ۇلتتىق بانك اقشا-نەسيە ساياساتى دەپارتامەنتىنىڭ ديرەكتورى جاندوس شايماردانوۆتىڭ ايتۋىنشا, يندەكستىڭ تومەندەۋى كوبىنە ونەركاسىپتەگى كورسەتكىشتىڭ ازايۋىنا بايلانىستى بولدى. ول سالادا كورسەتكىش تومەندەۋ ايماعىنا ءوتىپ, 49,4-ءتى قۇراعان. (2020 جىلعى جەلتوقساندا – 50,3 بولعان). قىزمەت كورسەتۋ سەكتورىندا دا يندەكستىڭ 47,4-كە (2020 جىلعى جەلتوقساندا – 48,0) دەيىن تومەندەۋى بايقالادى. ال قۇرىلىستاعى ىسكەرلىك بەلسەندىلىك ءوسۋ ايماعىنا قايتا ورالىپ, 51,1-ءدى (2020 جىلعى جەلتوقساندا – 49,5) قۇرادى.
«وڭىرلەر بويىنشا قاڭتاردا ىسكەرلىك بەلسەندىلىكتىڭ نەعۇرلىم جوعارى دەڭگەيى قوستاناي (59,6) مەن سولتۇستىك قازاقستان (55,1) وبلىستارىندا, اناعۇرلىم تومەن دەڭگەيى جامبىل (43,1) مەن تۇركىستان (44,7) وبلىستارىندا بايقالدى. ناقتى سەكتور كاسىپورىندارى قاڭتاردا بيزنەس جۇرگىزۋدىڭ قازىرگى جاعدايىن جالپى تەرىس باعالادى: وڭ جانە تەرىس باعالاۋ اراسىنداعى جاۋاپتار بالانسى (–)2,6 شەگىندە قالدى. قازىرگى جاعدايدىڭ ناشارلاۋى, كوبىنە, سۇرانىس پەن سالىق جۇكتەمەسىنىڭ اسەرىنەن بولدى» دەيدى جاندوس شايماردانوۆ.
2021 جىلعى قاڭتاردا ساۋالناماعا 456 كاسىپورىن قاتىستى: قۇرىلىستا – 66, ونەركاسىپتە – 172, قىزمەت كورسەتۋدە – 218.
ىسكەرلىك بەلسەندىلىك يندەكسى ەكونوميكانىڭ ناقتى سەكتورىنداعى جاعدايدى سيپاتتايتىن وزىڭقى ينديكاتور بولىپ تابىلادى. بۇل ەكونوميكالىق ۇردىستەردىڭ ديناميكاسىن, بيزنەس-تسيكلدىڭ ماڭىزدى وزگەرىس كەزەڭدەرىن انىقتاۋعا جانە بولجاۋعا مۇمكىندىك بەرەدى. ىسكەرلىك بەلسەندىلىك يندەكسى قازاقستان ۇلتتىق بانكىنىڭ كاسىپورىندار اراسىندا اي سايىن وتكىزەتىن ساۋالنامالارىنىڭ ناتيجەلەرى بويىنشا دايىندالادى. ساۋالدار كاسىپورىنداردىڭ ەكونوميكالىق كورسەتكىشتەرى بويىنشا ورىن العان وزگەرىستەر مەن بولاشاقتاعى وزگەرىسىنە قاتىستى اقپاراتتاردى قامتيدى.
