بارلىق ناۋقاستىڭ 16%-ى, ياعني 1 868 ادامنىڭ دەرتى بارى پروفيلاكتيكالىق زەرتتەۋ بارىسىندا انىقتالعان. ال 61%-ى, ياعني 7 004 ادامنىڭ ءوزى مەديتسينالىق كومەككە قايىرىلعاندا جامان ىندەتكە شالدىققانى انىقتالعان.
ىندەتتى ءالى دە كوزگە ىلمەۋشىلەر بار. وندايلار قوعامدىق جەرلەردە بەتپەردە تاعۋدى, كوپشىلىككە ارالاسقاننان كەيىن قولدارىن مۇقيات جۋدى ەلەمەيدى. سونىڭ كەسىرىنەن ناۋقاستار سانى ازايار ەمەس. سوڭعى مالىمەتكە قاراعاندا ءبىر تاۋلىكتە 69 ادامنىڭ بويىنان ىندەت شىققان. سونىڭ ىشىندە ەڭ كوبى – 23 ادام پەتروپاۆل قالاسىنان شىعىپ وتىر. اۋداندار اراسىندا ەسىل, ايىرتاۋ, م.جۇماباەۆ الدا كەلەدى. وندا تيىسىنشە 10,8 جانە 7 ادامنان ىندەت تابىلدى.
جامان تۇماۋ شىققاننان بەرى بۇل ىندەت بارلىق جاستاعى ادامدار اراسىنان تابىلدى. سونىڭ ىشىندە 50 مەن 59 جاس اراسىنان بارلىق ناۋقاستىڭ – 19%-ى, 2 172 ادامنان شىقتى. ەكىنشى ورىندا – جاس شاماسى 40 پەن 49 جاستاعىلار. بۇدان بارلىق ناۋقاستىڭ 13%-ى, ياعني 1 547 جاعداي تىركەلدى. جالپى, دەرتكە ەڭ كوپ ۇشىراعاندار – جۇمىس ىستەيتىن حالىق. بارلىق دەرتتىڭ 34%-ى وسىلاردىڭ بويىنان شىقتى. بۇل – 3 910 ادام دەگەن ءسوز.
سولتۇستىكتە دەرتتىڭ كوبەيۋىنە رەسەي فەدەراتسياسىمەن شەكارادا ورنالاسقاندىعىنىڭ دا اسەرى تيۋدە. بىلتىرعى قازان ايى مەن بيىلعى اقپان ايى ارالىعىندا وسى ەكى ەلدىڭ وبلىس اۋماعىنداعى شەكارالىق بەكەتتەرىنەن بارلىعى 63 058 ادام وتكەن. سونىڭ پتر زەرتتەۋىنىڭ انىقتاماسى بولعاندارى – 20 282 ادام. انىقتاماسى جوق رەسەيلىكتەر كەرى قايتارىلدى, قالعاندارىنىڭ ءبارى كارانتيندىك ستاتسيونارلارعا جاتقىزىلدى.
وبلىستا پتر-تەست جاسايتىن 4 زەرتحانا بار. وسى كۇنگە دەيىن وندا 260 مىڭداي ادامنىڭ قانى تەكسەرۋدەن ءوتتى. سونىڭ ىشىندە بيىل وتكەندەر سانى – 50 مىڭداي ادام. قاڭتار ايىنىڭ ورتاسىنا دەيىن بويىنان دەرت شىققان ادامدار سانى تاۋلىگىنە 100-110 ادام بولعان ەدى. ۆيرۋستىڭ دامۋىن تۇراقتاندىرۋ شارالارىنىڭ ناتيجەسىندە قازىر بۇل كورسەتكىش 65-70 ادامعا دەيىن ءتۇستى. 1 مىڭنان ارتىق ادام ۆيرۋسقا قارسى ۆاكتسينانىڭ ءبىرىنشى دوزاسىن ەكتىردى. ولار – مەديتسينا قىزمەتكەرلەرى, سانيتارلىق-ەپيدەميولوگيالىق قىزمەت ماماندارى. ازىرگە ەشكىمنىڭ اعزاسىندا جاعىمسىز رەاكتسيا بولعان جوق. اقپاننىڭ ەكىنشى جارتىسىندا قاراعاندىنىڭ فارماتسيالىق كەشەنىندە جاسالعان «سپۋتنيك V» ەكپەسىنىڭ ەكىنشى پارتياسى كەلمەكشى.
وسىعان بايلانىستى شەكتەۋ شارالارى دا بوساڭداتىلىپ, 13 اقپاننان باستاپ ساۋدا-ويىن-ساۋىق ورتالىقتارىنىڭ, ساۋدا ورىندارىنىڭ, تاماق ەمەس تاۋارلار ساتاتىن دۇكەندەردىڭ, باسسەيندەردىڭ جۇمىس ۋاقىتى ۇزارتىلدى. قوعامدىق كولىك, ترەناجەرلىك زالدار, سپورت نىساندارى ءوز جۇمىستارىن جالعاستىرۋدا.
سولتۇستىك قازاقستان وبلىسى
