ونىڭ ايتۋىنشا, بۇگىنگى تاڭدا قازاقستاندا گيدرومەتەورولوگيالىق مونيتورينگ 377 گيدرولوگيالىق بەكەتتە جۇرگىزىلۋدە.
«دۇنيەجۇزىلىك مەتەورولوگيالىق ۇيىمنىڭ ۇسىنىستارىنا سايكەس ەل اۋماعىنداعى باقىلاۋ جەلىسى بۇگىنگى جاعدايدان ۇلكەن بولۋى ءتيىس. وسىعان بايلانىستى ءبىز بەكەتتەر سانى بويىنشا كورسەتكىشتى 2025 جىلعا قاراي 550 بىرلىككە دەيىن جەتكىزۋ ءۇشىن كەشەندى شارالار قابىلداۋ جوسپارىن ازىرلەدىك», - دەپ اتاپ ءوتتى قازگيدرومەت باسشىسىنىڭ ورىنباسارى.
سونىمەن قاتار, سەرىك سايروۆ اعىمداعى جىلدىڭ 1 اقپانىنداعى جاعداي بويىنشا رەسپۋبليكا وزەندەرىنىڭ باسسەيندەرىندەگى گيدرومەتەورولوگيالىق جاعداي بويىنشا الدىن الا دەرەكتەردى دە اتاپ ءوتتى. وسىلايشا, ەلىمىزدىڭ بارلىق اۋماعىندا قار قورىنىڭ كولەمى كوپجىلدىق ورتاشا ماندەردەن از ەكەنى اتاپ ءوتىلدى.
«قازاقستاندا 8 وزەن سۋ شارۋاشىلىعى باسسەينى بار. ولاردىڭ ارقايسىسى بويىنشا ۇقساس جاعداي قالىپتاسادى – قار قورىنىڭ كولەمى نورمادان از الىندى. بۇل جاعدايلار الداعى جىلى كوپتەگەن وزەندەر ءۇشىن سۋ از بولاتىندىعىن كورسەتەدى. اسىرەسە الماتى, جامبىل, تۇركىستان, قىزىلوردا, اقتوبە, اتىراۋ جانە باتىس قازاقستان وبلىستارىندا» - دەدى سپيكەر.
سونىمەن قاتار, سەرىك سايروۆتىڭ ايتۋىنشا قازىرگى ۋاقىتتا گيدرولوگيالىق بولجاۋدىڭ قولدانىستاعى ادىستەرىن جەتىلدىرۋ بويىنشا شارالار قابىلدانۋدا.
«سۋ تاسقىنى كەزىندە وزەن رەجيمىن بولجاۋ ماڭىزدى جانە كۇردەلى مىندەت بولىپ تابىلادى. سوندىقتان ءبىز 2020 جىلى باسشىلىققا الاتىن قۇجاتتاردى, مىسالى گيدرولوگيالىق بولجامداردى جاساۋ ەرەجەلەرىن, قازاقستان وزەندەرىنىڭ كوكتەمگى سۋ تاسقىنى اعىنىن بولجاۋ جونىندەگى نۇسقاۋلىقتى, جازىق وزەندەردىڭ كوكتەمگى سۋ تاسقىنى اعىنىنىڭ كولەمىن بولجاۋ جونىندەگى ادىستەمەلىك جازبالاردى ازىرلەپ, جەتىلدىردىك. ازىرلەنگەن ادىستەمەلەر سۋ رەسۋرستارى سالاسىنداعى جەتەكشى عالىمدار مەن مامانداردىڭ وڭ پىكىرلەرىن الدى», - دەپ اتاپ ءوتتى ول.
قازگيدرومەت باقىلاۋ جەلىسىنىڭ دەرەكتەرىن پايدالانۋدان باسقا, كوكتەمگى سۋ تاسقىنى كەزەڭىندەگى اعىن كولەمدەرىن بولجاۋ ءۇشىن اۋا رايىنىڭ ورتاشا-شۇعىل بولجامدارىنىڭ ەۋروپالىق ورتالىعىنىڭ سپۋتنيكتىك دەرەكتەرى, swim جانە HBV-light ساندىق مودەلدەرى دە قولدانىلادى.
«2021-2022 جىلدارعا ارنالعان جوسپاردا – HBV 6.4 شۆەد مودەلىنىڭ جاڭا نۇسقاسىن قازاقستاننىڭ جاعدايىنا بەيىمدەۋ», - دەپ حابارلادى سەرىك سايروۆ.
قازگيدرومەت باسشىسىنىڭ ورىنباسارى ەلىمىزدىڭ شاعىن وزەندەرىنىڭ پروبلەمالارىن زەرتتەۋ ماسەلەسى بويىنشا كاسىپورىن قازىرگى جاعدايدى ەگجەي-تەگجەيلى زەرتتەۋ ءۇشىن جەم جانە ويىل شاعىن وزەندەرىنە ەكسپەديتسيالار جوسپارلاپ وتىرعانىن اتاپ ءوتتى.
«21 اقپاندا وقيعا ورنىندا العاشقى تەكسەرۋ جوسپارلانعان, سودان كەيىن اۋا-رايى جاقسارعان سوڭ, ەگجەي-تەگجەيلى تالداۋ جۇرگىزۋ ءۇشىن وسى وزەندەرگە تاعى ءبىر ەكسپەديتسيا ۇيىمداستىرىلادى. وسىنداي تاجىريبەنى ەلىمىزدىڭ باسقا دا شاعىن وزەندەرىندە جۇزەگە اسىرۋدى جوسپارلاپ وتىرمىز», - دەپ تۇيىندەدى ول.
