بۇگىن ەلىمىزدە ۆاكتسينالاۋ باستالادى

جالپى, اقپان ايىندا قاراعاندى فارماتسەۆتيكالىق كەشەنى ۆاكتسينانىڭ 112 مىڭ دوزاسىن, ناۋرىزدا – 150 مىڭ, ساۋىردەن ماۋسىمعا دەيىن اي سايىن 600 مىڭ دوزانى جەتكىزەدى. سونداي-اق ءساۋىر ايىنان باستاپ 75 مىڭ دوزا كولەمىندە QazCovid-in وتاندىق ۆاكتسيناسى سالىنادى دەپ جوسپارلانۋدا,  اي سايىن ونىڭ كولەمى 500 مىڭ دوزاعا كوبەيەدى. ءبىرىنشى كەزەكتە حالىقتىڭ جەكەلەگەن توپتارى – مەديتسينا قىزمەتكەرلەرى, پوليتسەيلەر, اسكەري قىزمەتكەرلەر جانە ت. ب. ۆاكتسينالانادى.

ۆاكتسينالاۋعا پروفيلاكتي­كالىق ەگۋگە قارسى كورسەتكىشتەرى جوق ادامدار جىبەرىلەدى. ۆاك­تسينالاۋ الدىندا دارىگەر پا­تسيەنتتى مىندەتتى تۇردە تەك­سەرەدى. ەل بويىنشا ەگۋ پۋنكت­تەرىنىڭ دايىندىعى تەكسەرىلدى, پروفيلاكتيكالىق ەگۋ جۇرگىزۋ ماسەلەلەرى بويىنشا ستاندارتتى وپەراتسيالىق راسىمدەر بەكىتىلدى, 2 مىڭنان استام مەديتسينا قىزمەتكەرى وقىتىلدى. ايتا كەتۋ كەرەك, تەك ۆاكتسينالاۋ كوروناۆيرۋستىڭ ودان ءارى تارالۋىنا جول بەرمەيدى. بۇل جونىندە دەنساۋلىق ساقتاۋ مينيسترلىگى ۇلتتىق قوعامدىق دەنساۋلىق ساقتاۋ ورتالىعى سا­نيتارلىق-ەپيدەميولوگيالىق سا­­راپتاما جانە مونيتورينگ عى­لىمي-پراكتيكالىق ورتالىعى ديرەكتورىنىڭ ورىنباسارى مانار سماعۇل ايتىپ بەردى.

«ۆاكتسينالاۋ – ەڭ ءتيىمدى شارالاردىڭ ءبىرى. تەك ۆاكتسينا ءولىم-ءجىتىم مەن ينفەكتسيانىڭ تارالۋىن ازايتا الادى. ۆاكتسينا ارقىلى ەركىندىككە قول جەتكىزەمىز. بۇعان دەيىن دە ايتقانىمداي, شەكتەۋلەردى ازايتۋعا بولادى. بالكىم كۇزدە ماسكانى شەشەتىن شىعارمىز. ونىڭ ۇستىنە كۇزدە بالالاردى مەكتەپكە قايتارۋ مۇمكىندىگى تالقىلانىپ جاتىر. ونلاين ەمەس, وفلاين كەزدەسۋلەر وتكىزەرىمىزگە ۇمىتتەنەمىن», دەدى م.سماعۇل.

ونىڭ ايتۋىنشا, حالىقتى اشىق حاباردار ەتۋ قاجەت. بارلىق دەرەك پەن اقپاراتتى سەنىمدى كوزدەردەن جانە قۇزىرەتتى مامانداردان الۋ كەرەك.

«سەبەبى قازىر الەۋمەتتىك جە­لىدە ۆاكتسينالاۋعا قاتىسى جوق ەكى-ءۇش جىل بۇرىنعى بەينەلەردى, فوتولاردى بايقايمىز. تەك سەنىمدى اقپاراتقا سۇيەنۋ كەرەك. رەسەيلىك «سپۋتنيك V» ۆاكتسيناسىنا كەلسەك, رەسەيلىك ارىپتەستەر قىزارۋ, تەمپەراتۋرانىڭ جوعارىلاۋى تۇرىندە اسقىنۋلار بولادى دەيدى, ولار بىرنەشە كۇننەن كەيىن كەتەدى. قورىتىندىلاي ايتقاندا, ۆاكتسينانىڭ پايداسى كوپ, ويتكەنى ول ءبىزدى اۋرۋدان قورعايدى», دەدى م.سماعۇل.

سونىمەن قاتار قوعامدىق دەنساۋلىق ساقتاۋ ۇلتتىق ور­تالىعىنىڭ عىلىمي كەڭەسشىسى ءالىم اكىمباەۆ قازاقستاندىق QazCovid-in ۆاكتسيناسىنىڭ ارتىقشىلىقتارىن ايتىپ بەردى.

ء«بىز قازىر ۇلكەن جولدى ەڭسەردىك. ەندىگى ماڭىزدى كەزەڭ – ۆاكتسينالاۋدى قولدانۋ. ۆاكتسينا الىندى, ەندى ۆاكتسينالاۋدى دۇرىس ۇيىمداستىرۋ كەرەك. ماسكا رەجىمى مەن قاشىقتىق تالابى ءالى دە ساقتالادى. اسىرەسە جۇقپالى اۋرۋلار اۋرۋحانالارىنىڭ دا­رىگەرلەرىن, ەپيدەميالىق قىز­مەتتى, ناۋقاستارمەن ەڭ كوپ بايلانىستا بولاتىن ادامداردى يممۋنداۋ قاجەت. رەسەي ءبىرىنشى كەزەڭدە بىزگە وتە جوعارى الەمدىك رەيتينگكە يە «سپۋتنيك V» ۆاكتسيناسىن ۇسىندى. جاقىن ارادا ءبىزدىڭ وتاندىق ۆاكتسينا دا شىعارىلۋى ءتيىس», دەپ اتاپ ءوتتى ءا.اكىمباەۆ.

ساراپشىنىڭ ءوزى قازاقستاندىق ۆاكتسيناعا باسىمدىق بەرىپ وتىرعانىن ايتتى.

«پاتريوت رەتىندە ەمەس, ۆاكتسينالاۋمەن اينالىسقان مامان رەتىندە قازاقستاندىق ۆاكتسيناعا كوبىرەك ءمان بەرەمىن دەپ ايتا الامىن. نەگە؟ جاسالۋى جاعىنان بۇل – ولتىرىلگەن, بەلسەندى ەمەس ۆاكتسينا. ول ساقتاۋ جانە تاسىمالداۋدىڭ ار­نايى تەمپەراتۋراسىن قاجەت ەتپەيدى. مۇنداعى رەجىم ەكىدەن سەگىز گرادۋسقا دەيىن. ياعني ۆاكتسينانى ساقتاۋ ءۇشىن قاراپايىم تۇرمىستىق توڭازىتقىشتى دا قولدانۋعا بولادى. مۇنداي تىزبەك قازاقستاندا ورتالىقتان شالعاي وڭىرگە دەيىن قولعا الىنعان. سوندىقتان 20 گرادۋس تەمپەراتۋرادا ساقتاۋدى تالاپ ەتەتىن رەسەيلىك ۆاكتسينادان ءتيىمدى بولىپ تۇر. ويتكەنى مۇنداي تەمپەراتۋرادا ۇنەمى ساقتاۋ قولدان كەلمەۋى مۇمكىن. ال تەمپەراتۋرا تالابىن بۇزۋ ساپانىڭ تومەندەۋىنە ىقپال ەتەدى», دەپ ءتۇسىندىردى مامان.

سونىمەن بىرگە ءا.اكىمباەۆ قازاقستاندىق ۆاكتسينانىڭ ان­تيگەندىك جيىنتىق سپەكترى شەك­تەلمەگەنىن جەتكىزدى. ويتكەنى تۇتاس جاسۋشا الىنىپ, قانداي دا ءبىر ادىسپەن ولتىرىلەدى جانە انتيگەندەردىڭ تولىق جيىنتىعى ساقتالادى.

«قازىر بۇل وتە وزەكتى, سەبەبى كوروناۆيرۋس ينفەكتسياسى تۋرالى جاڭا ستەرەوتيپتەر شىعىپ جاتىر. بۇل ۆاكتسينا كوروناۆيرۋستىڭ بارلىق مۋتانتتى تۇرلەرىنە يممۋنيتەتتى قالىپتاستىرۋى كەرەك. مىنە, وسى تۇرعىدا قا­زاقستاندىق ۆاكتسينانىڭ پەرسپەكتيۆاسى بار», دەپ تۇيىندەدى ساراپشى.