1934 جىلى قۇرىلعان فاكۋلتەت 2011 جىلدان بەرى ماماندار دايارلاۋدا قوسىمشا مىندەتتەر جۇكتەلۋىنە بايلانىستى بيولوگيا جانە بيوتەحنولوگيا فاكۋلتەتى بولىپ قايتا قۇرىلعان. قازىرگى كەزدە فاكۋلتەتتەگى ستۋدەنتتەر سانى 2 451 بولسا, ونىڭ 155-ءى – شەتەلدىكتەر. ستۋدەنتتەرگە 200-دەن استام پروفەسسور-وقىتۋشىلار ساباق بەرەدى. «فاكۋلتەتىمىزدەگى پروفەسسورلار مەن وقىتۋشىلاردىڭ 80 پايىزعا جۋىعىنىڭ عىلىمي دارەجەسى بولسا, ولاردىڭ ىشىندە 6 اكادەميك, 20 پروفەسسور بار. پروفەسسور-وقىتۋشىلار قۇرامىنىڭ بەلسەندىلىگىن ارتتىرۋ ناتيجەسىندە سوڭعى ەكى جىلدا گرانتتىق قارجىلاندىرۋ كولەمى ەكى ەسە ءوسىپ, ءتۇرلى باعىت بويىنشا حالىقارالىق ىنتىماقتاستىقتى كەڭەيتۋ جۇمىستارى جۇزەگە اسىپ كەلەدى. ءبىلىم جانە عىلىم مينيسترلىگىنىڭ باعدارلاماسى بويىنشا 30-دان استام ستۋدەنت اكادەميالىق ۇتقىرلىق شەڭبەرىندە ەۋروپالىق جوعارى وقۋ ورىندارىندا, اتاپ ايتقاندا, فرانتسيا, يتاليا, نورۆەگيا, گەرمانيا, يسپانيادا ءبىلىم الۋ مۇمكىندىگىنە يە بولدى. PhD دوكتورانتتاردى 25-تەن استام ەلدىڭ عالىمدارى بىرلەسىپ دايارلاۋعا قاتىسۋدا. فاكۋلتەت سوڭعى بەس جىلدا 30-دان استام عالىمدى ءدارىس وقۋعا جانە بىرلەسكەن زەرتتەۋلەر جۇرگىزۋگە شاقىردى. ال بيىلعى وقۋ جىلىنان باستاپ, بىرقاتار ەلدەن 5 عالىم ونلاين رەجىمىندە ءدارىس وقۋعا شاقىرىلدى», دەپ اتاپ ءوتتى ب.قازيحان ۇلى. ال فاكۋلتەتتەگى 2 عىلىمي زەرتتەۋ ينستيتۋتى – بيولوگيا جانە بيوتەحنولوگيا ماسەلەلەرى ينستيتۋتى, ەكولوگيالىق ماسەلەلەر ينستيتۋتى, 4 عىلىمي-زەرتتەۋ ورتالىعى – بيوبازا, اگروبيوستانسا جانە بيولوگيالىق وبەكتىلەردى فيزيكالىق جانە حيميالىق ادىستەرمەن زەرتتەۋ زەرتحاناسىنىڭ ءوز الدىنا مۇمكىندىگى زور.
ب.قازيحان ۇلىنىڭ ايتۋىنشا, قحر, موڭعوليا, مىسىر, ۋكراينا, وزبەكستان, تۇرىكمەنستان, پاكىستان, اۋعانستان جانە باسقا دا ەلدەردەن وقۋعا ءتۇسىپ, عىلىمي جۇمىستارىن ءساتتى قورعاپ جۇرگەن ستۋدەنتتەر – ۋنيۆەرسيتەت ماقتانىشى. ويتكەنى ولار شەتەلدە دە ەلىمىزدىڭ داڭقىن اسىراتىنى انىق. وسى ورايدا عىلىمي باعىتتاعى جۇمىستاردى كۇشەيتۋ جانە وڭ ناتيجەلەر بەرەتىن عىلىمي كادرلاردى دايارلاۋ تۇجىرىمداماسى مەن باعدارلاماسى ازىرلەندى. بۇل شارالاردىڭ بارلىعى پروفەسسور-وقىتۋشىلار قۇرامىنىڭ, سونداي-اق جاس عالىمدار مەن دوكتورانتتاردىڭ عىلىمي جاريالانىمدىق بەلسەندىلىگىنىڭ ارتۋىنا ىقپال ەتتى. ناتيجەسىندە, 2019-2020 وقۋ جىلىندا فاكۋلتەتتىڭ Scopus دەرەكتەر بازاسىندا يندەكستەلەتىن عىلىمي جۋرنالدارداعى جاريالانىمدار 90-عا جەتكەن. ونىڭ جارتىسى شەتەلدىك عالىمدارمەن بىرلەسە جاريالاندى.
«فاكۋلتەتتىڭ ەڭبەك سىڭىرگەن پروفەسسورلارى مەن جاس عىلىمي زەرتتەۋشىلەرىنە عىلىم مەن وقۋ پروتسەسىنىڭ دامۋىنا قوسقان ۇلەسى ءۇشىن ءتۇرلى مەملەكەتتىك ماراپاتتار مەن ستيپەنديالار بەرىلىپ جاتادى, بۇل مەملەكەتتىڭ عىلىم سالاسىنا جاسالعان قامقورلىعى», دەدى ب.قازيحان ۇلى. ول جاس وقىتۋشىلاردىڭ عىلىمي ءوسۋى, ولاردى ماتەريالدىق-تەحنيكالىق تۇرعىدان قولداۋ ماڭىزدى ەكەنىن ايتا كەلىپ, بۇل باعىتتا ارنايى مامانداندىرىلعان جابدىقتار الىنعانىن جەتكىزدى.
عىلىم توقتاۋسىز العا جىلجىپ كەلەدى. بۇل رەتتە ستۋدەنتتەردىڭ جوعارى تەحنولوگيالاردى, تسيفرلى جۇيەنى ۋاقىت وزدىرماي مەڭگەرگەنى ماڭىزدى. عىلىمي مەكتەپتەردىڭ قۇرىلۋى, وسى سالاداعى زەرتتەۋلەردى جۇرگىزۋ ءۇشىن شارۋاشىلىق كەلىسىمشارتتاردىڭ جاسالۋى جانە فاكۋلتەتتىڭ جۇمىسىن ۇيىمداستىرۋ مەن باسقارۋدى كۇشەيتۋ وزىق عىلىمي جەتىستىكتەرگە جەتەلەيتىنى انىق.
الماتى
