«بيىل الۋان ءتۇرلى مادەني-تانىمدىق, وقىتۋ شارالارىن وتكىزۋ جوسپارلانعان. سونىڭ ىشىندە, كىتاپحانالار جۇيەسى مەن قىزمەتىنىڭ زاماناۋي ۇلگىلەرىن ۇيىمداستىرۋ ءىسى جولعا قويىلۋدا. بالالار مەن جاسوسپىرىمدەردىڭ كىتاپ وقۋىن قولداۋ جىلى اياسىندا وتەتىن شارالارمەن رەسپۋبليكانىڭ بارلىق ايماقتارى قامتىلادى. وقىرمانداردىڭ كىتاپ وقۋىنا بارىنشا جاعداي جاسالادى», - دەدى ۆيتسە-مينيستر.
مىسالى, الماتى قالاسىندا, ماڭعىستاۋ, شىعىس قازاقستان وبلىستارى اۋماعىندا جاڭا كوۆوركينگ ورتالىقتارىن اشۋ جوسپارلانعان. بۇل جاستاردى, بالالاردى, جاسوسپىرىمدەردى كىتاپحاناعا تارتۋ ماقساتىندا جاسالۋدا. مينيسترلىكتىڭ مالىمەتىنشە, بۇگىندە كوۆوركينگتاردىڭ جۇمىسى 2,5 ەسەگە ارتتى. ەلىمىزدە 401 كوۆوركينگ ورتالىقتارى جۇمىس ىستەۋدە.
بۇدان باسقا اعىمداعى جىلى ەلىمىزدىڭ استاناسى نۇر-سۇلتان قالاسىندا بالالار مەن جاسوسپىرىمدەرگە ارنالعان رەسپۋبليكالىق كىتاپحانانى اشۋ ماسەلەسى زاڭنامالىق جانە قارجىلىق تۇرعىدا پىسىقتالاتىن بولادى.
