«مەملەكەتتىك قىزمەت كورسەتۋ سالاسىندا 114 مىڭنان استام زاڭبۇزۋشىلىق انىقتالدى, ونىڭ ىشىندە ورتالىق مەملەكەتتىك ورگاندار زاڭناما تالاپتارىن ساقتاماۋدىڭ 87,5 مىڭ فاكتىسىنە, جەرگىلىكتى اتقارۋشى ورگاندار 26,5 مىڭ فاكتىسىنە جول بەرگەن», دەدى مەملەكەتتىك قىزمەت ىستەرى اگەنتتىگىنىڭ توراعاسى.
انىقتالعان دەرەكتەردىڭ 80,5 % (91,8 مىڭ فاكت) – قىزمەت الۋشىلاردان ارتىق قۇجاتتاردى تالاپ ەتۋ بولىپ شىققان.
«اگەنتتىكتىڭ ۇسىنىسى بويىنشا مەملەكەتتىك قىزمەت كورسەتەتىن نىسانداردا پروبلەمالىق ماسەلەلەردى انىقتاۋ جانە ولاردى ودان ءارى شەشۋ ءۇشىن قوعامنىڭ بەلسەندى وكىلدەرى ۆيزۋالدى تەكسەرۋ, قىزمەتتەردى الۋ كەزىندە مەملەكەتتىك ورگاندار مەن ۇيىمدارعا كەلۋشىلەرمەن سويلەسۋ ارقىلى قوعامدىق باقىلاۋ جۇرگىزەدى. 2020 جىلى ازاماتتىق قوعام وكىلدەرى مەملەكەتتىك قىزمەت كورسەتەتىن 300-دەن استام نىساندى تەكسەرىپ, 307 بۇزۋشىلىقتى انىقتادى جانە ولاردى جويۋ بويىنشا 287 ۇسىنىم ەنگىزدى. ورىندالعان ۇسىنىستاردىڭ قورىتىندىسى بويىنشا قوعام وكىلدەرى پوست باقىلاۋ جۇرگىزەدى. قوعامدىق باقىلاۋ بارىسى الەۋمەتتىك جەلىدە تىكەلەي ترانسلياتسيا ارقىلى بەرىلەدى», دەپ ءتۇسىندىردى انار جايىلعانوۆا.
