ءوسۋ قارقىنىن تومەندەتپەۋ ءۇشىن پاندەميا كەزەڭىندە جەكە بيزنەس سۋبەكتىلەرىن قولداۋ ماقساتىندا داعدارىسقا قارسى شارالار ازىرلەندى. اتاپ ايتقاندا «بيزنەستىڭ جول كارتاسى – 2025» كاسىپكەرلىكتى قولداۋ مەن دامىتۋدىڭ مەملەكەتتىك باعدارلاماسىنىڭ شارتتارىنا وزگەرىستەر ەنگىزىلگەن.
قالا اكىمى مۇرات ايتەنوۆتىڭ توراعالىمەن وتكەن ماجىلىستە كاسىپكەرلىكتى دامىتۋ جانە قولداۋ جونىندەگى مەملەكەتتىك باعدارلامالاردىڭ ورىندالۋى مەن ونداعى وزگەرىستەر بارىسى تالقىلاندى. جيىنعا ءۇشىنشى مەگاپوليس كاسىپكەرلەرى مەن ەكىنشى دەڭگەيلى بانك باسشىلارى دا قاتىستى.
كۇن تارتىبىنە سايكەس قالالىق كاسىپكەرلىك جانە يندۋستريالدى-يننوۆاتسيالىق دامۋ باسقارماسى باسشىسى بەرەكە دۇيسەبەكوۆ بايانداما جاسادى.
باسقارما باسشىسىنىڭ ايتۋىنشا, جاڭا شارتتار - كاسىپكەرلەر ءۇشىن نەسيە مولشەرلەمەسىن 6%-عا دەيىن تومەندەتۋگە, سۋبسيديالاۋعا جاتاتىن نەسيە كولەمىن 7 ملرد تەڭگەگە دەيىن ارتتىرۋعا مۇمكىندىك بەرگەن. سونىمەن بىرگە, باعدارلامانىڭ ءبىرىنشى باعىتى - كاسىپكەرلەرگە (ميكرو جانە شاعىن بيزنەس) سىياقى مولشەرلەمەسىنىڭ ءبىر بولىگىن پورتفەلدىك سۋبسيديالاۋ جانە كرەديتتەر مەن ميكروكرەديتتەر بويىنشا ءىشىنارا كەپىلدىك بەرۋ تۇرىندە قارجىلىق قولداۋ شارالارىن كورسەتۋ بولىپ وزگەرتىلگەن.
شىمكەنت قالاسىنىڭ اكىمى اتقارىلعان جۇمىستارعا باعا بەرىپ, كاسىپكەرلەردىڭ نەگىزگى ماسەلەلەرىن تىڭدادى.
«قالا بيۋدجەتىنىڭ كىرىس بولىگىن ۇلعايتۋدىڭ نەگىزگى جولى – جاپپاي كاسىپكەرلىكتى دامىتۋ. بۇل جاڭا جۇمىس ورىندارىن اشۋدى, سالىق تۇسىمدەرىن ۇلعايتۋدى جانە قوعامدىق, ساياسي احۋالدىڭ تۇراقتىلىعىن قامتاماسىز ەتەدى. مەملەكەت باسشىسىنىڭ تاپسىرماسىنا سايكەس, الداعى 5 جىلدىقتا شىمكەنت قالاسىندا شاعىن جانە ورتا كاسىپكەرلىكتىڭ جالپى ىشكى وڭىرلىك ونىمدەگى ۇلەسىن 50%-عا جەتكىزۋىمىز كەرەك. سول سەبەپتى, كاسىپكەرلىكتىڭ كەز كەلگەن وزەكتى پروبلەمالىق ماسەلەلەرىن شەشۋ جانە ونىڭ الدىن الۋ تىكەلەي ءوزىمنىڭ باقىلاۋىمدا بولادى. بارلىق دامىعان مەملەكەتتەر سياقتى شاعىن جانە ورتا بيزنەستى قالا ەكونوميكاسىنىڭ لوكوموتيۆىنە اينالدىرۋىمىز قاجەت», دەپ ءسوزىن تۇيىندەدى.
كەزدەسۋ سوڭىندا مۇرات ايتەنوۆ مەملەكەتتىك باعدارلامالاردى جۇزەگە اسىرۋدا بەلسەندىلىك تانىتقان بىرقاتار بانك باسشىلارى مەن «دامۋ» كاسىپكەرلىكتى دامىتۋ قورى» اق شىمكەنت قالاسى فيليالىنىڭ توراعاسىن ماراپاتتادى.
