وسى اپتادا الماتىداعى قازاق ونكولوگيا جانە راديولوگيا عىلىمي-زەرتتەۋ ينستيتۋتىنىڭ بالالار ونكولوگياسى ورتالىعىنا بايان ماقساتقىزى كەلىپ, ساۋاپتى ىسكە مۇرىندىق بولدى. ول بالالار ونكولوگياسى ورتالىعىنا جاڭا تەرموپوتتار, ميكروتولقىندى پەشتەر, تەلەديدار, كوپ فۋنكتسيالى قۇرىلعى, ادەمى توسەك جاپقىشتار جانە ەمدەلىپ جاتقان بالالارعا باسقا دا قاجەتتى جانە پايدالى سىيلىقتاردى سىيعا تارتتى.
قازوجرعزي بالالار ونكولوگياسى ورتالىعىندا كىشكەنتاي پاتسيەنتتەر حيميا جانە ساۋلەلىك تەراپيا الىپ ەمدەلەدى. بۇل ورتالىق قازوجرعزي-دا 1979 جىلى اشىلعان جانە وسى جىلدار ىشىندە وندا مىڭداعان بالا ەمدەلىپ شىقتى.
بيىل بالالار ونكولوگياسى ورتالىعى تولىق جوندەۋدەن ءوتتى. وندا جايلى جانە جارىق پالاتالار جاسالىپ, جەلدەتۋ جۇيەسى مەن سانتەحنيكا تولىعىمەن وزگەرتىلدى, قابىرعالار مەن ەدەندەر ارنايى مەديتسينالىق ماتەريالمەن قاپتالدى, بالالار الاڭى جابدىقتالدى جانە ورتالىقتىڭ بارلىق جەرىنە اۋديوجۇيە ورناتىلىپ, جاڭا جيھاز ساتىپ الىندى, سونىمەن قاتار مۇگەدەكتەر اربالارىن كوتەرۋ ءۇشىن ارنايى ليفت ورناتىلدى.
جوندەۋ جۇمىستارىنا كەرەكتى 70 ملن تەڭگەنى بەلگىسىز بولىپ قالۋدى قالاعان الماتىلىق كاسىپكەر بەرىپ وتىر. مىنە, وسىلاي الماتىداعى بالالار ونكولوگياسى بولىمشەسىندە جان جىلىتار ساۋاپتى ىستەر اتقارىلىپ جاتقان جايى بار.
سونداي-اق بيىل اتالمىش ورتالىقتا Samsung كومپانياسىنىڭ اتىنان جاسالعان سمارت-بولمە پايدا بولدى. وندا بالالار ينتەرنەت ارقىلى روبوتتەحنيكامەن جانە باسقا دا قىزىقتى نارسەلەرمەن اينالىسا الادى.
سونىمەن قاتار قازوجرعزي-دىڭ بالالار ونكولوگياسى ورتالىعىنا «اميلا» قوعامدىق قورى مەن «Help Today» قوعامدىق قورىنىڭ ەرىكتىلەرى دە كوپ جىلداردان بەرى ءوز ۇلەستەرىن قوسىپ كەلەدى.
الماتى
