تۋريزم تىعىرىققا تىرەلىپ تۇر

جاقىندا ۇلىبريتانيانىڭ كولىك ءمينيسترى گرانت شەپپس تۇرعىندارعا ەل ىشىندە نەمەسە شەتەلدە دەمالۋعا الدىن الا جوسپار قۇرماۋدى ەسكەرتكەن ەدى. ونىڭ بۇل پىكىرىن حالىق بىردەن ءىلىپ اكەتىپ, دۇرلىگە ءتۇستى. ءبىر جىل بويى ۆاكتسينا تابىلسا, ءبارى رەتكە كەلەدى دەگەن ويمەن وتىرعان ادامدارعا بۇل اۋىر تيگەن سەكىلدى. كىم دە بولسا جاعدايدىڭ تۇراقتالىپ, قالىپتى تىرلىككە تەزىرەك ورالۋدى ارماندايتىنى ءسوزسىز. ونىڭ ىشىندە ەركىن سايا­حاتتاپ, ەل ارالاۋ­دى اڭسايتىنى قانشاما. ەلدىڭ پرەمەر-ءمينيسترى بوريس دجونسون اي باسىندا جازعى دەمالىسقا دەيىن قاۋىپ سەيىلەدى دەگەن وپتيميستىك پىكىر ايتقانىمەن, قازىر قايتا سەنىمسىزدىك تانىتىپ وتىر. ۇلىبريتانيادا كورو­نا­ۆيرۋستىڭ جاڭا شتاممى پايدا بولىپ, ەلدەگى ەپيدەميالىق احۋال­دىڭ كۇرت وزگەردى. الەم ەلدەرى بري­تاندىقتاردى شەكارا­دان وتكىزۋگە ءۇزىلدى-كەسىلدى قارسى بول­عان-دى. جاع­داي جاقسارىپ, جاپپاي ۆاك­تسينا سالىنىپ جاتقانىمەن, قاۋىپ تو­لىعىمەن جويىلا قويمايدى. سول سەبەپتى ماماندار ەۋروپا مەن ۇلى­بري­تانياعا باعىت العان ساياحاتشىلاردان ءالى دە بولسا اسىقپاۋدى سۇرايدى.

ال تۋريستىك ۇيىمدار ءۇمىتىن ۇزەر ەمەس. ABTA تۋريستىك قاۋىمداستى­عى­­نىڭ وكىلى شون تيپتون احۋال بىر­­تىن­دەپ بولسىن جاقسارىپ كەلە جات­­­قانىن العا تارتادى. بۇل پىكىر­دىڭ نەگىزىندە حالىقتىڭ جاپپاي ۆاك­­­­تسينا الىپ جاتقانى تۇسىنىكتى. ويت­­كەنى ۇلىبريتانيا الەمدە الع­اش­قى­ل­ار­دىڭ ءبىرى بولىپ ۆاكتسيناعا رۇق­سات بەرىپ, تۇرعىندارعا ەكپە سالا باس­تادى. ەۋروپا وداعىنا مۇشە ەلدەر كەش تە بولسا وسى كوشكە قوسىلۋ­دى ماقسات ەتەدى. قانشاما داۋدان كە­يىن ەو مەملەكەتتەرى دە جازعا دە­يىن حالىقتىڭ باسىم كوپشىلىگىنە ۆاك­تسينا سالۋدى جوسپارلاپ وتىر. بۇل – سوڭعى جىلى تۋريزم سەكىلدى تۇ­را­لاپ قالعان سالالاردى قايتا دامى­تۋعا باعىتتالعان شارالاردىڭ ءبىرى. ەۋرو­پاعا دەمالىسقا شاقىراتىن تۇل­عا­لار دا ءدال وسى ۆاكتسيناعا سە­نىم ارتىپ وتىرعانى بەلگىلى. ماسەلەن, Ryanair اۋە كوم­پا­نياسىنىڭ باسشىسى وسى جازدا ۆاك­تسي­نالاۋدىڭ ارقاسىندا ەۋروپا جاعا­جايلارى دەمالۋشىلارعا تولى بولادى دەگەن بولجام جاسادى. اۋە تاسىمالى مۇمكىن بولماعاندىقتان, كومپانيا بىلتىر 1 ملرد ەۋرو تابىسىنان ايىرىلعان ەكەن. داعدارىستىڭ سالقىنى تيگەن اۆيا سالاسىنىڭ وكىلدەرى شەكارالاردىڭ قايتا اشىلىپ, ءتۋريزمنىڭ قالپىنا كەلۋىن ءدال وسى جاپپاي ۆاكتسينالاۋمەن باي­لانىس­­تىرىپ وتىر. ۇلىبريتانيا 50 جاس­تان اسقان ازاماتتارىنا ناۋرىزدىڭ سوڭىنا دەيىن, ال ەۋروپا ەلدەرى ماۋ­سىمعا دەيىن COVID-19-عا قارسى ۆاكتسينا سالۋدى كوزدەيدى.

ودان بولەك, وسىعان دەيىن تۋريزم سالاسىندا قىز­مەت ەتكەن كەيبىر كومپانيالار مەن ماماندار باعى­تىن وزگەرتىپ, قوناقۇيلەردىڭ اۋرۋحانالارعا اينا­لىپ كەتكەنى قانشاما؟! مۇنىڭ بارلىعى تۋريزم يندۋست­ريا­سىنىڭ الداعى جاز­داعى دايىندىعىنا اسەر ەتپەي قوي­ماس. دەسە دە تابىسىن وسى سالادان كورىپ وتىرعان مەملەكەتتەر تۋريست قابىل­داۋعا ساقاداي ساي بولۋدى, ال تۇرعىندار ەمىن-ەركىن ساياحاتتاۋدى اسىعا كۇتەدى.

تۇركيا سەكىلدى تابىسى كوبى­نە تۋريزم سالا­سىنان تۇسەتىن ەل­دەر­دە دەمالىس ەرتەرەك باس­تا­لىپ كەتتى. ىندەتتەن تايسالماعان جۇرت جاعا­­جاي­دا جاتىر. قازىر ەل ىشىندە ۆيرۋس جۇقتىر­عان­دار سانى تۇ­راق­تالعانىمەن, شەتەلدەردەن ناۋ­­­قاس­­تانىپ كەلىپ جاتقاندار بار. اۋست­راليا, جاڭا زەلان­ديادا جەرگى­لىكتى ناۋقاستار بىرنەشە كۇن قاتارى­نان انىقتالماي كەلەدى, ونىڭ ورنىنا شەتەلدەن كەلىپ كارانتينگە جابىلعان ازاماتتاردان ىندەت بەلگى­لەرى تابىلعانى حابارلاندى. بۇل ەلدەردەگى ەپيدەميالىق جاعداي تۇراقتالعانىمەن, شەكاراسىن اشىپ, دەمالۋشىلاردى قارسى الۋعا دا­يىن ەمەس. اۋستراليا ۇكىمەتى وسىعان دەيىن بيىل دا ەل شەكاراسى جارتىلاي جابىق بولاتىنىن حابارلاعان-دى.

بايقاعانىمىزداي, ۇكىمەتتەردىڭ تۋريزم سالاسىنا قاتىستى ۇستا­نىم­دارى ءارتۇرلى. تۇركيا, افريكا, مالديۆ ارالدارى سەكىلدى كليماتى جىلى تانىمال دەمالىس ورىندارى قازىردەن اشىق. ال ەۋروپا ەلدەرى جاپپاي ۆاكتسينا سالىنعاننان كەيىن, جاز ايلارىندا تۋريست قابىلداۋعا دا­يىن بولسا, اۋستراليا ىندەتتىڭ قاۋپى تولىعىمەن سەيىلمەي ساياحاتشىلارعا ەسىك اشپايتىن سەكىلدى.