القالى جيىن وتاندىق پەداگوگيكا عىلىمىنىڭ دامۋىنا ىرگەلى ۇلەس قوسقان كورنەكتى عالىم, ۇلاعاتتى ۇستاز, ەلىمىزدىڭ جوعارى ءبىلىم بەرۋ سالاسىندا ءوز قولتاڭباسىن قالىپتاستىرعان قايراتكەر كۇلاش قۇنانتاەۆانىڭ 90 جىلدىق مەرەيتويىنا وراي ۇيىمداستىرىلىپ وتىر.
پەداگوگيكا جانە پسيحولوگيا جوعارى مەكتەبى مۇرىندىق بولىپ وتىرعان شاراعا قازاقستاندىق جانە شەتەلدىك عالىمدار مەن پەداگوگيكالىق جوعارى وقۋ ورىندارىنىڭ وقىتۋشىلارى مەن ىزدەنۋشىلەرى قاتىسپاق.
زاماناۋي ءبىلىم بەرۋ كەڭىستىگىندەگى پەداگوگيكالىق يدەيالاردى تالداۋ جانە جۇيەلەۋ ماقساتىندا كونفەرەنتسيا جۇمىسى 5 باعىت بويىنشا جۇرگىزىلمەك. اتاپ ايتقاندا, قاتىسۋشىلار «زاماناۋي وقىتۋ مەن تاربيە بەرۋدىڭ تەوريالىق جانە ادىسنامالىق ماسەلەلەرى», ء«بىلىم بەرۋ, پەداگوگيكا جانە پسيحولوگيا ماسەلەلەرى: عىلىم مەن تاجىريبەنىڭ ينتەگراتسياسى», ء«بىلىم بەرۋدەگى زاماناۋي ترەندتەر», «جاھاندانۋ جاعدايىندا ءبىلىم بەرۋ جۇيەسىن باسقارۋ» جانە «كوپدەڭگەيلى پەداگوگ مامانداردى دايارلاۋدىڭ جۇيەسىن جەتىلدىرۋ» سەكتسيالارى بويىنشا ءوزارا تاجىريبە الماسپاق.
ايتا كەتەيىك, كۇلاش قۇنانتاەۆا – پەداگوگيكا عىلىمدارىنىڭ دوكتورى, پروفەسسور قازاقستان رەسپۋبليكاسىنىڭ ۇلتتىق عىلىم اكادەمياسىنىڭ جانە قر پەداگوگيكا عىلىم اكادەمياسىنىڭ قۇرمەتتى اكادەميگى, رەسەي ءبىلىم بەرۋ اكادەمياسىنىڭ شەتەلدىك مۇشەسى, گرۋزيا ءبىلىم بەرۋ عىلىمدارى اكادەمياسىنىڭ اكادەميگى, قازاقستاننىڭ ەڭبەك سىڭىرگەن قايراتكەرى, قازاقستان ءبىلىم بەرۋ ءىسىنىڭ قۇرمەتتى قىزمەتكەرى.
ونىڭ ايەلدەر ءبىلىمىنىڭ دامۋى جانە قازاقستاندا ءبىلىم بەرۋدى دامىتۋ تۋرالى 400-دەن اسا عىلىمي ەڭبەگى جارىق كوردى. ونىڭ ىشىندەگى وقۋ قۇرالدارى مەن وقۋلىقتار جانە مونوگرافيالار بار. كۇلاش قۇنانتاەۆانىڭ جەتەكشىلىگىمەن 24 عىلىم كانديداتى مەن دوكتورى دايىندالدى. قازىرگى كۇندە دە «قۇنانتاەۆانىڭ عىلىمي مەكتەبى» ساباقتاستىعى ساقتالعان.
كۇلاش قۇنانتاەۆا عىلىمي-پەداگوگيكالىق قىزمەتى, عىلىم مەن ءبىلىمدى دامىتۋداعى جانە كادر دايارلاۋداعى ەرەن ەڭبەگى ءۇشىن كوپتەگەن مەملەكەتتىك ناگرادالارمەن ماراپاتتالدى.
