الايدا, سەناتورلار ەل پرەزيدەنتىنىڭ مەملەكەتتىك جانە جەكە مەنشىك وپەراتورلاردى قۇرۋعا تىيىم سالۋ تۋرالى تاپسىرماسىن باسشىلىققا الا وتىرىپ, جوبالاۋ قۇجاتتارى مەن ۋران كەن ورىندارىن يگەرۋ تالداۋىنا تاۋەلسىز ساراپتاما وپەراتورىن قۇرۋعا قاتىستى ەرەجەلەردى الىپ تاستاۋدى ۇسىندى.
«ۋران ستراتەگيالىق شيكىزات بولىپ تابىلادى جانە ونى وندىرەتىن قورلاردى ەسەپكە الۋ ەلىمىزدىڭ وتىن-ەنەرگەتيكالىق كەشەنىن دامىتۋدى بەلگىلەيدى. ەنگىزىلەتىن وزگەرىستەر مەن تولىقتىرۋلار جەر قويناۋىن پايدالانۋشىلاردىڭ كەلىسىمشارتتاعى مىندەتتەمەلەردى ورىنداۋ ساپاسىن ارتتىرۋعا جانە ۋران ءوندىرۋ جونىندەگى جوبالاۋ قۇجاتتارى تۋرالى ەرەجەنى جەتىلدىرۋگە مۇمكىندىك بەرەدى. بۇل, سايىپ كەلگەندە, قازاقستان الەمدە جەتەكشى ورىن الاتىن سالانى دامىتۋ جاعدايىن جاقسارتۋعا مۇمكىندىك بەرەدى», – دەدى سەناتور ەرىك سۇلتانوۆ.
سەناتورلار ەنگىزگەن تۇزەتۋ پارلامەنت ماجىلىسىنە جىبەردى.
سونىمەن قاتار دەپۋتاتتار بۇگىن «قازاقستان رەسپۋبليكاسىنىڭ كەيبىر زاڭنامالىق اكتىلەرىنە نورماشىعارماشىلىقتى جەتىلدىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭدى قاراستىرىپ, ەكى وقىلىمدا قابىلدادى.
سەنات توراعاسى ماۋلەن اشىمباەۆتىڭ ايتۋىنشا, نورماتيۆتىك قۇقىقتىق اكتىلەردى ازىرلەۋ, قوعامدىق تالقىلاۋ جانە قابىلداۋ راسىمدەرىن جەتىلدىرۋ جونىندەگى مىندەتتەر مەملەكەت باسشىسىنىڭ سايلاۋ الدىنداعى باعدارلاماسىندا بەلگىلەنگەن بولاتىن. بۇل زاڭنىڭ قابىلدانۋى حالىقتىڭ زاڭ شىعارۋ پروتسەسىنە بەلسەندى قاتىسۋىن قامتاماسىز ەتۋ ءۇشىن قوسىمشا قۇقىقتىق نەگىز قالىپتاستىرادى جانە پرەزيدەنتتىڭ سايلاۋ الدىنداعى باعدارلاماسىنىڭ ورىندالۋى بولىپ تابىلادى.
«ازىرلەنەتىن زاڭداردىڭ ساپاسىن ارتتىرۋعا, ولار بويىنشا جۇيەلى ءتۇسىندىرۋ جۇمىستارىن جۇرگىزۋگە جانە قابىلدانعان زاڭداردىڭ ورىندالۋىن باقىلاۋعا ارنالعان تەتىكتەر انىقتالادى. زاڭ اياسىنداعى وزگەرىستەر زاڭشىعارۋشىلىق پروتسەستى جاڭا دەڭگەيگە كوتەرىپ, ونىڭ اشىقتىعىن جانە تيىمدىلىگىن ارتتىرۋعا ءوز ۇلەسىن قوسادى دەپ سەنەمىز», – دەدى ماۋلەن اشىمباەۆ.
سونداي-اق, وتىرىستا احمەت بايتۇرسىنوۆتىڭ 150 جىلدىعىنا وراي پرەمەر-ءمينيستردىڭ اتىنا دەپۋتاتتىق ساۋال جولداندى. وندا الاش قايراتكەرىنىڭ مەرەيتويىن لايىقتى دەڭگەيدە اتاپ وتۋگە دايىندىق جۇرگىزۋ قاجەتتىگى تۋرالى ايتىلعان. ساۋالدى «ۇلتتىق قۇندىلىقتاردى ساقتاۋ جانە نىعايتۋ – تاۋەلسىز مەملەكەتتىڭ جارقىن بولاشاعى» تاقىرىبى بويىنشا وتەتىن پارلامەنتتىك تىڭداۋعا دايىندىق اياسىندا نۇرلان ءابدىروۆ, التىنبەك نۇح ۇلى جانە باسقا دا بىرقاتار سەناتورلار دايىندادى.
