ۇلى جىراۋدىڭ مەرەيتويىن اتاپ ءوتۋ اقپان ايىنان باستالاتىن بولدى. سونداي-اق, اعىمداعى جىلى اۋليەاتا توپىراعىندا اقيىق اقىن مۇقاعالي ماقاتاەۆ, كۇلاش احمەتوۆا, ايشا كوپجاساروۆا, مامبەت قويگەلديەۆ جانە نارشا قاشاعان ۇلى سياقتى بەلگىلى تۇلعالاردىڭ دا مەرەيتويلارى وتەدى دەپ جوسپارلانعان.
جامبىل وبلىستىق مادەنيەت, ارحيۆتەر جانە قۇجاتتاما باسقارماسى باسشىسىنىڭ مىندەتىن اتقارۋشى سارا ماديەۆانىڭ ايتۋىنشا, ماڭىزى زور مەرەيلى مەرەكەلەرگە وراي ارتىلار جاۋاپكەرشىلىك جۇگى دە جوعارى. ايتۋلى داتالاردىڭ قاتارىندا ەڭ باستىسى – ەل تاۋەلسىزدىگىنىڭ 30 جىلدىعىن جوعارى دەڭگەيدە اتاپ ءوتۋ بولىپ وتىر. وسىعان وراي ءىس-شارالار جوسپارىنا سايكەس دايىندىق دەڭگەيى پىسىقتالىپ جاتىر.
«جامبىل جاباەۆتىڭ 175 جىلدىق مەرەيتويىنا وراي, اقپاننىڭ 22-26 ارالىعىندا وتەتىن اپتالىق اياسىندا «جامبىل – ءدۇلدۇل, كەنەن – بۇلبۇل» اتتى مەرەكەلىك كونتسەرتىن وتكىزۋ, «جامبىلتانۋ» ورتالىعىندا «جىر ءدۇلد ۇلى – جامبىل» كورمەسىن اشۋ, جامبىلدىڭ شوبەرەسى مۇراتحان جامبىلوۆپەن كەزدەسۋ, «جامبىل – مەنىڭ جاي اتىم, حالىق – مەنىڭ شىن اتىم» اتتى رەسپۋبليكالىق اقىندار ايتىسىن ۇيىمداستىرۋ جوسپارلانعان.
سونىمەن قاتار, جىل ىشىندە اقىن شىعارمالارى مەن ءومىر جولى جەلىسىندە «وي-حوي, دۇنيە سەرۋەن, ادام ءبىر كوشكەن كەرۋەن» اتتى پوەتيكالىق-كومپوزيتسيالىق قويىلىمىن دايىنداپ كورسەتۋ, وزگە ۇلت وكىلدەرى اراسىندا جامبىلدىڭ ولەڭ, جىرلارىن مانەرلەپ جاتقا وقۋدان «جامبىل جىرلارى» بايقاۋىن وتكىزۋ جانە تاعى دا باسقا شارالار جوسپارلانىپ وتىر.
سونداي-اق جىل ىشىندە تاۋەلسىزدىگىمىزدىڭ 30 جىلدىعىنا وراي بىرقاتار اۋقىمدى جوبالار ىسكە اسىرىلادى», دەدى سارا ماديەۆا. سونىمەن قاتار, بيىل ۇلتتىق ونەرىمىزدى ناسيحاتتاۋ, جاس تالانتتاردى ىزدەستىرۋ, جاڭا ەسىمدەردىڭ تانىلۋىنا ىقپال ەتۋ ماقساتىندا «دومبىرانىڭ قوس ىشەگى» وبلىستىق ءداستۇرلى ونەر بايقاۋى, شىعارماشىل جاستاردىڭ «جاڭا ەسىم-2021» جوباسى, «ونەر كوزى – حالىقتا» حالىق شىعارماشىلىعى فەستيۆالى وتەدى. اتالعان شارالار اۋدانداردان باستاۋ الىپ, وبلىس كولەمىندە ۇيىمداستىرىلادى.
سونداي-اق سارا ماديەۆا اعىمداعى جىلى « ۇلى اتلاھ شايقاسى – وركەنيەتتەردىڭ بەتبۇرىسى» عىلىمي-پراكتيكالىق كونفەرەنتسياسى, «رۋحاني جاڭعىرۋ» باعدارلاماسى اياسىندا قازاق قىزدارىنىڭ اراسىندا ۇلتتىق قۇندىلىقتاردى كەڭىنەن ناسيحاتتاۋ ماقساتىندا «اۋليەاتا بۇرىمدىلارى» اتتى بايقاۋ وتەتىنىن دە ايتتى. كونە تاراز تاريحىنا قاتىستى جەرگىلىكتى ولكەتانۋشىلاردىڭ جيناقتاۋىمەن جاڭادان باسۋعا 50 كىتاپتىڭ جوباسى دايىندالعان.
ال, وبلىستىق كينو ورتالىعى ناۋرىز مەرەكەسىنە بايلانىستى اتاۋلى كۇندەرگە ارناپ «قۇسبەگى», «توعىزقۇمالاق», «ات ابزەلدەرى», «ەر تۇرماندار», «كوكپار» سياقتى قازاق حالقىنىڭ سالت-داستۇرلەرى مەن ۇلتتىق ويىندارىن دارىپتەيتىن جانە «تورتكۇل» كەرۋەن سارايى تۋرالى تاريحي دەرەكتى فيلمدەر ءتۇسىرۋدى جوسپارلاپ وتىر ەكەن. وبلىستىق تەاترلار 16 جاڭا قويىلىم ساحنالاۋدى جانە كارانتين شارالارى توقتاتىلعان جاعدايدا اۋداندارعا گاسترولدىك قويىلىمدار ۇيىمداستىرۋدى جوسپارلاعان.
