كينو • 28 قاڭتار، 2021

«شىڭىراۋ» سوفيادا سىنعا ءتۇستى

زاڭعار جازۋشى ءابىش كەكىلباەۆتىڭ «شىڭىراۋ» پوۆەسىنىڭ جەلىسىمەن تۇسىرىلگەن كوركەم فيلم بولگاريا استاناسى سوفيا قالاسىندا ءوتىپ جاتقان 13-ءشى حالىقارالىق كينوفەستيۆالىنە قاتىسۋدا. مادەنيەت جانە سپورت مينيسترلىگىنىڭ تاپسىرىسى بويىنشا ش.ايمانوۆ اتىنداعى «قازاقفيلم» اق تۇسىرگەن كينوتۋىندى قاتارىنان ءتورت جىل بويى حالىقارالىق كينوفەستيۆالدەردە توپ جارىپ كەلەدى.

ايا ءومىرتاي

كارتينا قۇدىق قازۋشى ەڭسەپتىڭ وقيعاسىن بايانداي وتىرىپ، مەنمەندىك، باقتالاستىق، ماحاببات، دوستىق، قاستاندىق سىندى شىم-شىتىرىق دۇنيەلەردى ارقاۋ ەتەدى.

«بۇل ارينە، قازاق پروزاسىنىڭ شوقتىعى بيىك تۋىندىسى سانالاتىن ءا.كەكىلباەۆتىڭ «شىڭىراۋ» پوۆەسىندەگى ەشكىمدى جايباراقات قالدىرمايتىن عالامات يدەياسىن كوركەمدەپ ەكرانعا شىعارۋ ءۇشىن تەر توككەن ءتۇسىرۋ توبىنىڭ جەمىستى ەڭبەگىنىڭ ارقاسىندا جۇزەگە اسىپ وتىرعان جەتىستىك دەپ ويلايمىن»، دەيدى فيلم رەجيسسەرى جاڭابەك جەتىرۋوۆ.

ءفيلمنىڭ ءتۇسىرىلىم جۇمىستارى ماڭعىستاۋ وڭىرىندە ءوتتى. كارتينادا باستى رولدەردى اسىلحان تولەپوۆ، الدابەك شالباەۆ جانە ايجان جەتىرۋ سومداعان.

2009 جىلى نەگىزى قالانعان بالقان ايماعىنداعى ەڭ ءىرى بايقاۋلاردىڭ ءبىرى – Sofia MENAR Film Festival كينوفەستيۆالى جىل سايىن ءوز كورەرمەندەرىنە كينوگەرلەر شىعارماشىلىعىندا بەينەلەنگەن يسلام الەمىنىڭ مادەنيەتى جانە داستۇرىمەن تانىستىرىپ وتىرادى. فەستيۆال شەڭبەرىندە تاياۋ شىعىس، ورتالىق ازيا ءجان سولتۇستىك افريكا مەملەكەتتەرىنىڭ ەڭ ۇزدىك كوركەم، دەرەكتى جانە قىسقامەتراجدى تۋىندىلارى كورسەتىلەدى. ايتا كەتسەك، بيىلعى فەستيۆالدىڭ كونكۋرستىق باعدارلاماسىندا ۇسىنىلعان 13 ءفيلمنىڭ ىشىندە ءازيز زايىروۆ جانە مۇحامەد مامىربەكوۆ تۇسىرگەن «قىز بەن تەڭىز» ءفيلمى دە بار.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز