وڭىردە كوروناۆيرۋسقا قارسى ۆاكتسيناتسيالاۋ 1 اقپاننان باستالدى. قازىر اقتوبە قالاسىنداعى № 2, 3, 4 ەمحانالاردا, وتباسىلىق مەديتسينالىق ورتالىقتا, وبلىستىق كەڭەس بەرۋ-دياگنوستيكالىق مەكەمەسىندە, «مەديكۋس ورتالىعىندا» قاۋىپ-قاتەر توبىنا كىرەتىن مەكەمەلەردىڭ ەڭبەككەرلەرى ەكپە الدى. بۇل جۇمىسقا 189 مەديتسينا قىزمەتكەرى تارتىلعان. ۆاكتسيناتسيالاۋ اقتوبە قالاسىنان كەيىن بىرتىندەپ اۋدان ورتالىقتارىندا جۇرگىزىلەدى.
قازىرگى ۋاقىتتا اقتوبە وبلىسى كوروناۆيرۋس ينفەكتسياسىنىڭ تارالۋ ايماعى بويىنشا «جاسىل دالىزدە» تۇرعانىمەن, جاعدايدىڭ ءاپ-ساتتە وزگەرىپ كەتۋى مۇمكىن. بۇگىن وڭىردە ءۇش كوروناۆيرۋس جاعدايى تىركەلگەن. وسى ۋاقىتقا دەيىن ىندەتكە شالدىققان ناۋقاستاردىڭ 95,8%-ى جازىلىپ شىقسا, توسەك-ورىن جۇكتەمەسى 18,8%-دى قۇرايدى. كارانتين ورتالىقتارى مەن زەرتحانالار دا جۇمىستارىن جالعاستىرىپ جاتىر. ىندەتتىڭ ەكىنشى تولقىنى كۇشەيەر بولسا, ەكى ايعا جەتەتىن قور جاساقتالعان.
ەگەر ەپيدەميولوگيالىق جاعداي ۋشىعار بولسا, ارنايى ستاتسيونارلارداعى توسەك ورىن سانى 445-تەن 3603-كە دەيىن وسپەكشى. الدىن الا دايىندالعان پروۆيزورلىق ورتالىقتاردىڭ 57,1%-ى وتتەگىمەن قامتىلعان, 21 ستاتسيونارلىق رەنتگەن اپپاراتى ورناتىلدى, 382 وكپەنى جاساندى جەلدەتەتىن اپپارات, 450 وتتەگى كونتسەنتراتى, 626 وتتەگى باللونى, 787 بوبروۆ اپپاراتى مەن 424 وتتەگى جاستىقتارى جەتكىزىلدى. سونداي-اق جەلتوقسان ايىندا جاڭادان 41 جەدەل جاردەم كولىكتەرى, 6 ءموبيلدى دياگنوستيكالىق كەشەن ساتىپ الىنعان بولاتىن.
