جالپى بۇگىنگى كۇنى تالدىقورعاندا 178,5 مىڭ ادام تۇرادى. قالا اكىمى ع.ءابدىرايىموۆتىڭ ايتۋىنشا, وتكەن جىلدا ونەركاسىپ ءوندىرىسىنىڭ كولەمى 88,3 ملرد تەڭگە, قۇرىلىس مونتاج جۇمىستارىنىڭ كولەمى 40,9 ملرد تەڭگەگە جەتكەن. قالا ەكونوميكاسىنا 78,9 ملرد تەڭگە ينۆەستيتسيا تارتىلعان. بيىلعى جىلى ونەركاسىپتە قۇنى 6,0 ملرد تەڭگە بولاتىن جاڭا جوبالار ىسكە قوسىلماق. بۇل رەتتە پەكتين جانە قۇرعاق جەم شىعاراتىن "GreenTechnology Partners" جشس زاۋىتى, قۇراما جەم وندىرەتىن "استانا حالىق ەكسپو" جشس زاۋىتى, كەراموگرانيت وندىرۋمەن اينالىساتىن «الماز كەراميكس» جشس زاۋىتىنىڭ ءبىرىنشى جەلىسىنىڭ قۇرىلىس جۇمىستارى جۇرگىزىلەدى. ولاردا 300-دەي جاڭا جۇمىس ورنى اشىلادى دەپ كۇتىلۋدە. سول سياقتى "قاينار اكب" جشس ءوندىرىس ىرگەسىن كەڭەيتىپ, 1,8 ملرد تەڭگەگە جاڭا جەلى اشادى, وندا 35 ادام جۇمىسپەن قامتىلماق. ءسويتىپ ونەركاسىپ ءوندىرىسىنىڭ كولەمىن 94,0 ملرد تەڭگەگە جەتكىزۋ كوزدەلگەن.
بۇگىنگى كۇنى قالادا 16,8 مىڭ ادام تۇرعىن ءۇي كەزەگىندە تۇر. تالدىقورعاندىقتاردى باسپانامەن قامتۋ ماقساتىندا وتكەن جىلى بارلىق قارجى كوزدەرىنەن 137,5 مىڭ شارشى مەتر تۇرعىن ءۇي بەرىلسە, بيىلعى جىلى جالپى كولەمى 164 مىڭ شارشى م تۇرعىن ءۇي سالىنادى, سونىڭ 91,6 مىڭ شارشى مەترى بيۋدجەت ەسەبىنەن, 73,9 مىڭ شارشى مەترى قۇرىلىس كومپانيالارىنىڭ جەكە ينۆەستيتسياسى مەن جەكە تۇلعالاردىڭ قارجىسىنا سالىنادى. «سوندا ءبىز جىل سوڭىنا دەيىن 2,0 مىڭ وتباسىن, سونىڭ ىشىندەگى كەزەكتە تۇرعان 1142 ازاماتتى تۇرعىن ۇيمەن قامتۋعا مۇمكىندىك الامىز», دەدى ع. ءابدىرايىموۆ.
ونىڭ ايتۋىنشا, تالدىقورعانداعى 6, 7 جانە 8 شاعىن اۋدانداردا 33 كوپ قاباتتى ءۇيدىڭ قۇرىلىسى باستاۋعا دايىن, سول سياقتى كوتتەدج قالاشىعىندا 232 ءۇي جىل سوڭىنا دەيىن اياقتالادى. كوتتەجدى قالاشىقتا سپورت الاڭىنىڭ قۇرىلىسى اياقتالۋعا تاياۋ, وندا فۋتبول, ۆولەيبول, باسكەتبول الاڭدارى بار. بۇل قالاشىقتا مەكتەپ, بالاباقشا سياقتى الەۋمەتتىك نىساندارمەن قاتار تۇرمىستىق قىزمەت كورسەتۋ, ساۋدا ورتالىقتارى دا قاراستىرىلادى.
سول سياقتى بيىل اپاتتى ۇيلەردىڭ دە ماسەلەسى شەشىلەدى. وعان وبلىستىق بيۋدجەتتەن 855 ملن تەڭگە قاراستىرىلدى.
قالا ساياجايلارىنا دا كوڭىل ءبولىنىپ, ء"ۇيتاس" جانە "مەرەكەلىك" ساياجاي قوعامدارىنىڭ 6,7 مىڭ وتباسى اۋىزسۋ جانە ەلەكترمەن قامتاماسىز ەتىلۋدە. بۇل جۇمىس بيىلعى جىلى جالعاستىرىلىپ, قاراتال, المالى, كليۋچي ساياجايلارىندا جالپى 28,9 كم اۋىزسۋ جەلىلەرىن سالۋ جوسپارلانعان. 10 ساياجاي قوعامىنىڭ 30 كم باستى جولدارىنا كوشە جارىعىن ورناتۋدىڭ جوبالىق قۇجاتتاماسى ازىرلەنىپ جاتىر.
قالادا بۇگىنگى كۇنى تابيعي گازعا 24 595 ابونەنت قوسىلدى. قازىر ىنتىماق, جاستار-2, 3-ءشى بولىمشە ەلدى مەكەندەرىندە گاز تاراتۋ جەلىسىنىڭ قۇرىلىسىنا قاجەتتى جسق دايىن بولدى, قارجى بولىنگەن بەتتە قۇرىلىس جۇمىستارى باستالادى. بۇل وسى ەلدى مەكەندەردەگى 2241 وتباسىنىڭ گازعا قوسىلۋىنا مۇمكىندىك بەرەدى.
قالا اكىمى جول جوندەۋ, جولاۋشى تاسىمالى, اۋلالاردى اباتتاندىرۋ, «جۇمىسپەن قامتۋ جول كارتاسىنىڭ» ىسكە اسىرىلۋى, جۇمىسسىزدىقپەن كۇرەس, الەۋمەتتىك سالالاردى قولداۋ باعىتتارى تۋرالى دا كەڭىنەن ايتىپ بەردى.
باياندامادان كەيىن سۇراق قويۋعا كەزەك بەرىلدى. سۇراق قويعان قالا تۇرعىندارى تاراپىنان اۋلالاردى اباتتاندىرۋ, ساياجايعا باراتىن اۆتوبۋستاردى ساياجاي ىشىمەن جۇرگىزۋ, ىنتىماق اۋىلىندا كارىز جۇيەسىنىڭ قاشان ىسكە قوسىلاتىنى, № 6 مەكتەپتىڭ باستاۋىش سىنىبى بالاباقشا عيماراتىندا وقىپ جاتقاندىقتان, جاڭا عيمارات قاجەتتىگى, ىندەتپەن كۇرەستە كوز جۇمىعان مەديتسينا ماماندارىنا ارناپ ەسكەرتكىش قويۋ, جەر ۋچاسكەسى كەزەكپەن قاشان بەرىلە باستايتىنى, كاسىبىن باستاۋعا كومەك قاجەتتى سياقتى كوپتەگەن ماسەلەلەر كوتەرىلدى. قالا اكىمى سۇراقتارعا تولىققاندى جاۋاپ بەردى. ماسەلەن, № 6 مەكتەپتىڭ باستاۋىش سىنىبىنا ارناپ عيمارات سالۋ ءۇشىن سول ماڭداعى 60-قا جۋىق ءۇيدى ساتىپ الۋ قاجەت. سوسىن ونى ءسۇرۋ, رەكۋلتيۆاتسيا جاساۋ جۇمىستارى جۇرگىزىلۋدى ءتيىس. بۇل ماسەلە جوسپاردا بار, قارجىسى قاراستىرىلعان. «ال مەديتسينا ماماندارىنا ەسكەرتكىش قويۋ ماسەلەسىن كەڭەسىپ شەشەمىز», - دەدى ع. ءابدىرايىموۆ. ىنتىماق اۋىلىنا كارىز جۇيەسى بيىل تارتىلادى, جسق-سى بار. بيىلعى جىلدىڭ ناۋرىز ايىنان باستاپ ينجەنەرلىك ينفراقۇرىلىمى تارتىلعان دايىن جەر ۋچاسكەلەرى قاراتال اۋدانىنا شىعا بەرىس ماڭايدان كەزەكتە تۇرعان ازاماتتارعا بەرىلە باستايدى.
جيىن سوڭىندا ءسوز العان اماندىق باتالوۆ قالادا كوپ جۇمىستار اتقارىلىپ جاتقانىن ايتتى. دەگەنمەن قارقىن قوسۋدى, نازار اۋدارۋدى قاجەت ەتەتىن تۇستار دا از ەمەس.
- وتكەن جىلدا بىزدە وندىرىستە, اۋىل شارۋاشىلىعىندا, جالپى بارلىق سالادا ءوسىم بار. ىندەتتىڭ سالدارىنان تەك كولىك تاسىمالى مەن ساۋدا سالاسىندا عانا ازداعان ىركىلىستەر بولدى. ستۋدەنتتەر ءۇشىن ءۇش جاڭا جاتاقحانا سالىپ بەردىك. جۋىردا باسسەين اشىلادى. باسقا دا اتقارىلعان جۇمىستار كوپ, مەن ونى ءوز ەسەبىمدە تولىق ايتىپ بەرەمىن. قالانىڭ دامۋى تۋرالى ماسەلەگە كەلسەك, وبلىس ورتالىعىن كوركەيتۋگە ءبىز بارىنشا قولداۋ جاساپ وتىرمىز. كوپ شارۋالار اتقارىلدى. دەگەنمەن ارتىلعان مىندەتتەردى ورىنداۋدا سىلبىرلىق بار. «تالدىقورعان» يندۋستريالدى ايماعىنا ينۆەستورلار تارتۋمەن تۇبەگەيلى اينالىسۋ كەرەك دەگەندى ۇنەمى ايتىپ كەلەمىن. بارلىق ينفراقۇرىلىمى تارتىلعان, دايىن الاڭ, تەك بيزنەسمەندەرمەن سويلەسىپ, مۇمكىندىكتەرىن تانىستىرىپ, جۇمىس جاساۋ كەرەك. كوتتەدج قالاشىعىن, قالاداعى كوپ قاباتتى ۇيلەردىڭ اۋلالارىن اباتتاندىرۋدا دا باياۋسىڭدار. ناۋرىزدا قوعامدىق قاتىناسقا جاڭا اۆتوبۋستار اكەلىنەدى, ال وعان ارنالعان ازس-تىڭ قۇرىلىسى قاي دەڭگەيدە, ونى دا قاداعالامايسىڭدار. قار تازالاۋدا دا جۇمىستارىڭ تىندىرىمدى ەمەس, - دەپ بىرقاتار سالالار بويىنشا قالا اكىمدىگىنىڭ جۇمىسىن سىنعا الدى. اماندىق باتالوۆ تالدىقورعان اكىمدىگىنە جاساعان سىن-ەسكەرتپەلەرى نەگىزىندە ارنايى جوسپار-باعدارلاما ءتۇزىپ, ونىڭ ورىندالۋى بويىنشا ارنايى ەسەپ بەرۋلەرىن تاپسىردى. سول سياقتى ءتيىستى باسقارماعا كوتتەدج قالاشىعىندا تۋىنداپ وتىرعان گاز تولەمى ماسەلەسىن جىلدام ارادا شەشۋدى مىندەتتەدى.
«تالدىقورعان قالاسى – وبلىس ورتالىعى. مۇندا قالانى دامىتۋدىڭ ناقتى كونتسەپتسياسى, ايقىن جوسپارى بولۋى كەرەك. ءبىرىنشى كەزەكتەگى ماسەلەلەر, باسىمدىق بەرىلەتىن باعىتتار, باسقا, باسقا دا. سونىڭ ءبارىن ايقىنداپ, ايتىلعان ەسكەرتۋلەردى ەنگىزىپ, ناقتى باعدارلاما جاساپ, بەكىتىپ, ونىڭ ورىندالۋى جايلى ماعان باياندايتىن بولاسىڭدار», دەدى ا.باتالوۆ.
بۇدان كەيىن وبلىس اكىمى قالا تۇرعىندارى تاراپىنان وزىنە قويىلعان جىلىتۋ قازاندىقتارىن تابيعي گازعا كوشىرۋ, بالالارعا ارنالعان ساۋىقتىرۋ لاگەرىن اشۋ, «جاستار - 2» شاعىن اۋدانىنا گاز جانە كارىز جۇيەلەرىن تارتۋ سياقتى سۇراقتارعا ناقتى جاۋاپتار بەردى.
