قۇندى قاعازدار KEGOC-تىڭ جالپى كولەمى 80 ملرد تەڭگە بولاتىن ەكىنشى وبليگاتسيالىق باعدارلاماسى وبليگاتسيالارىنىڭ ءبىرىنشى شىعارىلىمى اياسىندا ورنالاستىرىلدى. وتەۋ مەرزىمى – 14,3 جىل. ساۋدا-ساتتىق ناتيجەسىندە تارتۋ كولەمى بويىنشا وبليگاتسيالاردىڭ 22,6 پايىزىن بروكەرلىك-ديلەرلىك ۇيىمدار, 72,8 پايىزىن باسقا ينستيتۋتسيونالدىق ينۆەستورلار, 4,6 پايىزىن وزگە دە زاڭدى تۇلعالار ساتىپ الدى.
تارتىلعان قاراجات «KEGOC» اق فيليالدارىنىڭ 220-500كۆ اۋە جەلىلەرىن جاڭعىرتۋ», «قازاقستان ءبىرتۇتاس ەلەكتر ەنەرگەتيكالىق جۇيەسى باتىس ايماعىنىڭ ەلەكتر جەلىسىن كۇشەيتۋ» ينۆەستيتسيالىق جوبالارىن ىسكە اسىرۋعا باعىتتالادى.
«اۋەلىك ەلەكتر جەتكىزۋ جەلىلەرىن جاڭعىرتۋ ەلەكتر جەلىلەرىنىڭ سەنىمدى جۇمىس ىستەۋىن قامتاماسىز ەتەدى. سونداي-اق ەلەكتر ەنەرگياسىن تۇتىنۋشىلار شىعىندارىنىڭ كولەمىن وڭتايلاندىرۋعا مۇمكىندىك بەرەدى. بۇدان بولەك, KEGOC قىزمەتىنىڭ تيىمدىلىگىن ارتتىرادى. جاڭا ەلەكتر جەلىلىك نىسانداردى سالۋ ەسەبىنەن قازاقستاننىڭ ءبىرتۇتاس ەلەكتر ەنەرگەتيكالىق جۇيەسىنىڭ باتىس ايماعىنداعى تۇتىنۋشىلاردى ەلەكترمەن جابدىقتاۋ سەنىمدىلىگى ارتادى», دەپ حابارلادى كومپانيا.
سونداي-اق قۇرىلىس-مونتاجداۋ جۇمىستارى كەزىندە قوسىمشا جۇمىس ورىندارى پايدا بولاتىندىقتان, جوبالاردىڭ الەۋمەتتىك ماڭىزى زور. بۇل ءوز كەزەگىندە ەكونوميكانىڭ ناقتى سەكتورىنىڭ دامۋىنا, حالىقتىڭ جۇمىسپەن قامتىلۋىنىڭ جانە ءال-اۋقاتىنىڭ جوعارىلاۋىنا, بيۋدجەتكە تۇسەتىن سالىقتىق تولەمدەردىڭ ارتۋىنا وڭ اسەر ەتەدى.
