قىسقا مەرزىمدە ينفەكتسيالىق بولىمشەلەردىڭ, ونىڭ ىشىندە ينفەكتسيالىق ەمەس كلينيكالار بازاسىندا جۇمىس ۇيىمداستىرىلدى. ولاردا 250 توسەك-ورىنعا ارنالعان رەانيماتسيالىق بولىمشەلەر اشىلعان. ينفەكتسيالىق اۋرۋلار رەتىندە انىقتالعان ستاتسيونارلاردا رەانيماتسيالىق ناۋقاستارعا ارنالعان 100 توسەك بار. پاندەميانىڭ ورشىگەن كەزىندە وسى ستاتسيونارلاردىڭ رەانيماتسيالىق بولىمشەلەرىندە كۇن سايىن 160 اۋىر ناۋقاس بولدى – بۇل دارىگەرلەر مەن قالانىڭ دەنساۋلىق ساقتاۋ جۇيەسىنە ۇلكەن جۇكتەمە.
بۇرىن-سوڭدى بولماعان شارالاردىڭ اراسىندا – انەستەزيولوگيا جانە رەانيماتولوگيا ورتالىعىن قۇرۋ بولدى. ورتالىق اۋىر ناۋقاستاردى ءتيىمدى ەمدەۋ ءۇشىن بارلىق ستاتسيونارلاردىڭ جۇمىسىن ۇيلەستىرە باستادى. ورتالىقتىڭ قۇرامىنا وسى سالاداعى قالانىڭ ۇزدىك ماماندارى كىردى. ورتالىقتى «ا.ن.سىزعانوۆ اتىنداعى ۇلتتىق عىلىمي حيرۋرگيا ورتالىعى» اق رەانيماتولوگيا ءبولىمىنىڭ مەڭگەرۋشىسى تىلەۋبەردى قۋاندىقوۆ باسقارادى.
ورتالىقتىڭ باستى مىندەتى - كوروناۆيرۋستىق ينفەكتسياسى بار رەانيماتسيالىق ناۋقاستارعا قارقىندى تەراپيا جۇرگىزەتىن دارىگەرلەرگە كەڭەس بەرۋ, ادىستەمەلىك جانە پراكتيكالىق كومەك كورسەتۋ بولىپ تابىلادى.
وسى ورتالىقتىڭ ماماندارى كۇن سايىن ينفەكتسيالىق ستاتسيونارلارعا, گوسپيتالدارعا شىعادى جانە جەرگىلىكتى جەرلەردەگى رەانيماتولوگتارعا كومەك كورسەتەدى. تەك 2020 جىلدىڭ وزىندە ماماندار بريگاداسى 2 000-نان استام شاقىرتۋ بويىنشا قىزمەت كورسەتتى, اۋىر ناۋقاستاردىڭ 5 000-نان استام كونسۋلتاتسياسى, بەينەبايلانىس ارقىلى «وقيعا ورنىندا» 100-گە جۋىق كونسيليۋمداردى جۇزەگە اسىردى.
قالا اكىمىنىڭ ءباسپاسوز قىزمەتى تاراتقان اقپاراتقا سايكەس, جىل باسىنان بەرى ورتالىقتا كەلەسىدەي جۇمىستار جۇرگىزىلدى:
پراكتيكالىق كومەك كورسەتۋ ءۇشىن ماماندار توبىنىڭ كلينيكالارعا بارۋى - 533;
وقيعا ورنىندا كونسۋلتاتسيا جۇرگىزۋ - 2248;
ارالاۋ ناتيجەلەرى بويىنشا ورتالىق باسشىسىمەن ناۋقاستار جايلى بەينەبايلانىس رەجىمىندە تالقىلاۋ - 38;
ورتالىق باسشىسىمەن “وقيعا ورنىنا” بارۋ ارقىلى كونسيليۋمدار وتكىزۋ - 12;
پروفەسسورلارمەن قاشىقتىقتان ونلاين-كونسيليۋمدار وتكىزۋ - 23.
ورتالىقتىڭ جۇمىسى كۆي مەن پنەۆمونيادان بولاتىن ءولىمدى كۇرت تومەندەتۋگە مۇمكىندىك بەردى. بۇگىنگى تاڭدا ءولىم-ءجىتىم ەڭ تومەنگى دەڭگەيدە.
«ەگەر بۇرىن سالىستىرمالى تۇردە پنەۆمونيامەن اۋىراتىن «رەانيماتسيالىق» ناۋقاستاردىڭ كوبى جاستار بولسا, بۇگىندە كۆي-مەن رەانيماتسياعا تۇسەتىن ناۋقاستار - 60 جاستان اسقان جانە جۇرەك جەتكىلىكسىزدىگى, قانت ديابەتى, باۋىر تسيرروزى, ونكولوگيا, رەۆماتيزم, سپيد, بۇيرەك جەتكىلىكسىزدىگى, ينسۋلت جانە ت. ب. سوزىلمالى اۋرۋلارى قاتار جۇرەتىن ناۋقاستار. سونىمەن قاتار, پاتسيەنتتەردىڭ جارتىسىنان كوبى ءوزىن-ءوزى ەمدەۋمەن اينالىسىپ, ۇيدەن تىكەلەي اۋىر جاعدايدا كەلەدى. باسقالارى دارىگەرگە مۇلدە جۇگىنبەگەن», دەپ اتاپ ءوتتى ورتالىق ماماندارى.
وسىعان بايلانىستى مەديتسينا ماماندارى قالا تۇرعىندارىن كۆي جۇقتىرۋدان ساقتانۋ ءۇشىن كارانتيندىك نۇسقامالاردى ساقتاۋعا جانە ۆيرۋستىق ينفەكتسيا بەلگىلەرى پايدا بولعان جاعدايدا دەرەۋ بىلىكتى مەديتسينالىق كومەككە جۇگىنۋگە شاقىرادى.
قازاقستاندا كوروناۆيرۋستىق ينفەكتسيانىڭ 196 مىڭ جاعدايى تىركەلگەن, ونىڭ 2,5 مىڭنان استامى ولىممەن اياقتالعان. الماتىدا پاندەميا باستالعاننان بەرى COVID-19-دىڭ 22,8 مىڭنان استام جاعدايى تىركەلدى.
