الدىمەن مينيستر اوك دامىتۋ جونىندەگى ۇلتتىق جوبانىڭ تۇجىرىمداماسىن ازىرلەۋ بارىسى تۋرالى باياندادى. ايتۋىنشا, بۇگىندە قۇجات اگروبيزنەس, عىلىم وكىلدەرىمەن جانە باسقا دا مۇددەلى تاراپتارمەن بەلسەندى تالقىلانۋدا.
اقپاننىڭ ءبىرىنشى ونكۇندىگىندە قر اشم تۇجىرىمدامانى «اتامەكەن» ۇكپ الاڭىندا تانىستىرماق, ەگەر قۇجاتتى بارلىق مۇددەلى تاراپتار ماقۇلداعان جاعدايدا, مەملەكەتتىك جوسپارلاۋ جۇيەسىنىڭ تالاپتارىنا سايكەس ونى پارلامەنت دەپۋتاتتارىنىڭ, مەملەكەتتىك ورگاندار, وبلىس اكىمدىكتەرى مەن اگروبيزنەس وكىلدەرىنىڭ قاتىسۋىمەن ۇكىمەتتە قاراۋدى جوسپارلاپ وتىر.
«ۇلتتىق جوبانىڭ نەگىزگى قاعيداتتارى - بيزنەس ءۇشىن مىندەتتەمەلەردى ەنگىزە وتىرىپ, مەملەكەتتىك قولداۋ شارالارىنىڭ ساباقتاستىعى مەن تۇراقتىلىعى بولادى. ۇلتتىق جوبانى ىسكە اسىرۋداعى نەگىزگى ۇلەس وڭىرلەرگە تيەسىلى ەكەنىن ەسكەرە وتىرىپ, وبلىس اكىمدەرى وسى قۇجاتتى دايىنداۋعا, ونىڭ ىشىندە شارالاردى ازىرلەۋگە جانە ينديكاتيۆتەر قويۋعا بەلسەندى قاتىسۋى قاجەت», - دەدى ساپارحان وماروۆ.
تۇجىرىمدامانى تالقىلاۋ قورىتىندىلارى بويىنشا ۇلتتىق جوبا ازىرلەنەتىن بولادى. مەملەكەت باسشىسىنىڭ تاپسىرماسىنا سايكەس ونى قابىلداۋ مەرزىمى 2021 جىلعى شىلدەگە بەلگىلەنگەن.
سونداي-اق, ۇلتتىق جوبانى ماۋسىم ايىنان كەشىكتىرمەي قازاقستان رەسپۋبليكاسى پرەزيدەنتىنىڭ جانىنداعى رەفورمالار جونىندەگى جوعارى كەڭەستە قاراۋ جوسپارلانۋدا.
پايدالانىلمايتىن جايىلىمدىق جەرلەردى قايتارۋ بويىنشا تاپسىرماعا قاتىستى اشم باسشىسى 2019 جىلدىڭ سوڭىندا كوسمومونيتورينگتى قولدانۋدىڭ زاڭنامالىق بازاسى قالىپتاستىرىلعانىن, ال 2020 جىلدىڭ باسىندا پايدالانىلمايتىن اۋىل شارۋاشىلىعى جەرلەرىن انىقتاۋ بويىنشا پيلوتتىق جوبا ەلىمىزدىڭ 4 وبلىسىندا (اقمولا, شىعىس قازاقستان, قوستاناي جانە ماڭعىستاۋ وبلىستارى) ىسكە قوسىلعانىن اتاپ ءوتتى.
ناتيجەسىندە پايدالانىلماي جاتقان 8,3 ملن گەكتار جەر انىقتالدى, ونىڭ 7,6 ملن گەكتارى جايىلىمدىق جەرلەر.
«اتالعان وبلىستاردىڭ اكىمدىكتەرى پايدالانىلمايتىن جەرلەردى مەملەكەت مەنشىگىنە قايتارۋدى جەدەلدەتىپ, ولاردى اۋىل شارۋاشىلىعى اينالىمىنا تارتۋدى قامتاماسىز ەتۋى قاجەت. بۇگىندە انىقتالعان 7,6 ملن گەكتار جايىلىمنىڭ 2,6 ملن گەكتارى مەملەكەتتىك مەنشىگىنە جەر يەلەرى ءوز ەركىمەن قايتاردى, 1,6 ملن گەكتارى اۋىل شارۋاشىلىعى اينالىمىنا تارتىلدى. ال 3,4 ملن. گەكتار جەر بويىنشا جەرگىلىكتى اتقارۋشى ورگاندار سوت ورگاندارىندا ماتەريالدار دايىنداۋدا», - دەدى س.وماروۆ.
ساپارحان وماروۆتىڭ ايتۋىنشا, اعىمداعى جىلدىڭ قاڭتارىنان باستاپ كوسمومونيتورينگ رەسپۋبليكانىڭ بارلىق اۋماعىندا جۇزەگە اسىرىلۋدا.
سونىمەن قاتار, مەملەكەت باسشىسىنىڭ تاپسىرماسى بويىنشا وتكەن جىلى سالىق كودەكسىنە پايدالانىلمايتىن جەرلەرگە 10 ەسەدەن 20 ەسەگە دەيىن سالىق مولشەرلەمەلەرىن ارتتىرۋ ەنگىزىلدى. بۇل پايدالانىلمايتىن اۋىل شارۋاشىلىعى جەرلەرىنەن ءوز ەركىمەن باس تارتۋعا ەكونوميكالىق تۇرعىدا اسەر ەتۋ ءۇشىن جاسالۋدا.
سونداي-اق, پايدالانىلمايتىن اۋىل شارۋاشىلىعى جەرلەرىن قايتارۋ مەرزىمدەرىن 2 جىلدان 1 جىلعا دەيىن قىسقارتۋ, ولاردى كوسمومونيتورينگ دەرەكتەرى نەگىزىندە سوت تارتىبىمەن قايتارۋ, حابارلامانى قاعاز جۇزىندە ەمەس ەلەكتروندىق SMS-حابارلاما ارقىلى تاپسىرۋعا كوشىرۋ بويىنشا زاڭ جوباسى ازىرلەنىپ, قازىرگى ۋاقىتتا ۇكىمەتپەن پىسىقتالۋدا.
«بۇگىندە جەردى مەملەكەت مەنشىگىنە قايتارۋ تەتىكتەرى بار. مەملەكەت باسشىسىنىڭ تاپسىرماسىن ورىنداۋ ءۇشىن جەرگىلىكتى اتقارۋشى ورگاندار ولاردى بارىنشا پايدالانۋ شارالارىن قابىلداۋى قاجەت», - دەپ تولىقتىردى مينيستر.
2021 جىلعى قاراشاعا دەيىن جەر كوميسسياسىن قۇرۋ جانە جەر كودەكسىنە تۇزەتۋلەردى قابىلداۋدى قامتاماسىز ەتۋ تۋرالى تاپسىرماعا قاتىستى قر اۋىل شارۋاشىلىعى ءمينيسترى جەر ماسەلەلەرى جونىندەگى ارنايى كوميسسيانى قۇرۋ جونىندەگى جۇمىس باستالعانىن باياندادى.
ونىڭ قۇرامىنا بارلىق مۇددەلى تاراپتار, قر پارلامەنتى دەپۋتاتتارى, اگروبيزنەس, فەرمەرلەر وداعى مەن قاۋىمداستىقتارىنىڭ, «اتامەكەن» ۇكپ, وبلىس اكىمدىكتەرىنىڭ جانە ت. ب. ۇيىمداردىڭ وكىلدەرى كىرەدى.
«جەر كوميسسياسى جۇمىسىنىڭ قورىتىندىسى جانە ۇسىنىلعان پىكىرلەردى تالقىلاۋ بويىنشا جاڭا زاڭ جوباسىنىڭ نەگىزىن قۇرايتىن اۋىل شارۋاشىلىعى ماقساتىنداعى جەرلەردى اينالىمعا ەنگىزۋ بويىنشا بىرىڭعاي تۇجىرىمدامالىق ادىستەمەلەر ازىرلەنەتىن بولادى. ونى ازىرلەۋ ۇكىمەتتىڭ 2021 جىلعا ارنالعان زاڭ جوبالاۋ جۇمىستارى جوسپارىندا قاراستىرىلعان», - دەپ اتاپ ءوتتى ساپارحان وماروۆ.
