مەملەكەتتىك حاتشى اتاپ وتكەندەي, بيىلعى جىل قازاقستان تاۋەلسىزدىگىنىڭ 30 جىلدىعى اياسىندا وتەدى. دەمەك, تاۋەلسىزدىكتىڭ مەرەيتويلىق جىلىنىڭ باستالۋى مەملەكەت باسشىسى ق.ق.توقاەۆتىڭ «تاۋەلسىزدىك بارىنەن قىمبات» اتتى باعدارلامالىق ماقالاسىنىڭ جارىققا شىعۋىمەن ەرەكشەلەندى. ەل پرەزيدەنتىنىڭ ماقالاسىندا تاۋەلسىزدىكتىڭ ءار ونجىلدىعىنىڭ تاريحي ءمانى, ىرگەلى باستامالارى مەن تۇڭعىش پرەزيدەنت – ەلباسى ن.ءا.نازارباەۆتىڭ شەشۋشى ءرولى, قازاق مەملەكەتتىلىگىن قالىپتاستىرۋداعى حالقىمىزدىڭ دانالىعى مەن بىرلىگى, ەڭبەكقورلىعى ايقىن انىقتالعان. مەملەكەت باسشىسى تاۋەلسىزدىگىمىزدىڭ قاسيەتتى قۇندىلىقتارى تۋرالى زاماناۋي تۇسىنىكتى تەرەڭ ءارى اۋقىمدى تۇردە اشىپ, الداعى ءتورتىنشى ونجىلدىقتىڭ باستى ماقساتتارىن ايقىندادى.
ق.كوشەرباەۆ ءبىزدىڭ قوعام پرەزيدەنتتىڭ ماقالاسىن مەملەكەتىمىزدىڭ دامۋىنداعى جاڭا كەزەڭنىڭ يدەولوگيالىق تۇجىرىمداماسى جانە باعدارلاماسى رەتىندە قابىلداعانىن باسا ايتتى.
القالى جيىن بارىسىندا مەملەكەتتىك حاتشى ق.كوشەرباەۆ بەلگىلى اكتەر ءسابيت ورازباەۆقا ءبىرىنشى دارەجەلى «بارىس» وردەنىن سالتاناتتى تۇردە تاپسىرىپ, سانالى عۇمىرىن تەاتر ساحناسىندا وتكىزگەن اكتەردى 85 جاسقا تولۋىمەن قۇتتىقتادى. ءوز كەزەگىندە مينيستر اقتوتى رايىمقۇلوۆا جانە الماتى قالاسىنىڭ اكىمى باقىتجان ساعىنتاەۆ قۇتتىقتاپ, مەرەيتوي يەسىنە ارنايى سىيلىقتارىن تاپسىردى.
ەلىمىزدىڭ ونەرىنە قوسقان ۇلەسىن باعالاعانى ءۇشىن قر حالىق ءارتىسى, مەملەكەتتىك سىيلىقتىڭ يەگەرى ءسابيت ورازباەۆ العىسىن ءبىلدىرىپ, ريزاشىلىعىن تانىتتى.
جيىن بارىسىندا اقش-تاعى دۇنيەجۇزىلىك كاسكادەرلەر اكادەمياسىنىڭ بەدەلدى «Taurus» سىيلىعىن يەلەنگەن وتاندىق «Nomad Stunds» كاسكادەرلىك توبىنىڭ جەتەكشىسى, بەلگىلى كاسكادەر جايداربەك كۇنعوجينوۆقا «مادەنيەت سالاسىنىڭ ۇزدىگى» مەدالى تابىستالدى. بۇل بەدەلدى حالىقارالىق ماراپاتتىڭ قازاقستان كاسكادەرلەرىنىڭ جوعارعى شەبەرلىگىن مويىنداعانى عانا ەمەس, قازاقستاندىق مادەنيەت پەن كينو ونەرىنە قوسقان زور ۇلەسى ەكەنىن اتاپ ءوتتى ق.كوشەرباەۆ. ءوز كەزەگىندە مادەنيەت جانە سپورت ءمينيسترى ا.رايىمقۇلوۆا كاسكادەردىڭ بۇل جەتىستىگىن ەلىمىزدىڭ مادەنيەتىنە قوسقان قور ۇلەسى ەكەندىگىن اتاپ ءوتىپ, الداعى ىستەرىنە دە ءسات ساپار تىلەدى.
قازاقستان رەسپۋبليكاسىنىڭ تۇڭعىش پرەزيدەنتى - ەلباسى ستيپەندياسىن العاندار قاتارىندا ءابدىجامىل نۇرپەيىسوۆ, مارفۋعا ايتقوجا, ءاسانالى ءاشىموۆ, نۇرعالي ءنۇسىپجانوۆ, الەكساندر گاركوۆەتس, دۋلات يسابەكوۆ, يرانبەك ورازباەۆ, بولات ايۋحانوۆ, ەلەنا ابدىحالىقوۆا, ميراس اسان جانە باسقا دا قازاق ادەبيەتى مەن ونەرىنىڭ مايتالماندارى بار.
قر مەملەكەتتىك حاتشىسى قىرىمبەك كوشەرباەۆ «مەملەكەت باسشىسى ماقالادا قۇزىرلى ورگاندار مەن وتاندىق تەلەارنالارعا مەملەكەتتىك تاپسىرىستىڭ بەلگىلى ءبىر بولىگىن مىندەتتى تۇردە تاريحي تاقىرىپتارعا باعىتتاۋدى تاپسىردى. بۇل ماسەلەگە بولاشاقتا تاريحشى عالىمدار, مادەنيەت مايتالماندارى, اسىرەسە, كينو سالاسىنىڭ ماماندارى باسا نازار اۋدارعان ءجون. ويتكەنى ۇلتتىق مۇددە تۇرعىسىنان جازىلعان جانە تاسپاعا تۇسىرىلگەن ءتول تاريحىمىز ۇرپاقتىڭ ساناسىن وياتىپ ۇلتتىڭ جادىن جاڭعىرتۋعا جول اشادى»,
دەپ اتاپ ءوتتى. مەملەكەتتىك حاتشى سونىمەن بىرگە پرەزيدەنتتىڭ جىل باسىندا جاريالانعان ماقالاسىنىڭ ماڭىزدىلىعى جايىندا ايتا كەلە, تاۋەلسىزدىگىمىزدىڭ 30 جىلدىعى اياسىندا ۇلى تۇلعالاردىڭ مەرەيتويلارىن اتاپ ءوتۋ ماسەلەسىنە توقتالدى.
سالتاناتتى قارا ارى قاراي ستيپەندياتتاردىڭ ىزگى تىلەكتەرىمەن جالعاسىن تاپتى. كسرو حالىق ءارتىسى, قازاقستاننىڭ ەڭبەك ەرى, مەملەكەتتىك سىيلىقتىڭ لاۋرەاتى ءاسانالى ءاشىموۆ مادەنيەت جانە ونەر سالاسى وكىلدەرىنە دەگەن مەملەكەت تاراپىنان قولداۋعا ريزاشىلىعىن بىلدىرسە, «Egemen Qazaqstan» گازەتىنىڭ ءبولىم مەڭگەرۋشىسى, اقىن ميراس اسان ۇلكەن مارتەبە, زور قۋانىشىمەن ءبولىسىپ, جاستار ادەبيەتىن, ونىڭ ىشىندە بالالار ادەبيەتىن قولداۋعا كوڭىل ءبولۋ تۇرعىسىندا ويلارىن ورتاعا سالدى.
مەملەكەتتىك حاتشى وسى جيىندا مەملەكەتتىك قولداۋ ەلىمىزدىڭ رۋحاني نەگىزدەرىن ودان ءارى نىعايتۋعا, قوعامدىق سانانى جاڭعىرتۋعا جانە تاۋەلسىزدىگىمىزدىڭ قاسيەتتى قۇندىلىقتارىن ناسيحاتتاۋعا مۇمكىندىك بەرەتىن جاڭا يدەيالار مەن جوبالاردى ىزدەۋگە جاڭاشا سەرپىن بەرەتىنىنە سەنىم ءبىلدىردى.
