وتكەن اپتادا قارۋلى كۇشتەردە COVID-19 جۇقتىرعاندار سانى 13 جاعدايعا تومەندەدى, نۇر-سۇلتان جانە الماتى قالالارىنداعى قر قك پتر-زەرتحانالارى 696 تالداما جۇرگىزدى. ايتا كەتۋ كەرەك, ەسەپتىلىك كەزەڭدە اسكەردە كوروناۆيرۋس ينفەكتسياسىن جاپپاي جۇقتىرۋ فاكتىلەرى تىركەلگەن جوق.
قارۋلى كۇشتەردە بيىلعى جىلدىڭ قاڭتار ايى بويى بولىمشەلەردى ۇيلەستىرۋگە قاتىستى وتكىزىلگەن شارالار جالپى «جاقسى» دەپ باعالانىپ, اياقتالدى. پاندەمياعا قاراماستان اسكەري دايارلىقتىڭ قارقىندىلىعى تومەندەمەي, سانيتارلىق-ەپيدەميولوگيالىق تالاپتاردى قاتاڭ ساقتاۋمەن ءوتتى.
اقپان ايىنىڭ 1-نەن باستاپ اسكەرلەر ۆزۆودتاردىڭ دايارلىعىنا كىرىستى. قر قورعانىس ءمينيسترى گەنەرال-لەيتەنانت نۇرلان ەرمەكباەۆ جاۋىنگەرلىك دايارلىقتىڭ قارقىندىلىعىن تومەندەتپەي, سانيتارلىق-ەپيدەميولوگيالىق تالاپتار مەن قاۋىپسىزدىك شارالارىن مۇلتىكسىز ساقتاي وتىرىپ, اسكەر تۇرلەرىنىڭ باس قولباسشىسى مەن وڭىرلىك قولباسشىلىقتاردىڭ قولباسشىلارىنا نۇسقاۋ بەردى.
پراكتيكالىق ساباقتاردى رۇقسات ەتىلگەن تەمپەراتۋرا رەجيمىن ەسكەرە وتىرىپ, تەك تازا اۋادا وتكىزۋ, سونداي-اق «قىزىل» ايماقتاردا الەۋمەتتىك ارا قاشىقتىقتى ساقتاۋ مەن بولىمشەلەر اراسىنداعى بايلانىستى قاتاڭ باقىلاۋدى قامتاماسىز ەتۋ تاپسىرىلدى.
ۆزۆودتاردى ۇيلەستىرۋ بارىسىندا كومانديرلەر باعىنىستىلاردىڭ جاۋىنگەرلىك ءىس-قيمىلدارىن تۇراقتى باسقارۋدى ۇيرەتۋگە, سونداي-اق جەرگىلىكتى سوعىستار مەن قارۋلى قاقتىعىستارداعى جاۋىنگەرلىك ءىس-قيمىلدار تاجىريبەسىنە سۇيەنە وتىرىپ, كۇندىزگى جانە تۇنگى جاعدايلاردا بولىمشەلەردىڭ جاۋىنگەرلىك اتىستارىن جۇرگىزۋگە ەرەكشە نازار اۋدارۋى ايتىلدى.
اپپارات كەڭەسىندە قورعانىس ءمينيسترى توتەنشە جاعدايلار ءمينيسترى يۋ. يلينمەن جاقىندا بولعان كەزدەسۋدىڭ قورىتىندىسى بويىنشا حاتتامالىق تاپسىرمانى ىسكە اسىرۋدىڭ ماڭىزدىلىعىن اتاپ ءوتتى. اتاپ ايتقاندا, قورعانىس مينيسترلىگىنە قر قك اسكەري بولىمدەرى مەن مەكەمەلەرىنىڭ اۋماعىندا ءورت قاۋىپسىزدىگى سالاسىنداعى ۋاكىلەتتى ورگان قىزمەتتەرىن بەرۋ ماسەلەسىن پىسىقتاۋدى تاپسىردى.
- ورتكە قارسى قاۋىپسىزدىك – قارۋلى كۇشتەردىڭ قاۋىپسىز تىنىس-تىرشىلىگىن قامتاماسىز ەتۋدىڭ ماڭىزدى فاكتورلارىنىڭ ءبىرى. بارلىق كەمشىلىكتەردى قىسقا مەرزىمدە جويۋ قاجەت, ال وسى ءىس-شارالاردى قارجىلاندىرۋعا باسىمدىق بەرىلۋى ءتيىس, - دەپ قورعانىس ءمينيسترى اتاپ ءوتتى.
