قوعام • 16 اقپان، 2021

جامبىل جاباەۆتىڭ 175 جىلدىعىنا وراي بىرقاتار ءىس-شارا وتەدى

242 رەت كورسەتىلدى

قازاق مەملەكەتتىك فيلارمونياسى جامبىل جاباەۆتىڭ 175 جىلدىعىنا وراي بىرقاتار ءىس-شارا وتكىزەدى، دەپ حابارلايدى   Egemen.kz.

ەلباسى نۇرسۇلتان نازارباەۆتىڭ: « ۇلى دالانىڭ جەتى قىرى» ماقالاسىنداعى « ۇلى ادامداردى ماقتان تۇتۋ كەرەك. ولاردىڭ ەسىمدەرى تاريحتا جوعالماۋى كەرەك، بۇگىنگى كۇننىڭ ماقتانىشى بولۋى كەرەك»، - دەگەن سوزدەرىنە سۇيەنە وتىرىپ، جامبىل اتىنداعى قازاق مەملەكەتتىك فيلارمونياسى ونەر سالاسىنداعى وتكەن جانە قازىرگى زاماننىڭ ۇلى قايراتكەرلەرىنىڭ بەينەلەرىن قالىپتاستىرۋعا جانە ولاردىڭ شىعارماشىلىعىن ۇلىقتاۋ ماقساتىندا جىر الىبى جامبىل جاباەۆتىڭ 175 جىلدىعىنا وراي بىرقاتار اۋقىمدى ءىس-شارالار جوباسىن ۇيىمداستىرۋدى جوسپارلاپ وتىر.

جامبىل جاباەۆتىڭ شىعارماشىلىعى ءبىزدىڭ ەلدە عانا ەمەس، سونىمەن قاتار، الىس-جاقىن شەتەلدەردە كەڭىنەن تانىمال. حالىق پوەزياسىنداعى جاڭا ورلەۋ ونىڭ ەسىمىمەن تىعىز بايلانىستى.

قازاق مەملەكەتتىك فيلارمونياسى وسى يگى باستاما نەگىزىندە:

• ءپاتريوتيزمدى، رۋحاني-ادامگەرشىلىك ۇيلەسىمدىلىكتى دامىتۋدى جانە جاڭا تەحنولوگيالاردىڭ كومەگىمەن جاستاردىڭ كوركەمدىك تالعامىن تاربيەلەۋدى، كاسىبي ءداستۇرلى مۋزىكا الەمىنە باۋلۋدى;

• الماتىداعى مادەني-اعارتۋ مەكەمەلەرى مەن ۇجىمدارىنىڭ ءوزارا اراقاتىناسىن جانە تاجىريبە الماسۋىن ۇيىمداستىرۋدى، كەلەشەكتە بىرلەسكەن شىعارماشىلىق جۇمىستار ىستەۋىنە ىقپال ەتۋدى;

• قازاقستاندىق جاس ونەر وكىلدەرىنىڭ قالىپتاسۋى مەن دامۋىنا ىقپال ەتۋدى، ولاردىڭ شىعارماشىلىق الەۋەتىن ءىس جۇزىندە ىسكە اسىرۋعا جاردەم بەرۋدى;

• قوعامنىڭ جامبىل جاباەۆتىڭ شىعارماشىلىعىنا دەگەن ىنتاسىن وياتىپ، قىزىعۋشىلىعىن ارتتىرۋدى، جىر الىبىنىڭ باعا جەتپەس ۇلتتىق مۇراسى ارقىلى حالىقتىڭ رۋحاني دەڭگەيىن دامىتۋدى;

• قازاقستاندىق ونەردىڭ جاس وكىلدەرى مەن ەڭبەك سىڭىرگەن قايراتكەرلەرىنىڭ قاتىسۋىمەن، ۇلى اقىننىڭ تۋىندىلارىن مۋزىكالىق-پوەتيكالىق جانە تەاترلاندىرىلعان ءىس-شارالار فورماتىندا ۇسىنۋدى كوزدەيدى.

 

اتالعان اۋقىمدى جوبا اياسىندا:

 

• 22-اقپان كۇنى ساعات 19.00-دە حالىقارالىق كونكۋرستاردىڭ لاۋرەاتى، ءانشى ءبىرجان ءبازىلجان مەن قر مادەنيەت قايراتكەرى، كۇيشى ەرجان الىمبەتوۆتىڭ ءداستۇرلى ونەر كەشى وتەدى.

• 5-18 ءساۋىر ارالىعىندا جامبىل اتىنداعى مەملەكەتتىك جاسوسپىرىمدەر كىتاپحاناسىنىڭ ۇيىتقىسىمەن جامبىلدىڭ ولەڭدەرىن مانەرلەپ وقۋدان جاسوسپىرىمدەر اراسىندا ونلاين-بايقاۋ جاريالانادى.

• 14-ءساۋىر كۇنى 19.00-دە ن.تىلەنديەۆ اتىنداعى اكادەميالىق فولكلورلى-ەتنوگرافيالىق «وتىرار سازى» وركەسترىنىڭ كونتسەرتى وتەدى.

• 28-مامىر كۇنى 19.00-دە ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ ستۋدەنتتەرىنىڭ، مانەرلەپ وقۋ سايىسىنىڭ جەڭىمپازدارىنىڭ جانە فيلارمونيانىڭ بەلدى سوليستەرىنىڭ قاتىسۋىمەن مۋزىكالىق جانە تەاترلاندىرىلعان قويىلىم وتەدى.

• سونىمەن قاتار، فيلارمونيا فويەسىندە «الماتى قالاسىنىڭ ورتالىقتاندىرىلعان كىتاپحانا جۇيەسى» جىر الىبىنىڭ شىعارماشىلىعىنا ارنالعان جىلجىمالى كورمەسىن كەش قوناقتارىنىڭ نازارىنا ۇسىنادى.

 

بايقاۋ تۋرالى تولىق اقپارات فيلارمونيانىڭ الەۋمەتتىك جەلىدەگى پاراقشاسىندا جاريالانادى.

سوڭعى جاڭالىقتار

بۇگىنگى ۆاليۋتا باعامى

قارجى • بۇگىن، 09:42

ۇقساس جاڭالىقتار