سقو تۇرعىنى ينتەرنەت-الاياقتاردىڭ الداۋىمەن نەسيە رەسىمدەپ, بىردەن بار قاراجاتىنان ايىرىلعان. ونىڭ 200 مىڭ تەڭگەسىن قولعا ءتۇسىرۋ ءۇشىن الاياقتار ايەلدى ءتورت ساعات بويى اينالدىرعان.
ءوزىن «بانك قىزمەتكەرىمىن» دەپ تانىستىرعان الاياق «تىزىلىمدە اقشالاي قاراجاتتى اۋدارۋ تىركەلدى» دەگەن. سونىمەن قاتار ول جابىرلەنۋشىنىڭ بارلىق جەكە مالىمەتتەرىنەن حاباردار بولعان, اڭگىمەنى ساۋاتتى جۇرگىزگەن: اتى-ءجونىن اتاپ, سىپايى سويلەسكەن, بانك تەرميندەرىن قولدانا وتىرىپ, سەنىمگە ابدەن كىرگەن. «ماماننىڭ» ايتۋىنا قاراعاندا, جابىرلەنۋشى الاياقتار راسىمدەي باستاعان نەسيەنى سوڭىنا دەيىن راسىمدەۋى ءتيىس ەكەن, سوندا سوما ناقتىلانىپ, كارتاعا تۇسەدى. ايەل بارلىق نۇسقاۋلاردى ورىنداپ, 200 مىڭ تەڭگەگە نەسيە راسىمدەگەن, اقشانى شوتقا اۋدارعان. بىراق كەيىن ايەل الاياقتاردىڭ قۇربانىنا اينالعانىن ءتۇسىنىپ, پوليتسياعا جۇگىنگەن. قازىرگى ۋاقىتتا كريمينالدىق پوليتسيا قىزمەتكەرلەرى اتالعان فاكتى بويىنشا قاسقويلەردىڭ جۇرگەن جەرىن انىقتاۋ ماقساتىندا جەدەل-پروفيلاكتيكالىق ءىس-شارالار جۇرگىزۋدە.
جالپى جىل باسىنان 20-دان استام پەتروپاۆلدىق ينتەرنەت-الاياقتاردىڭ قۇرىعىنا تۇسكەن. ونلاين-الاياقتىقتىڭ 7 فاكتىسى بانك اۋدارىمدارىمەن بايلانىستى بولعان. وتكەن جىلى وبلىس ورتالىعىندا الاياقتار 97 جاعدايدا قالا تۇرعىندارىنىڭ شوتتارىنان اقشا جىمقىرعان.
پوليتسيا ەگدە جاستاعى ادامدارعا, تانىستارىنا, تۋىستارىنا جانە كورشىلەرىنە جەكە مالىمەتتەرىن, تەلەفون, الەۋمەتتىك جەلىلەر ارقىلى جىبەرۋگە بولمايتىنى تۋرالى ءتۇسىندىرۋ جۇمىسىن جۇرگىزۋدە. بىرەر كۇن بۇرىن پوليتسيا باسقارماسى مەن بانك قىزمەتكەرلەرىنىڭ قاتىسۋىمەن وتكەن كەزدەسۋدە مەنەدجەرلەر كۇدىكتى اۋدارىمدار ورىن العان كەزدە كليەنتتەرگە قوڭىراۋ شالىنبايتىنى تۋرالى ەسكەرتتى جانە بۇنداي جاعدايدا Call-ورتالىقتىڭ نومىرىنە حابارلاسىپ, بانك كەڭسەلەرىنە بارۋعا شاقىرادى. «قالا جانە وبلىس تۇرعىندارىن جەكە مالىمەتتەردى, بانك كارتالارى, قۇجاتتاردىڭ فوتولارىن, سونداي-اق ينتەرنەت-بانكينگ جانە الەۋمەتتىك جەلىلەردىڭ لوگين مەن قۇپياسوزدەرىن ەشكىمگە جىبەرمەۋگە شاقىرادى.
