ونەر • 18 اقپان، 2021

بالادان باتىرعا دەيىنگى جول

«قازاقفيلم» كينوستۋدياسى كورەرمەندەرگە «تاۋتاي-لاق» اتتى قىسقا مەترلى ءفيلمىن كورسەتۋگە دايىندالۋدا. رەجيسسەر رايىمبەك ءالجانوۆتىڭ كينوجوباسى ۇلتتىق كينونى قولداۋ مەملەكەتتىك ورتالىعىنىڭ ەكىنشى پيتچينگىنىڭ جەڭىمپازى اتانعان.

ايا ءومىرتاي

ورتا عاسىرداعى جاۋگەرشىلىك كۇندەردىڭ بىرىنەن باستاۋ الاتىن وقيعادا مەرگەن ەسىمدى بالاعا باتىر اكەسىنىڭ جانىندا جوقتىعىن بىلدىرتپەي، ەرتە ەسەيىپ، تۋعان اۋىلى تاستاپ كەتكەن ءوز وتباسىن قورعاۋىنا تۋرا كەلەدى. ال مەرگەننىڭ باقسى اجەسى وعان ءوز كۇشىن تابىستايدى، بىراق قازاق جاۋىنگەر-حابارشىنىڭ حانعا اكەلگەن اقپاراتى وتباسىنا قاۋىپ توندىرەدى. رەجيسسەر رايىمبەك ءالجانوۆ ۇلتتىق فولكلور مەن قىزىقتى ۆيزۋالدى شەشىمدەر كارتينانىڭ ستسەناريىنىڭ نەگىزىندە جاتقان تەرەڭ ماعىنانى كەرەمەت تولىقتىرادى دەپ بىلەدى.

«شىندىعىندا، تاريحي دەكوراتسيالار – جاي عانا دەكوراتسيالار. مەن ونى قولدانباسام دا بولاتىن ەدى. بىراق وقيعانىڭ بارلىق مۇمكىندىگىن وسىلاي اشامىن دەگەن شەشىمگە كەلدىم. قازاق فولكلورىن ەنگىزگىم كەلدى. ماعان ءبىزدىڭ ەرتەگىلەر، تاريحىمىز وتە ۇنايدى. تاجىريبە جاساپ كورگىم كەلدى. رەجيسسەر رەتىندە، ءوزىمدى ىزدەۋ ۇستىندەمىن، ءوز جانرىمدى، ءوز كورەرمەنىمدى، وزىندىك جەتكىزۋ ءتاسىلىمدى تاپقىم كەلەدى. ستسەناريدى دە وسىعان قارايلاپ وتىرىپ جازدىم. ال بۇل جۇرەكتىڭ تۇبىنەن شىققان مەنىڭ وقيعام»، دەيدى رەجيسسەر.

«تاۋتاي-لاق» اۆتورلارىنىڭ ايتۋىنشا، ۇلتتىق كينونى قولداۋ مەملەكەتتىك ورتالىعىمەن ىنتىماقتاستىق ورناتۋدىڭ كورنەكىلىك تۇرعىسىنان ىقپالى زور بولعان. اتاپ ايتقاندا، كينو ورتالىعىنا كەلەسى پيتچينگتەردە دەبيۋتتىك كارتينالار ءۇشىن كەيبىر ەرەجەلەردى وزگەرتۋگە قاتىستى ۇسىنىس بار.

«اسىرەسە دەبيۋتانتتارعا جەكە نازار اۋدارعاندارىن قالار ەدىم، اتاپ ايتقاندا، تاريحي جانردا نەمەسە عىلىمي فانتاستيكا جانرىندا تۇسىرەتىن دەبيۋتانتتارعا. كوپتەگەن ءسات ەگجەي-تەگجەيلى زەرتتەۋدى قاجەت ەتەدى، بىراق يمپروۆيزاتسياعا از ۋاقىت بولعان كەزدە، ونى ىسكە اسىرۋ قيىن»، دەيدى رايىمبەك ءالجانوۆ.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز