«الماتىنى دامىتۋ – 2025» باعدارلاماسى اياسىندا قالانىڭ «جاسىل جەلىسىن» قۇرۋ مىندەتى قويىلعان بولاتىن.
ەندىگى كەزەكتە الماتىدا جاسىل جەلەكتەردىڭ مالىمەتتەر بازاسى قۇرىلادى. بيىلعى جىلى الماتىدا 300 مىڭنان استام اعاش ەگۋدى جوسپارلاپ وتىرمىز, دەپ اتاپ ءوتتى ن.ليۆينسكايا.
سپيكەردىڭ ايتۋىنشا, جاسىل جەلەكتەردى وتىرعىزۋدىڭ نەگىزگى ۇلەسى جاڭا قوسىلعان اۋدانداردا - الاتاۋ جانە ناۋرىزباي اۋداندارىندا جوسپارلانعان. بۇل «جاڭا الماتى» جانە «شەتسىز قالا» باعدارلامالارى اياسىندا جۇزەگە اسىرىلاتىن بولادى.
«مەملەكەت باسشىسىنىڭ اۋقىمدى تۇردە كوگالداندىرۋ جونىندەگى تاپسىرماسى جانە الماتى اكىمىنىڭ تاپسىرماسى بويىنشا باۋ-باقشا قالاسى مەن ميلليون اعاش مارتەبەسىن قالپىنا كەلتىرۋ بويىنشا 2020 جىلى رەكوردتىق كورسەتكىش - 280 مىڭنان استام اعاش وتىرعىزىلدى. سالىستىرۋ ءۇشىن: الدىڭعى جىلدارى ورتاشا ەسەپپەن 40 مىڭ اعاش ەگىلدى. ەڭ كوپ اعاش الاتاۋ, تۇركسىب جانە ناۋرىزباي اۋداندارىندا وتىرعىزىلدى», - دەپ اتاپ ءوتتى ن. ليۆينسكايا.
سونىمەن قاتار, الماتى قالاسىن 2030 جىلعا دەيىن كوگالداندىرۋ ستراتەگياسىن ازىرلەۋ اياقتالۋدا. جاڭا جاسىل ايماقتار ءۇشىن ورىندار انىقتالدى, ەسكى جانە اپاتتى اعاشتاردى كەسۋ جانە اۋا باسسەينىنىڭ لاستانۋىنا ءتوزىمدى اعاشتار مەن بۇتالاردى وتىرعىزۋ ارقىلى جاسىل قوردى جاڭارتۋ بويىنشا ءىس-شارالار ازىرلەندى. قالا اۋماعىنىڭ ايماقتىلىعىن ەسكەرە وتىرىپ, جاسىل جەلەكتەر ءتىزىمى بەكىتىلدى.
«الماتىنى دامىتۋ – 2025» باعدارلاماسى اياسىندا قالالىق ەكوجۇيەنى بىرىكتىرەتىن جانە بيوارتۇرلىلىكتى قولدايتىن قالانىڭ «جاسىل جەلىسىن» قۇرۋ مىندەتى قويىلدى.
«2020 جىلى الماتى تۇرعىندارىنا كوشەتتەردى تەگىن تاراتۋ بويىنشا اكتسيا ىسكە قوسىلدى. ءبىزدىڭ ماماندار الماتىلىقتارعا 580-نەن استام جاپىراقتى اعاش كوشەتتەرىن جەتكىزدى. وسى جىلدىڭ كوكتەمىندە وسى اكتسيانى جالعاستىرۋدى جوسپارلاپ وتىرمىز. 2021 جىلى قالا بويىنشا 300 مىڭنان استام اعاش وتىرعىزۋدى جوسپارلاپ وتىرمىز. ءۇش جىل ىشىندە 1 ميلليون جاسىل جەلەك وتىرعىزىلادى. وسىلايشا, ءبىز الماتىنى باۋ-باقشا قالاسى مارتەبەسىنە قايتارعىمىز كەلەدى», - دەپ مالىمدەدى باسقارما باسشىسى.
اكىمدىك سونداي-اق جاسىل جەلەكتەردى پاسپورتتاۋدى جۇرگىزۋدە. ناتيجەسىندە اعاشتار, قىلقان جاپىراقتى اعاشتار, بۇتالار مەن گۇلدەر تۋرالى ۇلكەن مالىمەتتەر بازاسى قۇرىلادى. وندا جاسىل جەلەكتەردىڭ جاسى, ديامەترى, جاعدايى تۋرالى اقپارات بولادى. باسقارمادا اتاپ وتكەندەي, ءتىزىلىم وسى جىلدىڭ ناۋرىز ايىندا ۇسىنىلادى.
«جاڭا الماتى» اۋداندارىندا ساياباق ايماقتارى مەن قوعامدىق كەڭىستىكتەر قۇرۋعا ەرەكشە كوڭىل بولىنەدى. ماسەلەن, زەردەلى شاعىن اۋدانىندا جانە بورالداي وزەنىنىڭ بويىندا اعاشتار وتىرعىزىلدى, بۇل ۋچاسكەلەردە ساياباقتار قۇرىلۋدا. وجەت پەن الاتاۋ شاعىن اۋداندارىنداعى توعاننىڭ بويىندا تاعى ەكى ساياباق اۋماعى جوسپارلانعان.
«وتكەن جىلى ءبىز اكىمدىكتىڭ اۋقىمدى جوبالارىنىڭ ءبىرى – الماتى قالاسىنىڭ تۇركسىب اۋدانىندا «جەلتوقسان» ساياباعىن اشتىق. ونىڭ اۋدانى-55 گا. رەكرەاتسيالىق ايماققا اۋەجاي كولىنىڭ جاعالاۋى مەن ساياباق اۋماقتارى كىرەدى. مۇندا ءبىز 100 قىلقان جاپىراقتى وتىرعىزدىق. سونداي - اق, اۋەجاي كولىنىڭ جانىنداعى ماياك توعايىن اباتتاندىرۋ مەن كوگالداندىرۋعا جسق ازىرلەۋ جوسپارلانعان», - دەپ ءبولىستى ن. ليۆينسكايا.
"دوستىق" جانە "قاراسۋ"ساياباقتارىن سالۋ جانە قايتا جاڭارتۋ اياقتالۋعا جاقىن. باسقارمادا اتاپ وتكەندەي, ەكى جوبا دا جەرگىلىكتى تۇرعىندارمەن بىرلەسىپ جاسالعان.
