سەناتورلار "قازاقستان رەسپۋبليكاسىنىڭ كەيبىر زاڭنامالىق اكتىلەرىنە نورماشىعارماشىلىقتى جەتىلدىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى" زاڭ جوباسىن قارايدى. زاڭ جوباسى زاڭداردىڭ ساپاسىن ارتتىرۋعا, نورما شىعارۋ پروتسەسىن تسيفرلاندىرۋعا جانە وعان جۇرتشىلىقتى كەڭىنەن تارتۋعا باعىتتالعان. ماسەلەن, زاڭ جوبالارىن ازىرلەۋدىڭ بارلىق ساتىلارىندا سۇيەمەلدەپ وتىراتىن "ە-زاڭناما" ەلەكتروندىق جۇيەسىن ەنگىزۋ جوسپارلانىپ وتىر.
سەناتورلار وتىرىستا سونىمەن قاتار «جەر قويناۋى جانە جەر قويناۋىن پايدالانۋ تۋرالى» قازاقستان رەسپۋبليكاسىنىڭ كودەكسىنە ۋران ءوندىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى"زاڭ جوباسىن دا تالقىعا سالاتىن بولدى. وسى قۇجاتقا سايكەس جەر قويناۋىن پايدالانۋشىلار جوبالاۋ قۇجاتتارىن دايىنداۋ كەزىندە ۋران ءوندىرۋدىڭ زارداپتارىن جويۋ جوباسىن دا ازىرلەۋى ءتيىس. ودان باسقا, ۋران كەن ورنى قورلارى كولەمىنىڭ ءوسۋى ارتقان جاعدايدا ءوڭىردىڭ الەۋمەتتىك-ەكونوميكالىق دامۋىنا قارجى بولۋگە دە مىندەتتى بولادى.
سەناتورلار وسى سەسسيادا وزدەرىنىڭ باستاماسى بويىنشا ازىرلەۋدى جوسپارلاعان 8 زاڭ جوباسىن دا تالقىلادى.
اتاپ ايتقاندا, دەپۋتاتتار "قازاقستان رەسپۋبليكاسىنىڭ سوت جۇيەسى مەن سۋديالارىنىڭ مارتەبەسى تۋرالى" كونستيتۋتسيالىق زاڭعا, اكىمشىلىك قۇقىق بۇزۋشىلىق تۋرالى كودەكسكە وزگەرىستەر مەن تولىقتىرۋلاردى جانە سوت جۇيەسىن جاڭعىرتۋ ماسەلەلەرى جونىندەگى باسقا دا زاڭنامالىق اكتىلەردى دايىنداۋعا نيەتتەنىپ وتىر. 1 شىلدەدەن باستاپ اكىمشىلىك راسىمدىك-پروتسەستىك كودەكستىڭ ەنگىزىلۋىنە بايلانىستى اكىمشىلىك ادىلەت جۇيەسىنىڭ تولىققاندى جۇمىس ىستەۋىن قامتاماسىز ەتۋ جانە مەملەكەتتىك ورگاندار قاتىساتىن سوت پروتسەستەرىندە ازاماتتاردىڭ كەپىلدىكتەرى مەن قۇقىقتارىن ارتتىرۋ وسى جۇمىستىڭ ناتيجەسى بولۋعا ءتيىس.
دەپۋتاتتاردىڭ باستاماسى بويىنشا ازىرلەنەتىن سالىق كودەكسىنە تۇزەتۋلەر بيزنەستىڭ جاڭا سۋبەكتىلەرىنە نەعۇرلىم قولايلى بيزنەس ورتا مەن ينۆەستيتسيالىق احۋالدى قالىپتاستىرۋعا كومەكتەسەتىن بولادى. "قازاقستان رەسپۋبليكاسىنداعى ادام قۇقىقتارى جونىندەگى ۋاكىل تۋرالى" زاڭعا وزگەرىستەر ومبۋدسمەن مارتەبەسىن زاڭنامالىق رەتتەۋدى كوزدەيدى. سەناتورلار "قازاقستان رەسپۋبليكاسىنىڭ كەيبىر زاڭنامالىق اكتىلەرىنە قۇرىلىس جانە تۇرعىن ءۇي-كوممۋنالدىق شارۋاشىلىق ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى" زاڭ جوباسىندا ساۋلەت جانە قالا قۇرىلىسى سالاسىنداعى مەملەكەتتىك باقىلاۋدىڭ تيىمدىلىگىن ارتتىرۋ, ەلدى مەكەندەردى سالۋدى جوسپارلاۋ جانە قۇرىلىس جوبالارىن ازىرلەۋ ساپاسىن ارتتىرۋ جونىندەگى جاڭا ەرەجەلەردى بەكىتۋدى جوسپارلاپ وتىر. سەناتورلار ازىرلەپ جاتقان "قازاقستان رەسپۋبليكاسىنىڭ كەيبىر زاڭنامالىق اكتىلەرىنە عىلىم ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى" زاڭ جوباسىنداعى وزگەرىستەر الەۋمەتتىك قاۋىپسىزدىكتى ارتتىرىپ, عالىمدارعا لايىقتى جاعداي جاسايتىن بولادى. ودان باسقا سەناتورلار "قازاقستان رەسپۋبليكاسىنىڭ كەيبىر زاڭنامالىق اكتىلەرىنە ورگانيكالىق ءونىم ءوندىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى" زاڭ جوباسىن ازىرلەيتىن بولدى. ول قۇجات ورگانيكالىق ءونىم ءوندىرىسىنىڭ ۇلعايا ءتۇسۋىن جانە ەكولوگيالىق تازا ءونىم ەكسپورتىن قامتاماسىز ەتۋ ءۇشىن ونى وندىرۋشىلەردى ەكونوميكالىق ىنتالاندىرۋعا باعىتتالعان.
سەناتورلار وتىرىس بارىسىندا اراسىندا ماجىلىستەن كەلىپ تۇسكەن بىرقاتار زاڭ جوبالارىن تۇراقتى كوميتەتتەرگە ءبولىپ بەردى.
