كوميتەتكە اگەنتتىكتىڭ بارلىق جوبالارىنىڭ قىزمەتىن ۇيلەستىرۋ مەن مۇددەلى مەملەكەتتىك ورگاندارمەن جانە جۇرتشىلىقپەن ناتيجەلى ءوزارا ءىس-قيمىلدى نىعايتۋ بەكىتىلگەن. مۇنداي تاجىريبە بۇرىن مەملەكەتتىك ورگانداردا قولدانىلعان جوق. بۇل ءتاسىل سىبايلاس جەمقورلىققا قارسى ءىس-قيمىلدىڭ ءتۇيىندى كورسەتكىشتەرى مەن ماقساتتارىنا قول جەتكىزۋگە جانە قوعامدا پاراساتتىلىق يدەولوگياسىن ىلگەرىلەتۋگە باعىتتالعان جوبالىق مىندەتتەر مەن ءىس-شارالاردى ىسكە اسىرۋدى جاڭا ساپالى دەڭگەيگە شىعارۋعا مۇمكىندىك بەرەدى.
اگەنتتىكتىڭ سىبايلاس جەمقورلىققا قارسى جوبالارىنىڭ قاتارىنا «Adaldyq alańy», «Adal kómek», «اشىق بيۋدجەت», «ادال فارم», «Sanaly urpaq», «ادال جول», «ساپالى جول», «Protecting Business and Investments» جانە «تسيفرلىق سىبايلاس جەمقورلىققا قارسى قىزمەت» سياقتى باستامالار كىرەدى. كوميتەت باسشىسى بولىپ 2017 جىلدان باستاپ پرەزيدەنت جانىنداعى مەملەكەتتىك باسقارۋ اكادەمياسىنىڭ جوبالىق مەنەدجمەنتتى دامىتۋ ورتالىعىن باسقاراتىن جانار تايجانوۆا تاعايىندالدى.
كوميتەت جانىندا قوعامنىڭ بەلسەندى وكىلدەرى مەن جوعارى بىلىكتى سالالىق ماماندار مەن ساراپشىلار قاتارىنان ساراپتامالىق كەڭەس جۇمىس ىستەيتىن بولادى. ولاردىڭ قاتىسۋى بىرقاتار باعىتتار مەن سالالاردا سىبايلاس جەمقورلىقپەن بايلانىستى ەلەۋلى پروبلەمالارعا جوبالاردىڭ ناقتى نازارى اۋدارىلۋىنىڭ وزەكتىلىگىن ارتتىرادى.
