2021 جىلعى 8 اقپاندا وزبەكستاننىڭ سىرتقى ىستەر ءمينيسترى ابدۋلازيز كاميلوۆپەن كەزدەسۋ بارىسىندا تاراپتار وزبەكستاننىڭ تۇركى كەڭەسىنە كىرۋى تۇركى الەمىنىڭ بىرلىگىن نىعايتىپ, ءوزارا ءتيىمدى سەرىكتەستىك ءۇشىن ماڭىزدى مۇمكىندىكتەر تەرەزەسىن اشقان تاريحي وقيعا ەكەنىن اتاپ ءوتتى. وزبەكستان ۇيىمعا كىرگەن ساتتەن باستاپ قىسقا مەرزىم ىشىندە پاندەميانىڭ تەرىس سالدارىنا قاراماستان, تۇركى كەڭەسى ايتارلىقتاي ناتيجەلەرگە قول جەتكىزدى.
مينيستر كاميلوۆ تۇركى كەڭەسى دوستاس ەلدەر مەن ستراتەگيالىق سەرىكتەستەردى بىرىكتىرە وتىرىپ, وزبەكستاننىڭ سىرتقى ساياساتىندا ەرەكشە ورىن الاتىندىعىن باسا ايتتى.
باس حاتشى مەن مينيستر ساياسي, ساۋدا-ەكونوميكالىق, ينۆەستيتسيالىق, مادەني-گۋمانيتارلىق, كولىك جانە لوگيستيكا, تۋريزم, جاستار جانە سپورت سالالارىنداعى كوپجوسپارلى ىنتىماقتاستىقتىڭ وزەكتى ماسەلەلەرىن تالقىلادى.
الداعى ماڭىزدى ءىس-شارالاردىڭ, سونىڭ ىشىندە مەملەكەت باسشىلارىنىڭ سامميتتەرىنىڭ, تاشكەنتتە جوسپارلانىپ وتىرعان تۋريزم مينيسترلەرىنىڭ التىنشى كەڭەسىنىڭ, جاستار جانە سپورت مينيسترلەرىنىڭ بەسىنشى كەڭەسىنىڭ, 2021 جىلى وزبەكستاندا وتەتىن جاس كاسىپكەرلەر فورۋمىنىڭ كۇن ءتارتىبى بويىنشا پىكىر الماستى.
ساۋدا-ەكونوميكالىق جانە ينۆەستيتسيالىق ىنتىماقتاستىقتىڭ ينستيتۋتسيونالدىق نەگىزدەرىنە, ونىڭ ىشىندە حاتشىلىقتىڭ ءتۇرلى ينۆەستيتسيالىق جوبالاردى ىسكە اسىرۋعا جاردەمدەسۋگە باعىتتالعان تۇركى كەڭەسىنىڭ بىرلەسكەن ينۆەستيتسيالىق قورىن قۇرۋ جونىندەگى كۇش-جىگەرىنە ەرەكشە نازار اۋداردى.
ب.امىرەەۆ پەن ا.كاميلوۆ تۇركى كەڭەسىنە مۇشە مەملەكەتتەر ىنتىماقتاستىعىنىڭ بولاشاق ستراتەگياسىنا توقتالىپ, تۇركى حالىقتارىنىڭ ەكونوميكالىق ءال-اۋقاتىن ارتتىرۋعا جانە بۇكىل تۇركى الەمىنىڭ ودان ءارى ينتەگراتسيالانۋىنا ىقپال ەتەتىن ءىس جۇزىندە ماڭىزدى باستامالار مەن ناقتى جوبالاردى ودان ءارى ىسكە اسىرۋدىڭ ماڭىزدىلىعىن اتاپ ءوتتى.
كەزدەسۋدە وزبەك تاۋارلارىنىڭ سىرتقى نارىقتارعا شىعۋى ءۇشىن قولايلى جاعداي جاساۋعا باعىتتالعان كولىك سالاسىنداعى سوڭعى قادامدار دا تالقىلاندى. تاراپتار وزبەكىستاننىڭ تۇركى الەمىنىڭ باسقا دا ىنتىماقتاستىق ۇيىمدارىنا مۇشە بولۋ ماسەلەسىن تالقىلادى. ا.كاميلوۆ وزبەك ەلىنىڭ تۇركسوي, حالىقارالىق تۋركى اكادەمياسىنا جانە تۋركى مەملەكەتتەرىنىڭ پارلامەنتتىك اسسامبلەياسىنا جاقىن ارادا رەسمي كىرەتىنىن حابارلادى.
امىرەەۆ مىرزا ۇلى تۇركى اقىنى جانە ويشىلى, كورنەكتى قوعام قايراتكەرى الىشەر ءناۋايدىڭ 580 جىلدىعىن مەرەكەلەۋگە وراي الىشەر ناۋاي اتىنداعى تۇركى كەڭەسىنىڭ "تۇركى الەمىنىڭ بىرلىگىنە قوسقان ۇلەسى ءۇشىن" حالىقارالىق سىيلىعىن ەنگىزۋ ماسەلەسىن ۇسىندى.
باس حاتشى مەن مينيستر سونداي-اق ۇيىمنىڭ اعىمداعى كۇن تارتىبىندە تۇرعان كەڭ اۋقىمدى ماسەلەلەر, سونداي-اق وزەكتى حالىقارالىق جانە وڭىرلىك تاقىرىپتار بويىنشا پىكىر الماستى.
2021 جىلعى 8 اقپاندا تاشكەنتتە تۇركى كەڭەسىنىڭ باس حاتشىسى باعداد امىرەەۆ وزبەكستان رەسپۋبليكاسى ولي ماجليس سەناتىنىڭ توراعاسى تانزيلا نارباەۆامەن كەزدەستى.
باس حاتشى مەن توراعا تۇركى كەڭەسى اياسىنداعى اعىمداعى قىزمەتتى تالقىلاپ, ۇيىمعا مۇشە مەملەكەتتەر اراسىنداعى ءتۇرلى سالالارداعى ىنتىماقتاستىقتى ودان ءارى دامىتۋ تۋرالى پىكىر الماستى.
ب.امىرەەۆ وزبەكستاننىڭ تۇركى كەڭەسىنە كىرۋى تۇركى الەمىنىڭ بىرلىگىن نىعايتۋداعى اسا ماڭىزدى قادام بولعانىن اتاپ ءوتتى.
توراعا نارباەۆا وزبەكستاننىڭ تۇركى كەڭەسىنە قاتىسۋى وزبەك ەلىنىڭ جانە تۇركى ەلدەرىنىڭ كوپعاسىرلىق ورتاق تاريحي تامىرى, مادەنيەتى, وزىندىك ەرەكشەلىگى مەن تىلىنەن تۋىندايتىن حالىقتاردىڭ تۇپكى مۇددەلەرىنە تولىق جاۋاپ بەرەتىنىن ايتتى.
ب.امىرەەۆ وزبەكستاندا جۇرگىزىلىپ جاتقان مەملەكەتتىك جانە الەۋمەتتىك قۇرىلىس, ىسكەرلىك ورتا مەن ينۆەستيتسيالىق احۋالدى جاقسارتۋ, تۇركى ەلدەرىمەن دوستىق پەن تاتۋ كورشىلىكتى نىعايتۋ سالاسىنداعى اۋقىمدى رەفورمالارعا جوعارى باعا بەردى.
تۇركى ەلدەرى اراسىنداعى پارلامەنتارالىق بايلانىستاردىڭ نىعايۋىنا سىلتەمە جاساي وتىرىپ, باس حاتشى امىرەەۆ وزبەكستان تاراپىنىڭ تۇركپا-عا كىرۋ تۋرالى شەشىمىن تولىق قولدايتىندىعىن ءبىلدىرىپ, قاجەتتى پروتسەدۋرالاردىڭ تەزىرەك اياقتالۋىن تىلەدى.
تاراپتار سونداي-اق ۇيىمنىڭ ماقساتتارىنا قول جەتكىزۋدەگى ايەلدەر مەن جاستاردىڭ ءرولىن كۇشەيتۋ جولدارىن تالقىلادى.
وزبەكستان رەسپۋبليكاسى پرەمەر-ءمينيسترىنىڭ ورىنباسارى – ينۆەستيتسيالار جانە سىرتقى ساۋدا ءمينيسترى ساردور ۋمۋرزاكوۆ مىرزامەن بەيرەسمي جۇمىس كەشكى اس كەزىندە پرەمەر-ءمينيستردىڭ ورىنباسارى باس حاتشىت ب.امىرەەۆكە ءىلتيپات ءبىلدىرىپ, ەكونوميكانىڭ ءتۇرلى سەكتورلارىنداعى, اتاپ ايتقاندا, ساۋدا, كولىك, ينۆەستيتسيالار, ەنەرگەتيكا جانە تۋريزمدەگى ىنتىماقتاستىقتى دامىتۋ ارقىلى تۇركى كەڭەسىنە مۇشە مەملەكەتتەر اراسىنداعى قاتىناستاردى نىعايتۋداعى تۇركى كەڭەسىنىڭ ءرولىن جوعارى باعالادى.
س.ۋمۋرزاكوۆ وزبەكستانعا قولداۋ ءبىلدىرىپ, تۇركى كەڭەسىنىڭ تيىمدىلىگىن ارتتىرۋعا باعىتتالعان ۋاقتىلى باستامالارعا, سونداي-اق ۇيىمدى ينستيتۋتسيونالدىق دامىتۋ مەن قۇرىلىمدىق رەفورمالاۋعا ءوز ۇلەسىن قوسۋعا ءازىر ەكەنىن جەتكىزدى.
باس حاتشى ۇيىمعا كىرگەن ساتتەن باستاپ وزبەكستاننىڭ تۇركى كەڭەسىنىڭ قىزمەتىنە بەلسەندى قاتىسۋى ۇيىم اياسىنداعى جان-جاقتى ىنتىماقتاستىقتىڭ كوكجيەگىن كەڭەيتىپ قانا قويماي, تۇركىتىلدەس مەملەكەتتەردىڭ بىرلەسكەن الەۋەتىن ايتارلىقتاي كەڭەيتكەنىن اتاپ ءوتتى.
باعداد امىرەەۆ ساردور ۋمۋرزاكوۆتى سوڭعى ءىس-شارالار مەن جوبالار تۋرالى, سونداي-اق جاقىندا قۇرىلعان تۇركى ساۋدا-ونەركاسىپ پالاتاسىن ء(تسوپ) قوسا العاندا, ساۋدا-ەكونوميكالىق جانە ينۆەستيتسيالىق ىنتىماقتاستىقتىڭ ينستيتۋتسيونالدىق نەگىزدەرى تۋرالى, حاتشىلىقتىڭ بىرلەسكەن ينۆەستيتسيالىق قوردى قۇرۋ بويىنشا قولعا العان كۇش-جىگەرى تۋرالى, سونداي-اق شاعىن جانە ورتا كاسىپكەرلىكتى (شوك) قولداۋعا جانە ءتۇرلى ينۆەستيتسيالىق جوبالاردى ىسكە اسىرۋعا جاردەمدەسۋگە باعىتتالعان تۇركى دامۋ بانكىن قۇرۋ تۋرالى حاباردار ەتتى.
سونداي-اق, تاراپتار تۇركى كەڭەسىنە مۇشە مەملەكەتتەر مەن باقىلاۋشى مەملەكەتتەردىڭ ترانزيتتىك الەۋەتىن ارتتىرۋعا باعىتتالعان بىرلەسكەن جوبالاردى ىسكە اسىرۋدى ەسكەرە وتىرىپ, كولىك-لوگيستيكا سالاسىنداعى ىنتىماقتاستىقتىڭ كەڭ مۇمكىندىكتەرىن اتاپ ءوتتى.
باسقوسۋدا قاجەتتى تاۋارلاردىڭ تاسىمالداۋىن جەڭىلدەتۋ ءۇشىن "جاسىل ءدالىز" قۇرىلۋ قاجەتتىگى, سونداي-اق ترانسكاسپي حالىقارالىق كولىك ءدالىزىنىڭ (ورتا ءدالىز) شىعىس-باتىس ساۋدا قوزعالىسىنداعى لوگيستيكالىق شىعىنداردى تومەندەتۋدەگى جانە تاسىمالداۋ جىلدامدىعىن ارتتىرۋدى كۇشەيتۋدىڭ ماڭىزدىلىعى باسا ايتىلدى.
ب.امىرەەۆ س.ۋمۋرزاكوۆتى ەۋروپالىق قايتا قۇرۋ جانە دامۋ بانكى (ەققدب) باسقارۋشىلار كەڭەسى توراعاسىنىڭ ورىنباسارى لاۋازىمىنا سايلانۋىمەن, سونداي-اق يسلام دامۋ بانكى توبىنىڭ باسقارۋشىلار كەڭەسىنىڭ توراعاسى بولىپ سايلانۋىمەن قۇتتىقتاپ,س. ومىرزاقوۆقا وچى جاڭا قىزمەتتەردە ۋلكەن تابىس تىلەپ,تۇركى كەڭەسىمەن تىعىز ىنتىماقتاستىققا ءۇمىت ءبىلدىردى.
تۇركى كەڭەسىنىڭ باس حاتشىسى باعداد امىرەەۆ وزبەكستاننىڭ مادەنيەت ءمينيسترى وزودبەك نازاربەكوۆپەن كەزدەسىپ سول كۇنى تاشكەنتتەگى تۇركىستان سارايىندا ۇلى تۇركى اقىنى جانە ويشىلى, كورنەكتى مەملەكەت قايراتكەرى الىشەر ءناۋايدىڭ تۋعانىنا 580 جىل تولۋىنا وراي وزبەكستاننىڭ مادەنيەت مينيسترلىگى ۇيىمداستىرعان ء"ناۋايدىڭ پوەزيا مەن اۋەن تۇندەرىنە" قاتىستى.
ءىس-شارا بارىسىندا وزبەكستاننىڭ مەملەكەتتىك كونسەرۆاتورياسى مەن "ماكوم" وزبەك ۇلتتىق ونەر ورتالىعى ۇزدىك مۋزىكالىق انسامبلدەرى مەن ۇجىمدارىنىڭ كونتسەرتتىك قويىلىمى ۇيىمداستىرىلدى.
باس حاتشى باعداد امىرەەۆ ماقام ونەرىن, اسىرەسە بۇحارا "شاشماك", حورەزمدىك "التى جارىم" ماقامى, دۋتار ماقامى, "فەرعانو-تاشكەنت" ماقامدارىن شىن قۋانىشپەن تاماشالاعانىن ايتىپ ولار عاسىرلار بويعى وزبەك ۇلتتىق ماقام ونەرىنىڭ بىرەگەي "التىن قورىن" قۇرايتىنىن تىلگە تيەك ەتتى.
باس حاتشى تۇركى كەڭەسىنىڭ كورنەكتى تۇركى قايراتكەرلەرىنىڭ الەمدىك وركەنيەتكە قوسقان ۇلەسىن ودان ءارى پاش ەتۋگە ات سالىساتىنىن ايتتى.
