سالتاناتتى كەش بارىسىندا تەاتر ديرەكتورىنىڭ ورىنباسارى الماس شومان مۋزىكالىق قويىلىمعا كەلگەن مەديتسينا قىزمەتكەرلەرىنە ۇجىم اتىنان العىسىن ءبىلدىردى.
– جازۋشى م.اۋەزوۆتىڭ «اباي–توعجان» مۋزىكالىق دراماسى بۇگىن مەديتسينا سالاسىنىڭ قىزمەتكەرلەرىنە ارنايى ساحنالاندى. قازىرگى پاندەميا جاعدايىندا اۋىر ىندەتپەن كۇرەسىپ جاتقان دارىگەرلەردىڭ ەڭبەگى وراسان ەكەنى بارىمىزگە ءمالىم. ءبىزدىڭ ارتىستەرىمىزدىڭ سىزدەرگە ارنالعان قوشەمەتى مەن قۇرمەتىن قابىل الىڭىزدار, – دەدى ول.
قويىلىمدى تاماشالاۋعا 50-گە جۋىق مەديتسينا قىزمەتكەرى جينالدى. اتاپ ايتساق, نۇر-سۇلتان قالاسىنىڭ №4, №7, №9 قالالىق ەمحانالارىنان جانە ۇلتتىق نەيروحيرۋرگيا ورتالىعى مەن ۇلتتىق عىلىمي كارديوحيرۋرگيا ورتالىعىنان كەلدى.
– بۇگىنگى قويىلىمداعى اكتەرلەردىڭ شەبەرلىگى مەن مۋزىكالىق اسپاپتاردىڭ جاندى دىبىستارى جانىمىزدى جادىراتپاي قويمادى. ءبىز وتە قۋانىشتىمىز. تەاتر ۇجىمى بىزگە وسىنداي كەرەمەت كوڭىل كۇي سىيلادى, شاتتانا وتىرىپ تاماشالادىق. سول ءۇشىن العىسىمدى بىلدىرەمىن. كوروناۆيرۋستىڭ ەمى تابىلىپ, تەزىرەك بۇكىل الەم پاندەميانىڭ قۇرساۋىنان شىقسا ەكەن دەيمىن. ەلىمىز امان بولسىن, – دەدى №4 قالالىق ەمحانانىڭ دارىگەرى ارايلىم سەيدانوۆا. ال №9 قالالىق ەمحانانىڭ مەيىربيكەسى نازەركە بەرداليەۆا قويىلىمنىڭ جوعارى دەڭگەيلە وتكەنىن اتاپ ءوتىپ, اق حالاتتى ابزال جانداردىڭ ەڭبەگىن ەرەكشە باعالاپ, قۇرمەتپەن قاراعان تەاتر ۇجىمىنا العىسىن ءبىلدىردى.
«اباي-توعجان» مۋزىكالىق دراماسى – قازاقتىڭ ۇلى اقىنى اباي قۇنانباي ۇلىنىڭ بوزبالا كەزىنەن كورىنىس بەرىپ, العاشقى ماحابباتىن سيپاتتايتىن ساحنالىق تۋىندى. سپەكتاكلدىڭ ينستسەنيروۆكا اۆتورى ميراس ءابىل, رەجيسسەرى قازاقستاننىڭ ەڭبەك سىڭىرگەن قايراتكەرى اسحات ماەميروۆ, قويۋشى-رەجيسسەرى الما سىرباەۆا, كومپوزيتورى باۋىرجان اقتاەۆ, بالەتمەيستەرى شىرىن مۇستافينا, حورمەيستەرى عالىمجان بەرەكەشەۆ.
