قۇرمانعازى اۋدانىندا تۇراتىن 25 جاستاعى كەلىنشەك اتىراۋ قالاسىنا تاكسيمەن كەلگەن ەكەن. ول 30 قاڭتاردا «وركەن-1» شاعىن اۋدانىنان شىعىپ, «ۆوكزال ماڭى» شاعىن اۋدانىنا بارماق بولعان. قاسىنا 3 جاستاعى قىزىن ەرتكەن. الايدا تۋىستارى ونىڭ قىزىمەن بىرگە جوعالعانى تۋرالى پوليتسياعا حابار بەرىپتى.
«تۋىستارىنان تۇسكەن شاعىمعا بايلانىستى جوعالعان كەلىنشەك پەن قىزىن ىزدەستىرۋ ءىس-شاراسى قولعا الىندى. اتىراۋ قالالىق پوليتسيا باسقارماسى جەدەل باسقارۋ ورتالىعىنىڭ قىزمەتكەرلەرى وبلىس ورتالىعىنىڭ شاعىن اۋداندارىنداعى كوشە ورامدارىندا ورناتىلعان بەينەكامەرالارمەن باقىلاۋ جۇرگىزدى. سونىڭ ناتيجەسىندە 31 قاڭتاردا كەشكى ساعات 22:05 شاماسىندا «الماگۇل» شاعىن اۋدانىندا ورنالاسقان №6 ءۇيدىڭ ماڭىنان ىزدەستىرۋ جاريالانعان ازاماتشا مەن ونىڭ قىزى تابىلدى», دەپ حابارلادى وبلىستىق پوليتسيا دەپارتامەنتىنىڭ ءباسپاسوز قىزمەتىنەن.
