ساراپتاۋ كوميسسياسىنىڭ قۇرامىنا كاسىبي شەتەلدىك جانە وتاندىق فوتوگرافتار, فوتوسۋرەت سالاسىنداعى ساراپشىلار, باق وكىلدەرى كىرەدى. بايقاۋعا اۋەسقويلار فوتوگرافتار مەن 18 جاستان اسقان كاسىبي ماماندار قاتىسا الادى.
قاتىسۋشىلاردىڭ جۇمىستارى 2021 جىلدىڭ 1 اقپانىنان 15 ساۋىرىنە دەيىن قابىلدانادى. بايقاۋ شارتتارىمەن وسى سىلتەمە ارقىلى تولىعىراق تانىسۋعا بولادى.
وسى ءىس-شارا ارقىلى ۇيىمداستىرۋشىلار ادام مەن تابيعاتتىڭ ءوزارا قاتىناس ماسەلەلەرىنە, تابيعي ارتۇرلىلىكتى ساقتاۋعا قوعامدىق نازار اۋدارۋدى, قورشاعان ورتانى قۇرمەتتەۋ يدەيالارىن كەڭىنەن ناسيحاتتاۋدى كوزدەيدى.
بۇعان دەيىن قازاقستان پرەزيدەنتى قاسىم-جومارت توقاەۆ ەكولوگيالىق ءبىلىم بەرۋدىڭ, مەكتەپ قابىرعاسىنان باستاپ حالىقتى اعارتۋدىڭ ماڭىزدىلىعىن اتاپ وتكەن بولاتىن. وسىعان بايلانىستى, ەكولوگيا مينيسترلىگى قورشاعان ورتانى قۇرمەتتەۋ, جانۋارلارعا جاۋاپكەرشىلىكپەن قاراۋ سالالارىنداعى جاعدايدى جاقسارتۋ, سونداي-اق ۇلتتىق پاركتەردە ەكوتۋريزمدى دامىتۋ ءۇشىن قۇجاتتار پاكەتىن دايىنداۋدا.
وسى ماسەلەلەردى شەشۋ ءۇشىن مينيسترلىك ءتيىستى باس جوسپارلاردى ازىرلەدى, ولاردى حالىقپەن تالقىلاۋ بويىنشا جۇمىستار جۇرگىزىلۋدە. سونىمەن قاتار, قابىلداناتىن شەشىمدەردىڭ اشىقتىعىن قامتاماسىز ەتۋ ماقساتىندا ۇلتتىق پاركتەر جانىنان قوعامدىق كەڭەستەر قۇرىلدى.
«National Geographic Qazaqstan» جۋرنالىنىڭ رەداكتسياسى ءوز قىزمەتىندە ەكولوگيا, قورشاعان ورتانى قورعاۋ, جانۋارلار دۇنيەسى سالاسىنداعى وتكىر ماسەلەلەردى دە كوتەرەدى. سەرىكتەستەردىڭ قولداۋىمەن جۋرنالدىڭ قازاقستاندىق رەداكتسياسى جىل سايىن ەكولوگيالىق مادەنيەتتى قالىپتاستىرۋعا باعىتتالعان ءىس-شارالاردى وتكىزەدى: قر ەلورداسى مەن وڭىرلەرىندە عىلىمي ەكسپەديتسيالار, تۋرلار, فوتوكورمەلەر وتكىزىپ, ماتەريالداردى جۋرنالدا جانە باسپانىڭ ينتەرنەت-رەسۋرستارىندا جاريالايدى.
