الدىمەن ايماق باسشىسى جەتىكول اۋىلدىق وكرۋگىنە ات باسىن بۇرىپ, «جۇمىسپەن قامتۋ جول كارتاسى» شەڭبەرىندە جۇزەگە اسقان تۇرعىن ۇيلەردى سۋمەن جابدىقتاۋ جۇيەسىن قايتا جاڭعىرتۋ جۇمىستارىمەن تانىستى. «كورپوراتسيا الەم-قۇرىلىس» جشس-ءى قولعا العان جوبانىڭ قۇنى 144,5 ملن تەڭگەنى قۇرايدى. قايتا جاڭعىرتۋ جانە كەڭەيتۋ جۇمىستارى ارقىلى 18 جۇمىس ورنى اشىلعان. اۋىز سۋ قۇبىرى مۇناراسىندا اۋدان اكىمى تالعات دۇيسەباەۆ جەتىكول ەلدى مەكەنىنىڭ تۇرعىندارى ءۇشىن ماڭىزدى تۇرعىن ۇيلەردى سۋمەن جابدىقتاۋ جۇمىستارىنىڭ ورىندالۋ بارىسىن باياندادى.
مۇنان كەيىن, وبلىس اكىمى اۋىلدىق وكرۋگتەگى №174 ورتا مەكتەپتىڭ جانە «بالاۋسا» شاعىن ورتالىعىنىڭ جۇمىسىمەن تانىستى. 320 ورىندىق مەكتەپتە 158 وقۋشى ءبىلىم الادى. وقۋ ورداسى جانىنان 25 ورىندىق «بالاۋسا» شاعىن ورتالىعى اشىلعان. بۇگىندە مەكتەپتە 60 قىزمەتكەر, شاعىن ورتالىقتا 11 مامان جۇمىس اتقارادى. گۇلشارا ابدىقالىقوۆا شاعىن ورتالىقتىڭ جۇمىسىن باعامداپ, بالالاردىڭ ساقتىعى ماسەلەسىنە جەتە ءمان بەرۋدى تاپسىردى.
جۇمىس ساپارى بارىسىندا وبلىس اكىمى تەرەڭوزەك كەنتىنە بارىپ, كەنتتەگى گاز قۇبىرلارى جانە كۆارتالىشىلىك گاز قۇبىرلارىنىڭ قۇرىلىسىمەن تانىسىپ, اۋىل تۇرعىندارىنا كوگىلدىر وتىن بەرۋ راسىمىنە قاتىستى.
جالپى قۇنى 2,4 ملرد. تەڭگەنى قۇرايتىن تەرەڭوزەك كەنتىندەگى كۆارتالىشىلىك گاز قۇبىرلارى جەلىسىنىڭ قۇرىلىسى 2019-2020 جىلدارى جۇزەگە استى. وبلىس اكىمى 11 مىڭنان استام تۇرعىندى گازبەن قامتاماسىز ەتۋگە مۇمكىندىك بەرگەن ايتۋلى كۇندە سىرداريالىق تۇرعىندارعا تابىس تىلەپ, قۋانىشتارىنا ورتاقتاستى.
– كەنت ورتالىعىنا قوسىلىپ جاتقان, الاۋ وتىنىمىز, كوگىلدىر گاز ءار وتباسىنا ءوزىنىڭ جىلىلىعىمەن كەلە بەرسىن. الەمدى شارپىعان داعدارىسقا قاراماستان الەۋمەتتىك ماڭىزى بار قۇرىلىس, گازداندىرۋ سەكىلدى كۇردەلى باستامالاردى كەيىنگە قالدىرماي, ىسكە اسىرىپ كەلەمىز. وتكەن جىلى ارال اۋدانىنداعى جاقسىقىلىش, قازالى اۋدانىنداعى مۇراتباەۆ جانە شيەلى اۋدانىنداعى بايسىن ەلدى مەكەندەرى گازگە قوسىلدى. ناتيجەسىندە قازىرگى تاڭدا وبلىس تۇرعىندارىنىڭ 65 پايىزى تابيعي گازعا قول جەتكىزىپ وتىر. اۋدان ورتالىقتارىن تولىق گازداندىرعاننان كەيىن وبلىستاعى ەلدى مەكەندەرگە كوگىلدىر وتىن جەتكىزۋ جوسپارىمىزدا بار. بۇل – ءبىر اۋداننىڭ عانا ەمەس, وبلىستىڭ قۋانىشى. ءار وتباسىنان جىلۋ كەتپەسىن, وتانىمىزدىڭ قۋاتى ارتا بەرسىن, – دەدى وبلىس اكىمى گۇلشارا ابدىقالىقوۆا.
ەلدى مەكەندەردى گازعا قوسۋ كەزەڭ-كەزەڭىمەن ىسكە اسادى. سىرداريا اۋدانىندا جوبا بويىنشا ءبىرىنشى كەزەكتە تەرەڭوزەك كەنتىنە جاقىن ورنالاسقان قالجان احۋن, ساكەن سەيفۋللين, اسقار توقماعامبەتوۆ جانە سىرداريا وزەنىنىڭ وڭتۇستىگىنە گاز قۇبىرىن وتكىزىپ, شاعان ەلدى مەكەنى كوگىلدىر وتىنعا قوسىلادى.
ايتا كەتەيىك, وبلىستا ارال, قازالى, شيەلى, جاڭاقورعان اۋداندارىنىڭ ورتالىقتارى مەن بايقوڭىر قالاسى كوگىلدىر وتىنعا قوسىلعان. قالعان 3 اۋدان ورتالىعى – جوسالى, جالاعاش, تەرەڭوزەك, سونداي-اق سەكسەۋىل, تورەتام, اقاي ەلدى مەكەندەرىن گازداندىرۋ كەزەڭ-كەزەڭىمەن جۇزەگە اسۋدا.
كەنتتى كوگىلدىر وتىنعا قوسۋ راسىمىندە اۋداندىق ارداگەرلەر كەڭەسىنىڭ توراعاسى قايروللا ابەن ۇلى ەل يگىلىگىنە باعىتتالعان, الەۋمەت ءۇشىن وزەكتى ماسەلەنىڭ شەشىمىن تاپقانىن تىلگە تيەك ەتىپ, اۋىل تۇرعىندارىن قۇتتىقتادى.
بۇدان كەيىن ايماق باسشىسى گۇلشارا ابدىقالىقوۆا گاز الاۋى جاعىلعان عاني مۇراتباەۆ كوشەسىندەگى №94 ءۇيدىڭ تۇرعىنى ەڭبەك ارداگەرى قونىسبەك ابسادىقوۆتىڭ ۇيىنە بارىپ, وتباسىنىڭ قۋانىشىمەن ءبولىستى.
سىرداريا اۋدانىنداعى جۇمىس ساپارىن قورىتىندىلاعان وبلىس اكىمى اۋدان اكىمى تالعات دۇيسەباەۆقا بىرقاتار ماڭىزدى تاپسىرمالار جۇكتەدى. كوروناۆيرۋستىق ينفەكتسيادان ساقتانۋ باعىتىنداعى ساقتىق شارالارىن ساقتاۋ جانە كارانتين تالاپتارىن ەسكەرۋدى تاپسىردى. سونداي-اق الەۋمەتتىك-ەكونوميكالىق تابىس كوزىن قۇرايتىن ماڭىزدى جوبالاردى ىسكە اسىرۋدى قاپەرگە سالدى.
