عالىمدار, ەڭ الدىمەن, ۆيرۋس تاراعان تەڭىز ونىمدەرىن ساتاتىن حۋانان بازارىنان باستايدى. بىلتىر جىل باسىندا جابىلعان بازار جۇمىسى ءالى دە توقتاپ تۇر. ارنايى قورشاۋلاردان بولەك, حالىق كىرىپ كەتپەسىن دەپ 24 ساعات كۇزەت قويىلعان. جابىلعانعا دەيىن ەت, تەڭىز ونىمدەرى مەن كوكونىستەر ساتاتىن جۇزدەگەن دۇڭگىرشەك ورنالاسقان بۇل بازاردان ادام ۇزىلمەيتىن. دەسە دە كەيبىر قىتاي ديپلوماتى مەن جەرگىلىكتى باق ىندەتتىڭ وشاعى ءدال وسى جەر دەگەن پىكىرگە قارسى شىعىپ, ۆيرۋس وزگە ەلدەن كەلدى دەگەن پىكىردى قولداعان. 2019 جىلدىڭ 31 جەلتوقسانىندا وسى بازارعا بايلانىسى بار ءتورت ادامنىڭ بەلگىسىز پنەۆمونيا جۇقتىرعانى بەلگىلى. ناتيجەسىندە, ادەتتە تىرشىلىگى قايناپ جاتاتىن ساۋدا ورنى ءبىر تۇندە جابىلادى. كەيىننەن قاڭتاردىڭ اياعىندا ۋحان قالاسى 76 كۇندىك قاتاڭ كارانتينگە جابىلعان-دى.
ساراپشىلار الەمدەگى ىندەتتىڭ العاشقى بەلگىلەرى وسى جەردەن باستالعاندىقتان, حۋانان بازارى ۆيرۋستى زەرتتەۋدە ۇلكەن ءرول اتقاراتىنىن ايتىپ وتىر. قىتايعا كەلگەن ماماندار ەكى اپتالىق كارانتيننەن كەيىن ۋحانداعى زەرتحانالار, بازارلار مەن اۋرۋحانالارعا بارادى. وسىعان دەيىن اقش تاراپىنان قىتايدىڭ كەيبىر دەرەكتەردى جاسىرىپ, ىندەتكە قاتىستى اقپاراتتى بۇرمالاۋىنا بايلانىستى كوپ سىن تاعىلعان ەدى. زەرتتەۋ وقيعانىڭ اق-قاراسىن اجىراتۋعا ءتيىس.
