ايماقتار • 31 قاڭتار، 2021

پاۆلودار وبلىسىنىڭ باس سانيتارلىق دارىگەرى ءوڭىر تۇرعىندارىنا ۇندەۋ جاسادى

50 رەت كورسەتىلدى

وبلىستىڭ 9 اۋدانى مەن 3 قالاسى «قىزىل ايماقتا». كوروناۆيرۋستىڭ تارالۋىنا بايلانىستى كارانتيندىك شارالار كۇشەيتىلدى، دەپ حابارلايدى Egemen.kz  Pavlodarnews.kz سايتىنا سىلتەمە جاساپ.

فوتو: كونستانتين شەلكوۆ

وبلىستىڭ باس سانيتارلىق دارىگەرى باتىربەك اليەۆ وبلىستىڭ COVID-19 بويىنشا «قىزىل ايماقتا» ەكەنىن ەسكە سالدى. 1 قاڭتاردان باستاپ كوروناۆيرۋستىق ينفەكتسيا 3714 ادامدا راستالدى. ال، 29 قاڭتاردا ءبىر كۇندە اۋىرعاندار سانى رەكوردتىق 296-عا جەتتى.
      - وڭىردەگى ەپيدەميولوگيالىق جاعدايدىڭ ناشارلاۋىنا بايلانىستى «قىزىل ايماق» ءۇشىن الەۋمەتتىك-ەكونوميكالىق نىسانداردىڭ جۇمىسىن شەكتەۋ كريتەريلەرىنە جاۋاپ بەرەتىن بىرقاتار شارالار قابىلداندى. بۇل دەمالىس كۇندەرىندەگى شەكتەۋلەر، ۇجىمداردىڭ 80 پايىزىنا ارنالعان قاشىقتىقتاعى جۇيەدە جۇمىس جاساۋ، ادامداردىڭ كوپ جينالۋىن بولدىرماۋ ماقساتىندا الەۋمەتتىك ماڭىزى بار نىسانداردىڭ جۇمىس كەستەسىن قىسقارتۋ، مەكتەپ وقۋشىلارىن قاشىقتىقتان وقىتۋ، 65 جاستان اسقان ادامداردىڭ قوزعالىسىن شەكتەۋ، - دەدى باتىربەك اليەۆ.

وڭىردە اقسۋ-پاۆلودار-اقسۋ جانە پاۆلودار-اقسۋ-پاۆلودار باعىتتارىنان باسقا ايماقارالىق، وبلىسىشىلىك، قالاارالىق جانە اۋدانارالىق جولاۋشىلار تاسىمالى توقتاتىلدى.

قالالار مەن اۋدانداردا دەزينفەكتسيانى ساۋدا نىساندارىندا، قوعامدىق كولىكتەردە، تاكسيلەردە، كىرەبەرىستەر مەن ليفتىلەردە، وندىرىستىك نىسانداردا جانە قوعامدىق ورىنداردا جۇرگىزۋ ۇسىنىلدى.

باس سانيتارلىق دارىگەردىڭ ايتۋىنشا، وبلىستا 20 سانيتارلىق بەكەت ورناتىلادى. بەكەتتەردە تەمپەراتۋرانى ولشەپ، ۆيرۋستىق ينفەكتسيالاردىڭ بەلگىلەرىن تەكسەرەدى. بەكەتتەردەن انىقتامالار مەن وتكىزۋ قۇجاتتارىمەن وتۋگە بولادى. جەكە ادامداردىڭ قوزعالۋ ۋاقىتى شەكتەۋلى بولادى.

وبلىستىڭ 5 اۋدانىندا قوزعالىستى شەكتەيتىن 10 سانيتارلىق بەكەت پايدا بولادى:

 - ەرتىس اۋدانىندا – 31 قاڭتاردان 14 اقپانعا دەيىن ەرتىس اۋىلىندا سانيتارلىق بەكەت ورناتىلادى;

- ماي اۋدانىندا – كوكتوبە جانە كەڭتۇبەك اۋىلدارىندا بەكەت 29 قاڭتاردان 12 اقپانعا دەيىن جۇمىس ىستەيدى. جاياۋ جۇرگىنشىلەر مەن اۆتوكولىك جۇرگىزۋشىلەرى سانيتارلىق بەكەتتەن ساعات 7-دەن 20:00-گە دەيىن انىقتامالارمەن وتە الادى;

- جەلەزيندە – 1-15 اقپان ارالىعىندا جەلەزين جانە باشماچنوە اۋىلدارىندا;

- ۋسپەندە – 4 سانيتارلىق بەكەت گاليتسكوە، قوڭىروزەك، قوزىكەتكەن جانە كونستانتينوۆكا اۋىلدارىندا ورنالاسادى;

- اققۋلى اۋدانىندا – ازىرگە اۋدان ورتالىعىندا تەك ءبىر سانيتارلىق بەكەت ورناتىلدى.

- مەن بۇكىل وبلىس بويىنشا شەكتەۋ شارالارىن، ونىڭ ىشىندە بەتپەردە رەجيمى مەن الەۋمەتتىك قاشىقتىقتى ساقتاۋدى باقىلاۋ كۇشەيتىلەتىندىگىن ايتا كەتكىم كەلەدى. ۋچاسكەلىك پوليتسيا قىزمەتىنىڭ جۇمىسى جاسىرىن وتەتىن وتباسىلىق، ۇجىمدىق شارالاردى انىقتاۋعا باعىتتالادى، - دەدى باس دارىگەر.

مونيتورينگتىك توپتار ناۋقاستاردىڭ جانە بايلانىسقا تۇسكەن ادامداردىڭ كارانتيندى قالاي ساقتايتىندىعىن، ۇيدەگى ناۋقاستاردى مۇقيات باقىلاۋعا الا باستايدى.

65 جاستان اسقان وبلىس تۇرعىندارىنا كوشەدە از جۇرۋگە كەڭەس بەرىلەدى.

رەسپيراتورلىق ينفەكتسيانىڭ العاشقى بەلگىلەرى - مۇرىننان سۋ اعۋ، تۇشكىرۋ نەمەسە بەزگەگى بار كەز-كەلگەن ادام ۇيدە مەديتسينالىق كومەككە جۇگىنۋى كەرەك. اۋرۋحاناعا بارۋدىڭ قاجەتى جوق. ناۋقاس ادامدارعا جەدەل جاردەم نەمەسە جىلجىمالى توپتى شاقىرۋ ۇسىنىلادى.

- قابىلدانعان شارالار وبلىس تۇرعىندارى مەن بيزنەس وكىلدەرى بارلىق سانيتارلىق-ەپيدەميولوگيالىق تالاپتاردى ساقتاعان جاعدايدا عانا ءتيىمدى بولادى، - دەدى باتىربەك اليەۆ. – سىزدەن سابىرلىق ساقتاۋدى، كارانتين تالابىن ورىنداۋدى، ءوز دەنساۋلىعىڭىزعا جانە وزگەنىڭ دەنساۋلىعىنا جاۋاپكەرشىلىكپەن قاراۋىڭىزدى سۇرايمىن. تەك بىرلەسكەن كۇش-جىگەر جۇمساۋ ارقىلى ءبىز وسى جاعدايدى جەڭە الامىز! وزىڭىزگە جانە جاقىندارىڭىزعا قامقور بولىڭىز!
سوڭعى جاڭالىقتار

اتىراۋ وبلىسىندا 77 براكونەر انىقتالدى

ايماقتار • 23 قىركۇيەك، 2022

نوۆاك دجوكوۆيچ قازاقستانعا كەلەدى

تەننيس • 23 قىركۇيەك، 2022

اتىراۋدا قوناقۇيدەن ءورت شىقتى

وقيعا • 23 قىركۇيەك، 2022

ۇقساس جاڭالىقتار