1975-1983 جىلدارى ارالىعىندا سالىنعان, الماتىنىڭ سيمۆولى ىسپەتتەس تەلەمۇنارا بيىكتىگى جاعىنان الەمدە 32-ورىن الىپ كەلدى. 2011 جىلدىڭ قاڭتارىندا وعان ەكى ليفت قويىلدى.
وسىدان 5 جىل بۇرىن الماتىدا ارحيتەكتۋرالىق جارىقتاندىرۋ تۇجىرىمداماسى قولعا الىنىپ, تەلەمۇنارا جارقىراپ شىعا كەلدى.
مۇنارانىڭ تەڭىز دەڭگەيىنەن بيىكتىگى 1 452 مەتردى قۇرايدى. قازىرگى ۋاقىتتا «كوكتوبە» تەلەمۇناراسى – قازاقستاننىڭ تەلەۆيزيالىق حابار تارتاتىن تسيفرلى فورماتقا كوشىرۋ ۇردىسىندەگى ەڭ ماڭىزدى نىسانداردىڭ ءبىرى. مۇنارانىڭ ءدال جۇرەگىندە بۇكىل قازاقستان بويىنشا تسيفرلى حابار تاراتۋ جەلىسىن باقىلايتىن «قازتەلەراديو» جەلى ساپاسىن باسقارۋ جانە مونيتورينگتەۋ ورتالىعى ورنالاسقان.
ەندىگى جەردە الماتىدا بالاما حابار تاراتۋ تاجىريبەسى تولىعىمەن تاريح قويناۋىنا ەندى دەسە دە بولادى. 3 اقپان كۇنى شاھار باسشىسى باقىتجان ساعىنتاەۆ «كوكتوبە» تەلەمۇناراسىندا بالاما تەلەحابار تاراتۋ جەلىسىن ءوشىرۋ راسىمىنە قاتىستى. وسىلايشا, الماتىنىڭ اكىمى مەگاپوليستىڭ تسيفرلى تەلەۆيزياعا تولىق كوشكەنىن مالىمدەدى.
«جوبانى كەزەڭ-كەزەڭمەن ىسكە اسىرۋ كەزىندە الماتى مەن وبلىستاعى 90 تسيفرلى راديوتەلەۆيزيالىق ستانسا پايدالانۋعا بەرىلدى. بۇل – 3,8 ميلليوننان استام تۇرعىنى بار 736 ەلدى مەكەندى تسيفرلى ەفيرلىك تەلەحابار تاراتۋ جۇيەسىمەن قامتۋعا مۇمكىندىك اشتى», – دەدى الماتىنىڭ اكىمى.
تسيفرلى ستاندارت وتاندىق تەلەارنالاردىڭ حابار تاراتۋ ۇلەسىن ۇلعايتىپ, ەلدىڭ اقپاراتتىق رەسۋرسىنا تەڭ قۇقىقتى قولجەتىمدىلىكتى قامتاماسىز ەتەدى. بۇعان دەيىنگى 4-5 تەلەارنانىڭ ورنىنا ەندى قازاقستاندىق 30-عا جۋىق تەلەارنانى تاڭداۋعا مۇمكىندىك بار. بۇل رەتتە قىمبات سپۋتنيكتىك تاباقتى ورناتۋدىڭ دا, كابەلدىك وپەراتورعا اقى تولەۋدىڭ دە قاجەتى جوق. الەۋمەتتىك وسال توپتاعى ازاماتتار سيگنال قابىلداعىشتار ارقىلى تەگىن قامتاماسىز ەتىلەدى.
سونىمەن تسيفرلى رەجىمگە كوشۋدىڭ رەسمي ءراسىمى دە «كوكتوبە» تەلەمۇناراسىندا ءوتتى. ول رەسپۋبليكاداعى ەڭ بيىك جانە تەك الماتى اۋماعىن عانا ەمەس, سونىمەن قاتار جاقىن ماڭداعى 200 ەلدى مەكەندى تسيفرلى سيگنالمەن قامتيدى. بۇل الماتى وبلىسى تۇرعىندارىنىڭ 40 پايىزىن قۇرايدى.
الماتى
