نارباي ەرگەبەكوۆ ءوز سوزىندە مەملەكەتتىك باعدارلامالاردىڭ ورىندالۋ جايىنا توقتالدى. ودان بولەك, قايتارىمسىز مەملەكەتتىك گرانتتار بەرۋ جونىندەگى وبلىستىق كونكۋرستىق كوميسسيانىڭ قاراۋىنا 44 جوبا جولدانعان. ناتيجەسىندە, اۋدانداعى ەكى كاسىپكەر اتالعان گرانتقا يە بولىپ, ءوز كاسىبىن باستاعان. سونداي-اق اۋداننىڭ ءتورت شاعىن نەسيە ۇيىمى ارقىلى 3491 ادام جالپى كولەمى 2,7 ميلليارد تەڭگەگە جۋىق نەسيەگە قول جەتكىزگەن. اۋدان اكىمىنىڭ ايتۋىنشا, اۋداننىڭ اگرارلىق سەكتورىندا دا ءوسۋ ءۇردىسى بايقالادى. ءبىلىم بەرۋ, دەنساۋلىق ساقتاۋ جانە مادەنيەت سالالارىندا دا وڭ كورسەتكىشتەر بار.
كەزدەسۋدە بىرقاتار اۋدان تۇرعىنى كوكەيدە جۇرگەن ماسەلەلەرىن كوتەردى. «مەن جۋالىدا كوپتەگەن ماسەلەلەر بار ەكەنىن بىلەمىن. سىزدەر ءوز سۇراقتارىڭىزدى اشىق قويا بەرىڭىزدەر, ءبىز ولاردىڭ شەشۋ جولدارىن قاراستىراتىن بولامىز», دەپ بەردىبەك ساپارباەۆ قاتىسۋشىلاردى اشىق ديالوگقا شاقىردى. «قازىرگى ۋاقىتتا جۋالى اۋدانى ءوز الەۋەتىن تولىق پايدالانىپ وتىرعان جوق. ينۆەستيتسيا تارتۋ كورسەتكىشى بويىنشا سوڭعى ورىننان كورىنۋى سونىڭ دالەلى. وتكەن جىلى كاسىپكەرلىك سالاسىنداعى جوبالارعا ەشقانداي سۇرانىس بولمادى. اۋىل شارۋاشىلىعى ونىمدەرىن وندىرۋگە قاتىستى كورسەتكىش تە اسا جوعارى ەمەس, ءوسىم تەك ءبىر پايىزدى عانا قۇرايدى. اۋداندا 500 كاسىپكەر تىركەلسە, ءىس جۇزىندە ونىڭ 16-سى عانا جۇمىس ىستەۋدە», دەدى وبلىس اكىمى. جۋالىلىقتار كوتەرگەن كەيبىر ماسەلەلەرگە بەردىبەك ساپارباەۆتىڭ ءوزى تۇسىنىكتەمە بەردى. ء«بىز الەۋمەتتىك جەلىلەردى قاداعالاپ, ءاربىر اۋدان بويىنشا مونيتورينگ جۇرگىزەمىز. جۋالى اۋدانىندا دەنساۋلىق ساقتاۋ مەن ءبىلىم بەرۋ سالاسىندا كوپتەگەن ماسەلەلەر كەزدەسەدى. تۇرعىنداردىڭ سۇراقتارىنا جاۋاپتار ءاردايىم ۋاقىتىلى بەرىلە بەرمەيدى, سوندىقتان نارازىلىق تۋىندايدى. سونىمەن قاتار پرەزيدەنتىمىز قاسىم-جومارت توقاەۆ «حالىق ۇنىنە قۇلاق اساتىن مەملەكەت» قاعيداسىنا ۇنەمى نازار اۋدارتىپ كەلەدى. ياعني, جەرگىلىكتى اتقارۋشى ورگاندار حالىقتىڭ بارلىق وتىنىشتەرىنە دەر كەزىندە جاۋاپ قايتارۋعا مىندەتتى. ايانباي جۇمىس ىستەڭىزدەر, حالىققا مەملەكەتتىك باعدارلامالاردىڭ مۇمكىندىكتەرىن ءتۇسىندىرىپ, قولداۋ شارالارى جانە سۋبسيديالار تۋرالى جەتكىزۋ قاجەت.
ەگەر شارۋالارعا جايىلىم جەتكىلىكسىز بولسا, بۇل ماقساتقا ورمان قورىنىڭ جەرلەرىن تارتۋ قاجەت, وسىلايشا ەگىس القاپتارىن دا ۇلعايتۋعا بولادى. تۇقىم ساپاسىن ارتتىرۋ, تىڭايتقىشتاردى قولدانۋ, زاماناۋي تەحنولوگيالاردى ەنگىزۋ جونىندەگى جۇمىستاردى جانداندىرۋ ماڭىزدى. بۇگىندە ءبىز شارۋالارعا سۋارمالى جەرلەردىڭ كولەمىن ارتتىرۋ ءۇشىن جاڭبىرلاتىپ سۋارۋ قوندىرعىلارىن ساتىپ الۋعا, ۇڭعىمالار سالۋعا كومەكتەسۋدەمىز. بۇدان باسقا, ۇساق شارۋاشىلىقتاردى ىرىلەندىرۋگە نازار اۋدارعان ابزال. بۇل ولارعا اۋىل شارۋاشىلىعى تەحنيكالارىن ساتىپ الۋعا مۇمكىندىك بەرەدى. ادامدارعا پايدا تاباتىن جولدى كورسەتە بىلگەن ءجون. ولاي بولماعان جاعدايدا اۋدان ەكونوميكاسى تومەن دەڭگەيدە قالا بەرەدى. ءبىز ءبىر كەزدەرى بۇكىل وداققا تانىمال بولعان جۋالىنىڭ كارتوپ ءوندىرىسىن قايتا ۇلعايتۋ مىندەتىن قويىپ وتىرمىز. سونداي-اق ءسۇتتى قايتا وڭدەۋگە كوڭىل ءبولۋ كەرەك», دەدى بەردىبەك ساپارباەۆ.
