سەناتورلار وتاندىق ءونىم ەكسپورتىن ىلگەرىلەتۋدى قامتاماسىز ەتۋ ءۇشىن ء«بىر تەرەزە» تەتىكتەرىن دامىتۋدىڭ ماڭىزىن اتاپ ءوتتى. جيىندا ەكسپورتتىق-يمپورتتىق وپەراتسيالاردى تسيفرلاندىرۋدىڭ قازىرگى جاعدايى تۋرالى دا ءسوز قوزعالدى.
ەنەرگەتيكا مينيسترلىگى قايتا وڭدەۋ سالاسىن دامىتۋعا مۇمكىندىك بەرەتىن مۇناي جانە گاز حيمياسىن دامىتۋدىڭ ۇلتتىق جوباسىن ازىرلەۋدى جوسپارلاپ وتىر. جوبا مۇناي-حيميا ونىمدەرىن شيكىزاتپەن قامتاماسىز ەتۋ, مۇناي-حيميا كلاستەرىن قۇرۋ, ودان ءارى وڭدەۋدى دامىتۋ ماسەلەلەرىن شەشۋگە جول اشادى.
پارلامەنتشىلەر اۋىلشارۋاشىلىعى ونىمدەرىن وڭدەيتىن كاسىپكەرلەردى الاڭداتىن وتىرعان ماسەلەلەردى دە كوتەردى. اۋىل شارۋاشىلىعى مينيسترلىگىنىڭ حابارلاۋىنشا, مۇنداي كاسىپورىنداردى قولداۋ ءۇشىن مەملەكەت ولاردىڭ قولدانىستاعى زاۋىتتاردى جاڭعىرتۋعا جانە جاڭالارىن سالۋعا باعىتتالعان ينۆەستيتسيالاردىڭ شىعىندارىن وتەيدى. سونىمەن قاتار, ولاردىڭ ءسۇت تاسىمالداۋشىلار, توڭازىتقىشتار جانە باسقالارىن ساتىپ الۋعا جۇمسايتىن شىعىندارىنىڭ 25%-نا دەيىن بيۋدجەتتەن سۋبسيديا بەرىلەدى.
سەناتورلار مەن ۇلتتىق ەكونوميكا, قارجى, ەنەرگەتيكا, سىرتقى ىستەر مينيسترلىكتەرىنىڭ, سونداي-اق ءبىلىم جانە عىلىم مينيسترلىكتەرىنىڭ وكىلدەرى كوپتەگەن سۇراقتارعا جاۋاپ بەردى.
كەزدەسۋ «قازاقستان رەسپۋبليكاسىنىڭ ونەركاسىپتىك ساياساتىن زاڭنامالىق رەتتەۋ: جاعدايى, ماسەلەلەرى جانە شەشىمدەرى» تاقىرىبى بويىنشا وتەتىن ۇكىمەت ساعاتىنا دايىندىق اياسىندا ءوتتى.
