ارحەولوگتار تابىلعان زاتتار مەن تۇراقتاردىڭ تاس عاسىرى, قولا جانە ەرتە تەمىر ءداۋىرى, ورتا عاسىرعا جاتاتىنىن مالىمدەدى. بۇل ءوز كەزەگىندە وسى جەردى مەكەندەگەن ەجەلگى وركەنيەت ادامدارىنىڭ تۇرمىس-تىرشىلىگىن جاڭا قىرىنان زەرتتەۋگە جول اشادى دەپ حابارلايدى egemen.kz.
ويىل اۋدانىنىڭ اۋماعىندا, ويىل وزەنىنىڭ سول جاعالاۋىنداعى سامباي, شوپتىكول, اقشاتاۋ, كوپتوعاي قورىمدارىنا جۇرگىزىلگەن قازبا جۇمىستارى كەزىندە ب. ز. ءىى-ءىۇ عاسىرلارىنا جاتاتىن زاتتار تابىلعان. بۇل جەردەگى وبالاردان تابىلعان دۇنيەلەر مەن جەرلەۋ عۇرىپتارى وتە ۇقساس. سونىڭ ىشىندە جەرلەۋ عۇرپى مەن تابىلعان دۇنيەلەردىڭ ءار الۋاندىعى جاعىنان كوپتوعاي اۋىلىنان 25 شاقىرىم جەردەگى «شوپتىكول-ءى» قورىمى ەرەكشەلەنەدى. وسى قورىمنىڭ وڭتۇستىك-شىعىس بولىگىندەگى ەر ادام جەرلەنگەن وبادان شىرىگەن تەمىر سەمسەر سىنىعى, ات ابزەلدەرى تابىلسا, ال جانىنداعى ايەل جەرلەنگەن وبادان قىش ىدىستار, قولا اينا, تۇيرەۋىش, تىكپە ايىلباس شىقتى.
ال ىرعىز اۋدانىنىڭ شەڭبەرتال اۋىلى ماڭىنداعى اشىلىپ قالعان وبا تۋرالى 2018 جىلدىڭ جازىندا وسى اۋىلدىڭ تۇرعىنى سىدىق مولدابەكوۆ وبلىستىق تاريحي-ولكەتانۋ مۋزەيىنە حابارلاعان. ارحەولوگتار شەتىرعىز بەن ىرعىز وزەندەرىنىڭ قوسىلاتىن تۇسىنداعى وسى وبادان تابىلعان پىشاق سىنىعى, تاس, تەمىر قاشاۋلار, ايەل اشەكەيلەرى, قۇمىرالار ەجەلگى جانە قولا ءداۋىرى مەن ەرتە تەمىر عاسىرىنا ءتان تۇرمىستىق زاتتار دەگەن قورىتىندى جاسادى. ويىل وزەنىنىڭ سول جاعالاۋىندا, قاراتال اۋىلىنان 2 شاقىرىم جەردەگى قازدىارالدان دا ەجەلگى ادامدار تۇراعى تابىلدى.
كوبىنە وزەن ارنالارى جاعالاۋىنان تابىلعان دۇنيەلەر ەجەلگى ادامداردىڭ تۇرمىس-تىرشىلىگى, شارۋاشىلىعى مەن مادەنيەتى تۋرالى جاڭا قىرىنان زەرتتەۋگە جول اشادى دەيدى اقتوبە وبلىستىق تاريحي-ولكەتانۋ مۋزەيىنىڭ قىزمەتكەرلەرى. بيىل ارحەولوگتار ويىل, مارتوك, ايتەكە بي جانە بايعانين اۋداندارىندا زەرتتەۋ جۇمىستارىن جالعاستىرۋدى جوسپارلاپ وتىر.
