ەلوردانىڭ 4 تۇرعىنى پوليتسياعا بانك كارتاسىنان اقشا ۇرلانعاندىعىن ايتىپ شاعىمدانعان. وسى ىسكە قاتىستى قر قىلمىستىق كودەكسىنىڭ 188-بابى بويىنشا سوتقا دەيىنگى تەرگەۋ امالدارى جۇرگىزىلىپ جاتىر.
زارداپ شەگۋشىلەر 2020 جىلى بانككە نەسيە الۋعا بارعان. ءارتۇرلى سەبەپپەن ولارعا نەسيە بەرىلمەگەن. ولار بۇل ماسەلەنى ينتەرنەت ارقىلى شەشپەك بولىپ, الاياققا تاپ بولادى. سايتتاردا ولارعا جەكە مالىمەتتەرى تۋرالى انكەتا تولتىرۋ جانە جسن, بانك كارتاسى نومەرى مەن CVV-كودىن كورسەتۋ ۇسىنىلعان.
ساۋالداما تولتىرعان زارداپ شەگۋشىلەر ول سايتتىڭ نەسيە بەرۋگە ەش قاتىسى جوق ەكەنىن بىلمەگەن. جەكە تۇلعا تۋرالى مالىمەتتەر قولىنا تۇسكەن الاياق بانك كارتاسىنان ينتەرنەت ارقىلى اقشا شەشىپ العان. جەدەل-ىزدەستىرۋ جۇمىستارى جۇرگىزىلىپ, بۇرىن وسىنداي قىلمىس جاساعان 24 جاستاعى نۇر-سۇلتان قالاسىنىڭ تۇرعىنى ۇستالدى.
پوليتسيا دەپارتامەنتى جەكە باس مالىمەتتەرىن ەشكىمگە بەرۋگە بولمايتىنى تۋرالى ايتتى. بانك قىزمەتتەرى ەشقاشان بانك كارتاسىنىڭ ءنومىرى مەن ءپارولىن سۇرامايتىنىن ەستە ۇستاڭىزدار. وسىنداي جاعداي ورىن العاندا الدىمەن بانككە حابارلاسىپ, كارتانى بلوكتاۋ كەرەك. ودان كەيىن دەرەۋ پوليتسياعا حابارلاسۋ قاجەت.
