانە تۋريزم قورىنىڭ (ALTAV) ۆيتسە-پرەزيدەنتى مەحمەت داحاوگلۋدىڭ ايتۋىنشا، قوناقۇيلەر بۇرىندارى دا ساتىلعان، بىراق مۇنشا كولەمدە ەمەس.

– جەرورتا تەڭىزى ايماعىندا كوپتەگەن تۋريستىك نىسانداردىڭ ساتىلۋىنىڭ باستى سەبەپتەرىنىڭ ءبىرى پاندەميادان تۋىنداعان ەكونوميكالىق قۇلدىراۋ بولدى. اقشا تاباتىن، جۇمىسپەن قامتاماسىز ەتەتىن جانە ەل ءۇشىن تابىس بولاتىن كاسىپتى كىم ساتقىسى كەلەدى؟ – دەدى مەحمەت داحاوگلۋ.

ەسكە سالايىق، 2020 جىلى پاندەمياعا بايلانىستى تۋريستىك اعىن 80 پايىزعا تومەندەگەن كەزدە تۇرىك قوناقۇيلەرى قارجىلىق قيىندىقتارعا تاپ بولدى. تۇركيا قوناقۇي فەدەراتسياسىنىڭ (TUROFED) باعالاۋىنشا، 2021 جىلى تۇركيادا دەمالۋعا 25-تەن 30 ميلليونعا دەيىن حالىقارالىق تۋريستەر كەلۋى مۇمكىن. ال 2019 جىلى تۇركياعا 50 ميلليونعا جۋىق ساياحاتشى بارعان. 

سوڭعى جاڭالىقتار

9 سۋ قويماسى سالىنادى

ەكولوگيا • كەشە

ۇقساس جاڭالىقتار