– قوعامدىق جۇمىسقا تارتۋ تۇرىندەگى جازا سوت ۇكىمىمەن جەرگىلىكتى اتقارۋ ورگاندارى بەكىتكەن نىسانداردا جۇزەگە اسىرىلادى. ءبىزدىڭ ماقساتىمىز – سوتتالعانداردى قوعامدىق جۇمىسقا تارتۋ ارقىلى تاربيەلەپ, قىلمىستىڭ قايتالانۋىنا جول بەرمەۋ. ويتكەنى قوعامدىق جۇمىستىڭ تاربيەلىك ءمانى تيىمدىلىگىن دالەلدەدى. جازاسىن وتەۋشى ازاماتتار ەكىنشى رەت شالىس باسپاۋعا تىرىسادى, – دەيدى اتىراۋ وبلىسى بويىنشا قىلمىستىق-اتقارۋ جۇيەسى دەپارتامەنتىنىڭ باستىعى ماناربەك عابدۋللين.
دەپارتامەنت باستىعىنىڭ ايتۋىنشا, جاۋاپقا تارتىلعاندار كۇنىنە 4-8 ساعاتقا دەيىن جۇمىس ىستەيدى. الايدا ولارعا ەڭبەكاقى تولەنبەيدى. جازاعا تارتىلعانداردىڭ كوپشىلىگى – ەسىرتكىنى پايدالانعاندار, ماس كۇيىندە كولىك جۇرگىزگەندەر, ۇرلىق جاساعاندار. قازىر پروباتسيا قىزمەتىنىڭ ەسەبىندە 1200 سوتتالۋشى تۇر. سولاردىڭ ءبىرى – امان. قىلمىسى ءۇشىن وكىنگەنىمەن, قوعامدىق جۇمىستى اتقارۋدان قاشپايدى.
– قىلمىس جاساعانىم ءۇشىن ماعان شارتتى جازامەن قاتار, قوعامدىق جۇمىستى اتقارۋ مىندەتتەلدى. كوشە تازالاپ جۇرگەنىمە وكىنبەيمىن. كۇنىنە 4 ساعات اتىراۋ قالاسىنىڭ كوشەلەرىن قوقىستان تازارتامىن, – دەيدى جازاسىن وتەۋشى.
كوشە تازالىعىنا تارتىلعانداردىڭ اراسىندا بۇرىن براكونەرلىكپەن اينالىسىپ, ءىستى بولعاندار دا بار. وبلىستىق قىلمىستىق-اتقارۋ جۇيەسى دەپارتامەنتى پروباتسيا قىزمەتى ءبولىمىنىڭ ينسپەكتورى جارقىناي باقتياروۆا بەرگەن مالىمەتكە سۇيەنسەك, يساتاي اۋدانىنداعى جانباي اۋىلىنىڭ 14 تۇرعىنى قىلمىستىق كودەكستىڭ 339-بابىنىڭ 1-بولىگىمەن (وسiمدiكتەردىڭ نەمەسە جانۋارلاردىڭ سيرەك كەزدەسەتiن جانە قۇرىپ كەتۋ قاۋپi تونگەن, سونداي-اق پايدالانۋعا تىيىم سالىنعان تۇرلەرىمەن, ولاردىڭ بولىكتەرىمەن نەمەسە دەريۆاتتارىمەن زاڭسىز اينالىسۋ) سوتتالعان ەكەن.
– ءماجبۇرلى ەڭبەككە تارتۋدى جەرگىلىكتى اتقارۋشى ورگاندار ۇيىمداستىرادى. قازىر جانباي اۋىلىنىڭ 14 تۇرعىنى كۇنىنە 4 ساعات كوشە تازالايدى, – دەيدى ج.باقتياروۆا.
اتىراۋ وبلىسى
