قازاقستان • 07 اقپان، 2021

قازاقستاندا تۇرعىن ءۇيدى جالداۋ قۇنى ارزاندادى ما؟

تۇرعىن ءۇيدى جالعا الۋ قۇنىن انىقتايتىن الەمدىك رەيتينگتە قازاقستان 138 ەلدىڭ ىشىنەن 107-ورىن يەلەنگەن. رەيتينگ نيۋ-يورك يندەكسىنە (100) سۇيەنە وتىرىپ، ءار ەلدىڭ جالعا الۋ قۇنى قانشالىقتى قىمبات نەمەسە ارزان ەكەنىن زەردەلەپ كورگەن.

اباي قازبەك ۇلى

ەگەر ەل يندەكسى 110 بولىپ كەتسە وندا جالداۋ قۇنى نيۋ-يورككە قاراعاندا 10 پايىزعا قىمبات، ەگەر يندەكسى 95 بولسا، جالداۋ قۇنى امەريكالىق مەگاپوليسكە قاراعاندا 5 پايىزعا ارزان دەگەن ءسوز. بۇل ورايدا قازاقستاننىڭ يندەكسى 9،31-ءدى قۇرايدى.

جالعا الۋ قۇنى ەڭ قىمبات ەلدەر – بەرمۋد ارالدارى (92،86)، گونكونگ (74،24) جانە سينگاپۋر (64،77). رەيتينگ دەرەگى بويىنشا الەمدەگى ەڭ ارزان جالداۋ قۇنى اۋعانستاندا تىركەلگەن.

2020 جىلدىڭ جەلتوقسان ايىنداعى كورسەتكىش بويىنشا قازاقستانداعى جاعدايى كەلىسكەن تۇرعىن ءۇيدى جالداۋ قۇنى شارشى مەترىنە 1،6 مىڭ تەڭگەنى قۇراعان. بۇل 2019 جىلمەن سالىستىرعاندا 9،3 پايىزعا جوعارى. قاراشا ايىمەن سالىستىرعاندا باعا 1،2 پايىزعا ءوسىپتى. وڭىرلەر بويىنشا ەڭ قىمبات باعا نۇر-سۇلتان (2،9 مىڭ تەڭگە)، الماتى (2،3 مىڭ تەڭگە)، اقتاۋ (2 مىڭ تەڭگە) قالالارىندا تىركەلسە، ەڭ ارزان باعا سەمەيدە – شارشى مەترىنە 1،2 مىڭ تەڭگە.

Krisha.kz دەرەگى بويىنشا الماتى قالاسىنداعى ارەندا قۇنى شارشى مەترىنە 2500 – 2700 تەڭگە ارالىعىندا وزگەرىپ وتىرادى. ارنايى مونيتورينگتە اۋماعى 36-دەن 90 شارشى مەترگە دەيىنگى پاتەرلەر قاراستىرىلعان. ورنالاسقان اۋدانىنا بايلانىستى ءبىر بولمەلى پاتەر ارەنداسىنىڭ ورتاشا قۇنى 76 000 – 140 000 تەڭگە ارالىعىندا بولسا، ەكى بولمەلى پاتەردى جالداۋ ءۇشىن 105 000 – 195 000 تەڭگە ارالىعىندا قاراجاتىڭ بولۋى شارت. ال ءۇش بولمەلى ۇيلەر 118 مىڭنان 225 مىڭعا دەيىن شارىقتايدى. اناليتيكتەردىڭ ايتۋىنشا، ءبىر جىل ىشىندە قۇن 7-10 پايىز ارالىعىندا قىمباتتاپ وتىر. ەڭ ارزان باسپانالار تۇركسىب، ناۋرىزباي اۋداندارىندا ورنالاسسا، بوستاندىق، المالى، مەدەۋ – شاھاردىڭ قىمبات اۋداندارى سانالادى.