اتالعان مۋزەي ديرەكتورىنىڭ ورىنباسارى داۋرەن ءجۇسىپوۆ كونە تاعامدار حالىق مۇراسى بولعاندىقتان, ەسكىدەن كەلە جاتقان رەتسەپتەر تۋرالى ماعلۇماتتاردى تەرەڭدەتۋدىڭ ماڭىزدى شارۋا ەكەنىن ايتادى.
– جوبا يدەياسىنا ءبىزدىڭ ەلوردالىق ارىپتەسىمىز, ۇلتتىق مۋزەي جانىنداعى «حالىق قازىناسى» عىلىمي-زەرتتەۋ ينستيتۋتىنىڭ ماتەريالدىق ەمەس مادەني مۇرا ءبولىمىنىڭ باسشىسى ايگەرىم مۇساعاجينوۆانىڭ ەڭبەگى يگى ىقپالىن تيگىزدى. ول ءوزىنىڭ عىلىمي ەڭبەكتەرىندە قازاق رەتسەپتەرىنىڭ 200-دەن استام ۇمىتىلعان ءتۇرىن جيناپ, ايماقتارعا, سونىڭ ىشىندە وساكاروۆ جانە قارقارالى اۋداندارىنا ەكسپەديتسيالار ۇيىمداستىردى, – دەيدى ول.
مۇراجاي قىزمەتكەرلەرى كونە رەتسەپت نەگىزىندە قازاقتىڭ ۇلتتىق تاعامىنىڭ ءبىرى ءاسىپتى ازىرلەۋدى جاڭعىرتتى. نەگىزىندە بۇل تاعامدى ازىرلەۋدىڭ بىرنەشە ءادىسى بار ەكەن جانە ول ايماقتاردا ءارتۇرلى اتالاتىن كورىنەدى. كەيبىر جەردە ونى شۇجىق دەپ تە اتايدى. ادەتتە بۇل تاعام قوي سويىلعان كۇنى دايىندالادى. الدىمەن مالدىڭ ىشەگى اينالدىرىلىپ, ول مۇقيات جۋىلىپ, تازارتىلادى. ەت پەن باۋىر ەت تارتقىشتان ءوتىپ, دامدەۋىشتەر قوسىلعاننان كەيىن, وعان تارتىلعان كۇرىش سالىنادى. سودان كەيىن از مولشەردە سۋ قۇيىلىپ, ءونىم مۇقيات ارالاستىرىلادى. دايىندالعان تاعام ىشەككە تولتىرىلادى دا, ەكى جاعىنان ءتۇيىلىپ بايلانادى. اۋا شىعارۋ ءۇشىن ءاسىپ بىرنەشە جەردەن ينەمەن تەسىلەدى ەكەن. سونان سوڭ ونى سۋ قۇيىلعان قازانعا سالىپ, 50-60 مينۋتتاي قايناتادى. داستارحان باسىندا ءاسىپتى جاپىراقتاپ تۋراپ, ىستىق نەمەسە سالقىنداتىلعان كۇيىندە بەرەدى.
تاريحي-ولكەتانۋ مۇراجايىنىڭ قىزمەتكەرى نارشا ەركىنقىزى ءار ايدىڭ سوڭىندا كونە رەتسەپت نەگىزىندە «تىرىلگەن» تاعامدار بويىنشا بەينە روليك ءتۇسىرۋدى جوسپارلاپ وتىرعاندارىن ايتادى. بۇدان بولەك, الداعى ناۋرىز مەيرامىندا «اتادان قالعان ادال اس» جوباسى اياسىندا مەرەكەلىك تاعامداردى تانىستىرۋ ءىس-شاراسى دا جوسپاردا بار ەكەن.
قاراعاندى وبلىسى
