«2019 جىلى 300 ادامنان قۇرالعان پرەزيدەنتتىك جاستار كادر رەزەرۆى قۇرىلدى. 2020 جىلى ولاردىڭ 57 % نەمەسە 171 رەزەرۆشى مەملەكەتتىك ورگاندار مەن كۆازيمەملەكەتتىك سەكتور كومپانيالارىنداعى ءتۇرلى پوزيتسيالارعا جۇمىسقا ورنالاستىرىلدى. باسقا رەزەرۆشىلەردى جوعارى باسقارۋشىلىق لاۋازىمدارعا تاعايىنداۋ ءۇشىن ولاردىڭ مانساپتىق ساتىلاردان ءوتۋى ارقىلى جۇمىس تاجىريبەسى مەن قۇزىرەتتەرىن ودان ءارى جەتىلدىرۋى قاجەت. وسىعان بايلانىستى ارنايى ازىرلەنگەن باعدارلامالار بويىنشا تۇراقتى وقىتۋدى كوزدەيتىن رەزەرۆشىلەردى دامىتۋدىڭ جەكە جوسپارلارى ازىرلەندى جانە بەكىتىلدى», دەدى ا.جايىلعانوۆا مەملەكەتتىك قىزمەت ىستەرى اگەنتتىگىنىڭ القا وتىرىسىندا.
بيىل دا مەملەكەت باسشىسى پرەزيدەنتتىك كادر رەزەرۆىنە كەزەكتى كونكۋرستىق ىرىكتەۋ جۇرگىزۋدى جانە وعان جاڭا كوزقاراستار مەن باستامالارى بار 50 كاسىبي مەنەدجەردى قابىلداۋدى تاپسىردى.
«قازىرگى ۋاقىتتا اگەنتتىك پرەزيدەنتتىڭ ءتيىستى جارلىعى جوباسىن دايىنداپ, ونى جاريا تالقىلاۋعا جانە مۇددەلى مەملەكەتتىك ورگاندارمەن كەلىسۋگە جولدادى. وسىلايشا, الدىڭعى ىرىكتەۋ تاجىريبەسىن ەسكەرە وتىرىپ, كانديداتتاردىڭ قۇندىلىق باعدارى بويىنشا تالاپتار تۇجىرىمدامالىق تۇرعىدان قايتا قارالدى. اتاپ ايتقاندا, رەزەرۆ قوعامدىق مۇددەلەرگە باسىمدىق بەرەتىن ادامدار اراسىنان قۇرالماق. رەكرۋتينگ وزگەرتۋلەر دە ناقتى تاجىريبەسى بار ترانسفورماتسيالىق كوشباسشىلاردى انىقتاۋعا باعىتتالعان. وسىعان بايلانىستى رەزەرۆ كريتەريلەرى قايتا قارالدى», دەدى ا.جايىلعانوۆا. جۇمىسقا ورنالاستىرۋدى قامتاماسىز ەتۋ ءۇشىن الەۋەتتى جۇمىس بەرۋشىلەر قاتارىنان ساراپتامالىق كوميسسيا قۇرىلادى.
