ەديۋتون-2021 ماقساتى – قاتىسۋشىلاردى جاڭا داعدىلار مەن بىلىمگە ۇيرەتۋ, تاجىريبە الماسۋ, سونداي-اق تاجىريبەلى مەنتورلاردىڭ كومەگىمەن مەديالىق جانە تسيفرلىق ساۋاتتىلىقتى دامىتۋ بويىنشا جاڭا جوبالاردى ازىرلەۋ.
سەمينارلارعا قازاقستاننان, تاجىكستاننان جانە وزبەكستاننان كونكۋرس بويىنشا تاڭدالعان 50 قاتىسۋشى قاتىسادى.
ەديۋتون-2021 ادىستەمەلىك سەمينارىنىڭ اشىلۋىندا سويلەگەن سوزىندە كەمەلبەك ويشىباەۆ سالانىڭ دامۋىنا قوسقان ۇلەسى جانە ەلدەگى مەديا جانە اقپاراتتىق ساۋاتتىلىقتى دامىتۋ بويىنشا جەمىستى جۇمىسى ءۇشىن Internews-ءتىڭ قازاقستانداعى وكىلدىگىنە العىس ءبىلدىردى.
ول مينيسترلىك مەديا سالاسىنداعى مامانداردى وقىتۋ ماسەلەلەرىنە ەرەكشە نازار اۋداراتىنىن اتاپ ءوتتى.
ماسەلەن, 2020 جىلى ءبىلىم بەرۋ پروتسەسىن جۇيەلەندىرۋ جانە سالا ماماندارىنىڭ كاسىبي دەڭگەيىن ارتتىرۋ ماقساتىندا مينيسترلىك مەديا سالاسى ماماندارىن وقىتۋدىڭ 2020-2021 جىلدارعا ارنالعان ارنايى جوسپارىن بەكىتتى.
كەمەلبەك ويشىباەۆتىڭ ايتۋىنشا, ارنايى جوسپاردا كادرلاردى ءتيىمدى دايارلاۋعا جانە سالا ماماندارىنىڭ بىلىكتىلىگىن ارتتىرۋعا باعىتتالعان ءىس-شارالارمەن قاتار حالىقتىڭ مەديا جانە اقپاراتتىق ساۋاتتىلىعىن قالىپتاستىرۋ بويىنشا ءىس-شارالار دا كوزدەلگەن.
ۆيتسە-مينيستر مەديا سالاسىنىڭ ماماندارىن وقىتۋ جانە حالىقتىڭ مەدياساۋاتتىلىعىن ارتتىرۋ ماسەلەلەرىندە ىنتىماقتاستىققا دايىن ەكەندىگىن ءبىلدىردى.
